فوتو: اشىق دەرەككوز
2025 جىلدىڭ باسىنان بەرى الەۋمەتتىك-ەڭبەك سالاسىنداعى مەملەكەتتىك قىزمەتتەردى پرواكتيۆتى كورسەتۋ ءۇشىن 463,3 مىڭ ادامعا SMS-حابارلاما جولدانعان. وسىنىڭ ناتيجەسىندە 246 مىڭنان استام ادام ءوتىنىش بەرمەي-اق جاردەماقى مەن الەۋمەتتىك تولەمدەر العان.
قازىرگى تاڭدا وتسك ارقىلى ازاماتتار ءوتىنىش بەرمەي-اق 11 ءتۇرلى الەۋمەتتىك تولەمدى الا الادى. ولار:
- ەڭبەك ەتۋ قابىلەتىنەن ايىرىلعان جاعدايدا تولەنەتىن تولەم;
- جۇمىسىنان جانە اسىراۋشىسىنان ايىرىلعان جاعدايدا بەرىلەتىن كومەك;
- بالا تۋ مەن كۇتىمىنە جانە مۇگەدەكتىگى بار بالانى تاربيەلەپ وتىرعان اتا-اناسىنا (قامقورشىسىنا) تولەنەتىن جاردەماقى;
- مۇگەدەكتىگى بويىنشا جانە كوپبالالى وتباسىلارعا بەرىلەتىن جاردەماقى;
- «التىن القا» جانە «كۇمىس القامەن» ماراپاتتالعان كوپبالالى انالارعا بەرىلەتىن جاردەماقى;
- اتاۋلى الەۋمەتتىك كومەك, سونداي-اق جەرلەۋگە ارنالعان بىرجولعى تولەم.
سونىمەن قاتار, وتسك زەينەتاقى تولەمدەرى, «قانداس» مارتەبەسى بەرىلگەن نەمەسە ۇزارتىلعان جاعدايلار, جۇمىسسىز ازاماتتار ءۇشىن جۇمىسپەن قامتۋ شارالارى تۋرالى اۆتوماتتى حابارلامالار جىبەرۋدى ىسكە اسىردى.
«مەملەكەتتىك قولداۋ شارالارىن الۋعا قۇقىق بەلگىلەنگەن كەزدە الەۋەتتى الۋشىعا 1414 بىرىڭعاي بايلانىس ورتالىعىنان SMS-حابارلاما جىبەرىلەدى. حابارلاما العان ازامات وعان كەلىسىمى تۋرالى جاۋاپ بەرۋى كەرەك. ءوتىنىشتى رەسىمدەۋ جانە الەۋمەتتىك جاردەماقى نەمەسە تولەم تاعايىنداۋ اۆتوماتتى رەجيمدە جۇرگىزىلەدى, سودان كەيىن اقشا قاراجاتى الۋشىنىڭ بانك شوتىنا اۋدارىلادى», دەلىنگەن حابارلامادا.
الاياقتىق تاۋەكەلدەرىن بولدىرماۋ ءۇشىن 1414 نومىرىنەن كەلگەن حابارلاماعا عانا جاۋاپ بەرۋ قاجەت. بارلىق سۇراقتار بويىنشا 1414 Call-ورتالىعىنا تەگىن قوڭىراۋ شالۋعا بولادى.
