فوتو:كسزي
تەحنولوگيالىق پروگرەستىڭ ماڭىزدى سالدارىنىڭ ءبىرى – جاساندى ينتەللەكتپەن جابدىقتالعان, ادامنىڭ قاتىسۋىن بارىنشا از قاجەت ەتەتىن قارۋ-جاراق تۇرلەرىنىڭ پايدا بولۋى. اسكەري سالادا اۆتونومدى تەحنولوگيالاردىڭ جەدەل دامۋى مەن تارالۋى اقج-نى قولدانۋدىڭ قۇقىقتىق, گۋمانيتارلىق جانە ەتيكالىق قىرلارىنا قاتىستى ەلەۋلى الاڭداۋشىلىق تۋدىرىپ وتىر. باستى سۇراقتار – شەشىم قابىلداۋ ۇدەرىسىندەگى ادامنىڭ ءرولى, اقج قولدانىلعان جاعدايدا جاۋاپكەرشىلىك پەن ەسەپتىلىك, سونداي-اق مۇنداي جۇيەلەردىڭ وزدىگىنەن وقۋىنىڭ ىقتيمال سالدارى.
قازاقستان قارۋدى باقىلاۋدىڭ حالىقارالىق تەتىكتەرىن نىعايتۋعا ءداستۇرلى تۇردە قولداۋ كورسەتىپ كەلە جاتقان مەملەكەت رەتىندە اقج-نى رەتتەيتىن حالىقارالىق-قۇقىقتىق مىندەتتى قۇجات قابىلداۋدى جاقتايدى. ەلدىڭ يادرولىق قارۋسىزدانۋ مەن تاراتپاۋ سالاسىنداعى تابىستى تاجىريبەسى بۇل ماسەلەلەردى وڭىرلىك جانە جاھاندىق دەڭگەيدە ىلگەرىلەتۋ ءۇشىن بەرىك نەگىز بولىپ تابىلادى. وسى تۇرعىدا قازاقستان سەرىكتەس مەملەكەتتەردىڭ اقج-نىڭ باقىلاۋسىز جاسالۋى مەن رەتتەلمەي قولدانىلۋىنان تۋىندايتىن قاتەرلەردى تالقىلاۋ ۇدەرىسىنە قاتىسۋىن اسا ماڭىزدى دەپ سانايدى.
دوڭگەلەك ۇستەل گيبريدتى فورماتتا ءوتتى. وعان ديپلوماتتار, مەملەكەتتىك ورگانداردىڭ اسكەري جانە ازاماتتىق ماماندارى, ساراپتامالىق قۇرىلىمدار مەن اكادەميالىق قاۋىمداستىق وكىلدەرى, سونداي-اق حقكك-نىڭ سالالىق ساراپشىلارى قاتىستى. ءىس-شارا بارىسىندا قاتىسۋشىلار اقج سالاسىنداعى حالىقارالىق نورمالاردى قالىپتاستىرۋ ۇدەرىسى تۋرالى وزەكتى اقپارات الىپ, رەتتەۋگە قاتىستى پروبلەمالىق اسپەكتىلەردى شەشۋ جولدارى بويىنشا پىكىر الماستى.
شاراعا قاتىسقان قسزي ديرەكتورىنىڭ ورىنباسارى داۋرەن ابەن ءوز بايانداماسىندا اقج-نىڭ ازىرلەنۋى مەن تارالۋىنا بايلانىستى ستراتەگيالىق اسپەكتىلەر مەن قاۋىپسىزدىك سىن-قاتەرلەرىنە وڭىرلىك كوزقاراستى ۇسىندى. اتاپ ايتقاندا, وسى سالادا قارۋلانۋ جارىسىنىڭ پايدا بولۋ قاۋپىن اتاپ ءوتىپ, اقج بويىنشا حالىقارالىق كونسەنسۋسقا قول جەتكىزۋ جولىنداعى ساياسي كەدەرگىلەردى تالدادى. داۋرەن ابەن ۇلىنىڭ پىكىرىنشە, اۆتونومدى قارۋ-جاراق جۇيەلەرى – بۇل جاي عانا جاڭا تەحنولوگيا ەمەس, ولار حالىقارالىق قاۋىپسىزدىك پەن گۋمانيتارلىق قۇقىقتىڭ بازالىق قاعيداتتارىنا تونگەن ەلەۋلى سىن-قاتەر. سوندىقتان الەمدىك قاۋىمداستىق بۇل ماسەلەنى اسا جاۋاپكەرشىلىكپەن قاراستىرىپ, بولاشاقتا يادرولىق قارۋدىڭ قولدانىلۋىمەن تەڭ دارەجەدەگى جويقىن سالدارعا اكەلۋى مۇمكىن «قۇقىقتىق ۆاكۋمنىڭ» قالىپتاسۋىنا جول بەرمەۋى ءتيىس.
