ماراپاتتاۋ راسىمىنە وقۋ-اعارتۋ ۆيتسە-ءمينيسترى مايرا مەلدەبەكوۆا قاتىستى. ۆيتسە-مينيستر ءوز سوزىندە دارىندى بالالاردى قولداۋ جانە ادام كاپيتالىن دامىتۋ مەملەكەتتىڭ باستى باسىمدىقتارىنىڭ ءبىرى ەكەنىن اتاپ ءوتتى.
«مەملەكەت ادام كاپيتالىن دامىتۋ مەن دارىندى بالالاردى قولداۋعا ەرەكشە نازار اۋدارادى. اۋىل مەكتەپتەرىنە ارنالعان رەسپۋبليكالىق وليمپيادا – وسى ماقساتتارعا قول جەتكىزۋدەگى ماڭىزدى قۇرالدىڭ ءبىرى. ينتەللەكتۋالدىق سايىستارعا قاتىسۋ تەرەڭ ءبىلىمدى عانا ەمەس, جوعارى جاۋاپكەرشىلىكتى دە تالاپ ەتەدى. سىزدەر ادال ءارى تارتىستى باسەكەدە ءوز بىلىمدەرىڭىزدى دالەلدەپ, ۇزدىك ناتيجەلەرگە قول جەتكىزدىڭىزدەر. ۇلكەن جەڭىستەرىڭىزبەن قۇتتىقتايمىن», دەدى ۆيتسە-مينيستر.
بيىلعى وليمپيادادا 200 مەدال ساراپقا سالىندى: 36 التىن, 66 كۇمىس جانە 98 قولا. كوماندالىق ەسەپ بويىنشا گران-پري ماڭعىستاۋ وبلىسىنىڭ كومانداسىنا تابىستالدى.
«ۇزدىك وليمپيادالىق كوماندا» نوميناتسياسى بويىنشا I دارەجەلى ديپلومدى الماتى وبلىسىنىڭ قۇراماسى, II ورىندى اتىراۋ جانە اقمولا وبلىستارىنىڭ كوماندالارى, III دارەجەلى ديپلومدى قىزىلوردا جانە باتىس قازاقستان وبلىستارىنىڭ كوماندالارى يەلەندى.
جەڭىمپازدار ەلىمىزدىڭ جەتەكشى جوعارى وقۋ ورىندارىنىڭ بەس رەكتورلىق گرانتىمەن ماراپاتتالدى. ونىڭ ىشىندە: SDU – 2 گرانت, Satbayev University – 1 گرانت, قاراعاندى تەحنيكالىق ۋنيۆەرسيتەتىنەن – 2 گرانت.
وليمپيادانىڭ قورىتىندى كەزەڭىنە قاتىسقان بارلىق فيناليستەر الداعى ينتەللەكتۋالدىق جارىستارعا دايارلاۋ ماقساتىندا «دارىن» رەسپۋبليكالىق سىرتتاي مەكتەبىنە قابىلدانادى. I دارەجەلى ديپلوم يەگەرلەرى 2026 جىلعى ناۋرىز ايىندا وتەتىن رەسپۋبليكالىق وليمپيادانىڭ قورىتىندى كەزەڭىنە قاتىسۋ مۇمكىندىگىن الادى.
ايتا كەتەيىك, اۋىل مەكتەپتەرى وقۋشىلارىنا ارنالعان رەسپۋبليكالىق وليمپيادا جاراتىلىستانۋ-ماتەماتيكالىق جانە قوعامدىق-گۋمانيتارلىق باعىتتاعى 13 ءپان بويىنشا ءتورت كەزەڭدە ۇيىمداستىرىلدى. 2025-2026 وقۋ جىلىندا وليمپيادانىڭ مەكتەپ كەزەڭىنە 125 مىڭ وقۋشى قاتىسقان. فينالعا 1000-عا جۋىق قاتىسۋشى ءوتتى, ولاردىڭ 475-ءى جاراتىلىستانۋ-ماتەماتيكالىق باعىت بويىنشا سىنعا ءتۇستى. قوعامدىق-گۋمانيتارلىق باعىتتاعى وليمپيادا 9-14 جەلتوقسان كۇندەرى استانا قالاسىندا وتەدى.
