مەكتەپ اۋلاسىندا ۇيىمداستىرىلعان «مەكتەبىم – مەيىرىم مەكەنى» اتتى ءىس-شارا اياسىندا تالاي جاندى بىلىمگە جەتەلەپ, شاكىرتتەرىنىڭ جۇرەگىنەن ورىن العان قوس ارداگەر ۇستازدى ماڭگىلىك ەستە قالدىرۋعا ارنالعان كابينەتتەر اشىلدى. بۇل باستاما دەمەۋشىسى ۇلدارى, الماتى وبلىسىنداعى جامبىل, قاراساي اۋداندارىندا ەلگە قىزمەت ەتىپ, بۇگىندە قۇرمەت تورىنەن كورىنىپ جۇرگەن جانجىگىت, نۇرجىگىت جۇسىپوۆتەر ەكەن. ولار كابينەتتەردى وقۋ ۇدەرىسىنە ءتيىمدى ەتىپ تولىق جابدىقتاپ بەرىپتى. ەكى سىنىپ تا شاكىرتتەردىڭ قازاق ءتىلى مەن ادەبيەتىنەن, ماتەماتيكادان تەرەڭ ءبىلىم الۋىنا قاجەتتى كورنەكىلىكتەر, ادەبي, پاندىك كىتاپتارمەن, ينتەراكتيۆتى تاقتامەن, تاعى باسقا قاجەتتىلىكتەرمەن تولىقتىرىلدى.
مەكتەپ ديرەكتورى تورەباي شەرماحانوۆتىڭ ايتۋىنشا, 800 بالا ءبىلىم الاتىن مەكتەپتە وتكەن وقۋ جىلىندا جالپى ءبىلىم بەرەتىن پاندەر بويىنشا اۋداندىق وليمپياداعا قاتىسقان التى وقۋشى جەڭىسكە جەتسە, «دارىن» عىلىمي جوبالار بايقاۋىندا 4 وقۋشى, «زەردە» باسەكەسىندە 17 شاكىرت جۇلدەلى ورىندارعا قول جەتكىزگەن.
«بۇگىن لەنتاسى سالتاناتتى تۇردە قيىلىپ, پايدالانۋعا بەرىلەتىن ەكى سىنىپ كابينەتتەرى ءبىزدىڭ ماقتانىشىمىز بولعان قوس ۇستازدىڭ اتىمەن اتالىپ وتىر. سۇراپىل سوعىس جىلدارىندا جالىندى جەڭىستى جاقىنداتقان بايجىگىت اقساقال كوپ جىل وسى مەكتەپتە باسشى بولدى. قاتارلاستارى مەن شاكىرتتەرى قازاق ءتىلى مەن ادەبيەتىنەن ءدارىس بەرگەن ۇستازدىڭ رۋحاني جان دۇنيەسى باي, ەڭبەكقور ازامات بولعانىن كەيىنگىگە ۇلگى قىلىپ ايتادى. مارقۇم الماش اپاي دا ۇيىندەگى بالالار تاربيەسىنەن بولەك عىلىم مەن تەحنيكا سالاسىنا العاشقى باسپالداق سانالاتىن ماتەماتيكا ءپانىن شاكىرت زەيىنىنە جەتكىزىپ, قانشاما ۇل-قىزدىڭ جولىنا شىراق جاقتى. كابينەتتەر كەرەمەت جابدىقتالدى, زاماناۋي ينتەراكتيۆتى تاقتا, تەلەديدار جانە باسقا دا كورنەكىلىكتەرگە بالالار ەرەكشە قۋاندى. اتا-انالارىنا وسىنداي قۇرمەت كورسەتكەن جۇسىپوۆتەر اۋلەتىنە العىس ايتامىز», دەدى مەكتەپ ديرەكتورى.
بۇل باستامانىڭ جاس ۇرپاقتىڭ تاربيەسىنە تيگىزەر اسەرى ۇشان-تەڭىز. جۇزدەگەن جاستى ءبىلىم سوقپاعىنا باستاعان قوس ارداگەردىڭ رۋحىنا ارنالعان شاراعا بۇگىندە زەينەتتەگى اتا-انالار مەن ۇستازدار, مارقۇمداردان ءبىلىم العان شاكىرتتەر جينالىپ, سىي-قۇرمەتكە بولەندى. سىنىپ كابينەتتەرىنىڭ اشىلۋىندا ارداگەر ۇستاز تاستايبەك يمانعاليەۆ, مەكتەپ ديرەكتورىنىڭ تاربيە ءىسى جونىندەگى ورىنباسارلارى ايبەك تۇرىمبەتوۆ, ايگۇل جارمانوۆا, ۇيىمداستىرۋشى پەداگوگ نۇرقاش مەيرامبەك جانە قازاق ءتىلى مەن ادەبيەتى, ماتەماتيكا پاندەرى بىرلەستىگىنىڭ ۇستازدارى ەرەكشە بەلسەندىلىك تانىتىپ, جاقسى ءىستىڭ ۇيىتقىسى بولدى.
سالتاناتتى جيىندا ارداگەر ۇستازداردىڭ ۇلى, جامبىل اۋدانىندا حالىقتى تابيعي گازبەن قامتىپ, ەل العىسىن ارقالاعان ازامات جانجىگىت بايجىگىت ۇلى تەبىرەنە سويلەدى.
ء«بىزدىڭ كىندىك قانىمىز وسى ولكەدە تامىپ, وسى مەكتەپتە ءبىلىم الدىق. اتا-انامىز ۇستاز بولدى. «مەكتەپ ءتارتىبىن بۇزۋعا, جامان وقۋعا بولمايدى. ەگەر سەندەردىڭ قىلىقتارىڭ دۇرىس بولماسا, ءبىز قالاي قالعان وقۋشىلاردان ۇلگىلى بولۋدى تالاپ ەتەمىز. دەمەك, بەتەگەدەن بيىك, جۋساننان الاسا بولىڭدار, تەك ۇزدىك وقۋلارىڭ كەرەك» دەيتىن اكە اقىلى الداعى جولىمىزدان اينىتپاس ماقسات بولدى. مەن ءوزىم قۇرىلىس سالاسىنىڭ مامانىمىن. كەيىنگى جىلدارى اقىندار مەن باتىرلار مەكەنى – جامبىل اۋدانىندا گاز شارۋاشىلىعىندا, قۇرىلىستا دا تەر توكتىم. قازىر انامنىڭ ەسىمىمەن اتالاتىن «جاڭا الماش اۋىلى» مەيرامحاناسىندا تۇتىنۋشىلارعا قىزمەت كورسەتىپ كەلەمىن. انام ومىردەن ەرتە ءوتتى, ءبىز اكە مەيىرىمىنە شومىلدىق, تاباندىلىعىن كورىپ تالپىندىق. بۇگىن سول ءازىز جانداردىڭ رۋحىنا قۇرمەت كورسەتكەن شاراعا جينالعان بارشا قاۋىمعا, مەكتەپ ۇجىمىنا العىسىمىز شەكسىز», دەدى.
وسى كۇنى مەكتەپتە ەكى كابينەتتىڭ بارلىق جابدىعىنان بولەك ەكى ينتەراكتيۆتىك تاقتا, جاساندى گازون تارتۋ ەتىلدى. وسىلايشا, قوس ۇستازعا دەگەن ۇرپاقتار قۇرمەتى مەكتەپ ۇجىمى ءۇشىن ۇلكەن سىي بولدى.
قىزىلوردا وبلىسى,
قازالى اۋدانى
