فوتو: atameken.kz
بۇل شەشىم – ازاماتتاردىڭ ەكونوميكالىق بەلسەندىلىگىن ىنتالاندىرۋعا, سالىقتىق ەسەپتىلىكتى جەڭىلدەتۋگە جانە ءوزىن-ءوزى جۇمىسپەن قامتۋ سەكتورىنداعى كىرىستەردى زاڭداستىرۋعا باعىتتالعان اۋقىمدى رەفورمانىڭ ءبىر بولىگى.
جاڭا اسر جەكە كاسىپكەر (جك) مارتەبەسى جوق جانە جالدامالى قىزمەتكەرى جوق ازاماتتاردىڭ زاڭدى تۇردە جۇمىس ىستەۋىنە بارىنشا قاراپايىم ءارى قولجەتىمدى تەتىك رەتىندە ازىرلەنگەن.
ءوزىن-ءوزى جۇمىسپەن قامتىعاندارعا ارنالعان اسر-ءدىڭ نەگىزگى ارتىقشىلىقتارى مەن ەرەكشەلىكتەرى:
- جك رەتىندە تىركەلۋدىڭ قاجەتى جوق;
- ايىنا 300 اەك-كە دەيىنگى شەكتى تابىس;
- الەۋمەتتىك تولەمدەردى عانا قامتيتىن بىرىڭعاي 4% مولشەرلەمە;
- پلاتفورما/قوسىمشا ارقىلى جۇمىس ىستەۋ تالابى جوق;
- جالدامالى قىزمەتكەرلەردى الۋعا تىيىم سالىنادى;
- جۇمىس ىستەۋ تەتىگى تاڭدالادى: اككرەديتتەلگەن ينتەرنەت-پلاتفورما ارقىلى نەمەسە قارجى مينيسترلىگىنە قاراستى مەملەكەتتىك كىرىستەر كوميتەتىنىڭ ءموبيلدى قوسىمشاسى ارقىلى.
الەۋمەتتىك تولەمدەردى 4%-دىق بىرىڭعاي مولشەرلەمەگە ەنگىزۋ ءوزىن-ءوزى جۇمىسپەن قامتىعان ازاماتتارعا الەۋمەتتىك قامسىزداندىرىلۋعا, زەينەتاقى جيناقتارىنا جانە مەديتسينالىق ساقتاندىرۋعا قول جەتكىزۋگە مۇمكىندىك بەرەدى. وسى ارقىلى ولار بۇعان دەيىن نەگىزىنەن رەسمي تۇردە جۇمىس ىستەيتىن ازاماتتارعا عانا قولجەتىمدى بولعان الەۋمەتتىك قورعاۋمەن قامتاماسىز ەتىلەدى.
بيزنەستى قولداۋ: شىعىنداردى شەگەرىمگە جاتقىزۋ
ءوزىن-ءوزى جۇمىسپەن قامتىعاندارمەن جۇمىس ىستەيتىن كومپانيالار ءۇشىن ماڭىزدى ىنتالاندىرۋ تەتىكتەرىنىڭ ءبىرى – سالىقتىق شەگەرىمدەر. ءوزىن-ءوزى جۇمىسپەن قامتىعان ازاماتتارمەن جاسالعان مامىلەلەر بويىنشا شىعىنداردى كورپوراتيۆتىك تابىس سالىعى (كتس) نەمەسە جەكە تابىس سالىعى (جتس) بويىنشا سالىق سالىناتىن تابىستى ەسەپتەۋ كەزىندە شەگەرىمگە جاتقىزۋعا بولادى.
بۇل قادام نارىقتىڭ اشىقتىعىنا ىقپال ەتە وتىرىپ, بيزنەستى ءوزىن-ءوزى جۇمىسپەن قامتىعان ازاماتتاردىڭ قىزمەتىن زاڭدى تۇردە تارتۋعا ىنتالاندىرا تۇسەدى.
بەكىتىلگەن ءتىزىم وزىندىك جۇمىسپەن قامتۋ سالاسىندا ەڭ كوپ تارالعان 40 قىزمەت ءتۇرىن قامتيدى.
رۇقسات ەتىلگەن قىزمەتتىڭ نەگىزگى ساناتتارى:
- تۇرمىستىق جانە جوندەۋ قىزمەتتەرى: كومپيۋتەرلەردى, تۇرمىستىق تەحنيكانى, كيىم-كەشەكتى, اياق كيىمدى, جيھازدى, زەرگەرلىك بۇيىمداردى جوندەۋ, سونداي-اق سىلاق, سىرلاۋ, اعاش ۇستالىعى جانە باسقا دا شەبەرلىك جۇمىستارى.
- شىعارماشىلىق جانە زياتكەرلىك قىزمەتتەر: كوركەم جانە ادەبي شىعارماشىلىق, فوتوسۋرەت, اۋىزشا جانە جازباشا اۋدارما, سونداي-اق سپورت, دەمالىس جانە مادەنيەت سالاسىنداعى ءبىلىم بەرۋ.
- جالعا بەرۋ جانە كولىك قىزمەتتەرى: تاكسي قىزمەتى, تۇرعىن ءۇيدى جالعا بەرۋ (سۋبارەندا), جەكە قولدانىستاعى زاتتاردى جالعا بەرۋ.
- ينتەرنەت-پلاتفورمالار ارقىلى كورسەتىلەتىن قىزمەتتەر: تەك ينتەرنەت-پلاتفورمالار ارقىلى كورسەتىلەتىن قوسىمشاى كوممەرتسيالىق قىزمەتتەر.
جاڭا رەجيم بەكىتىلگەن تىزىمگە كىرمەيتىن قىزمەت تۇرلەرىمەن اينالىساتىن ازاماتتارعا قولدانىلمايدى.
جاڭا اسر-ءدى ەنگىزۋ – ەكونوميكانىڭ ەداۋىر بولىگىن كولەڭكەدەن شىعارۋدا, ءوزىن-ءوزى جۇمىسپەن قامتىعان ازاماتتاردى تولىققاندى الەۋمەتتىك قورعاۋدا جانە ولاردى رەسمي ەڭبەك نارىعىنا ينتەگراتسيالاۋدا ماڭىزدى قادام. بۇل جەڭىلدەتۋ اكىمشىلىك جۇكتەمەنى ازايتىپ قانا قويماي, زاڭدى ەكونوميكالىق ستاتيستيكانىڭ قالىپتاسۋىنا دا ىقپال ەتەدى.
جاڭا اسر – شاعىن بيزنەس پەن ءوزىن-ءوزى جۇمىسپەن قامتىعانداردى قولداۋعا باعىتتالعان رەۆوليۋتسيالىق قادام. بۇل تەك تومەن مولشەرلەمە عانا ەمەس, بارىنشا وڭايلاتىلعان تەتىك تە بولىپ ەسەپتەلەدى. ادام ءوز تابىسىنان 4% مولشەرىندە تولەمدى ىڭعايلى قوسىمشا ارقىلى تولەپ, وزىندە زەينەتاقى اۋدارىمدارى مەن مەديتسينالىق قىزمەتكە قولجەتىمدىلىك بار ەكەنىنە سەنىمدى بولا الادى. بۇل – مەملەكەت ءۇشىن دە, ءوزىن-ءوزى جۇمىسپەن قامتىعان ءاربىر ازامات ءۇشىن دە ءوزارا ءتيىمدى شەشىم.
