مەموراندۋم اياسىندا تاراپتار ورتا, تەحنيكالىق جانە كاسىپتىك ءبىلىم بەرۋ ۇيىمدارىنىڭ وقۋ ۇدەرىسىنە عىلىمي, يننوۆاتسيالىق جانە تسيفرلىق تەحنولوگيالاردى, سونداي-اق جاساندى ينتەللەكتىنى ەنگىزۋ, STEM باعىتتارىن دامىتۋ جانە جاس عالىمدارعا قولداۋ كورسەتۋ بويىنشا بىرلەسكەن جوبالاردى ىسكە اسىرۋعا كەلىستى.
– مەملەكەت باسشىسىنىڭ تاپسىرماسىنا وراي ەلىمىزدە عىلىمدى دامىتۋعا ايرىقشا باسىمدىق بەرىلىپ وتىر. بۇل مەموراندۋم – بولاشاق زياتكەرلىك الەۋەتتى قالىپتاستىرۋ جولىنداعى ناقتى قادام. بۇگىندە ەرتە جاستان عىلىمعا باۋلۋ ماقساتىندا ءبىلىم ۇيىمدارىندا STEM-زەرتحانالار, زاماناۋي پاندىك كابينەتتەر مەن ءتۇرلى شەبەرحانالار ارقىلى زەرتتەۋ ينفراقۇرىلىمى قالىپتاستىرىلادى. بيىل مەكتەپ وقۋشىلارى 80-گە جۋىق حالىقارالىق جانە رەسپۋبليكالىق عىلىمي جوبالار بايقاۋىنا قاتىستى. بۇل بولاشاق عالىمداردى تاربيەلەۋ باعىتىنداعى جۇمىستاردى ساپالى جالعاستىرۋدىڭ وزەكتىلىگىن كورسەتەدى,– دەدى ج. سۇلەيمەنوۆا.
ايتا كەتەيىك, جىل باسىنان بەرى حالىقارالىق وليمپيادالار مەن عىلىمي بايقاۋلاردا 1 564 وقۋشى 879 جۇلدە السا, ونىڭ ىشىندە 171 التىن, 312 كۇمىس, 394 قولا مەدال يەلەنگەن. سونداي-اق ەلىمىزدە حالىقارالىق بەدەلدى عىلىمي جارىستاردا جەڭىسكە جەتكەن وقۋشىلار مەن ولاردىڭ پەداگوگتەرىنە ءبىر رەتتىك مەملەكەتتىك سىياقى تولەۋ جۇيەسى ەنگىزىلىپ جاتىر. بۇعان دەيىن مۇنداي ىنتالاندىرۋ حالىقارالىق پاندىك وليمپيادالاردا جۇلدەگەر بولعاندارعا بەرىلگەن ەدى.
ازامات قۇسايىن
