وڭتۇستىك قازاقستان وبلىسىنا جاڭا اكىم تاعايىندالدى

شىمكەنت. 8 تامىز. وڭتۇستىك قازاقستان وبلىسىنىڭ اكىمى بولىپ بەيبىت اتامقۇلوۆ تاعايىندالدى. بۇل تۋرالى egemen.kz حابارلادى. ەسكە سالا كەتەيىك, مەملەكەت باسشىسى نۇرسۇلتان نازارباەۆ وبلىستىڭ بۇرىنعى اكىمى اسقار مىرزاحمەتوۆتى بۇگىن «نۇر وتان» پارتياسى توراعاسىنىڭ ءبىرىنشى ورىنباسارى ەتىپ تاعايىنداعان بولاتىن. بۇعان دەيىن بەيبىت اتامقۇلوۆ ينۆەستيتسيالار جانە دامۋ مينيسترلىگىنىڭ جاۋاپتى حاتشىسى قىزمەتىن اتقاردى. بەيبىت باكىر ۇلى اتامقۇلوۆ 1964 جىلى 19 مامىردا الماتى وبلىسىندا تۋعان. ينجەنەر-مەتاللۋرگ, ەكونوميست. 1986 جىلى لەنين اتىنداعى قازاق پوليتەحنيكالىق ينستيتۋتىن, 2000 جىلى سانكت-پەتەربۋرگ ەكونوميكا جانە قارجى مەملەكەتتىك ۋنيۆەرسيتەتىن بىتىرگەن. ەكونوميكا عىلىمدارىنىڭ كانديداتى. 1985 جىلدان – زاۆەنياگين اتىنداعى نوريلسك تاۋ-كەن مەتاللۋرگيا كومبيناتىنىڭ جەز بالقىتۋ زاۋىتىندا بالقىتۋشى. 1986 جىلدان – شىمكەنت قورعاسىن زاۋىتىنىڭ بالقىتۋشىسى, شەبەر, رافيرلەنگەن تسەحتىڭ اعا شەبەرى. 1991 جىلدان 2006 جىلعا دەيىن جەكە سەكتوردا – ونەركاسىپ كاسىپورىندارىندا جۇمىس اتقاردى. 2006 جىلدان – كەڭەسشى, رەسەيدەگى قازاقستان ەلشىسىنىڭ ەلشى-كەڭەسشىسى. 2007 جىلدان – يرانداعى قازاقستان ەلشىسىنىڭ ەلشى-كەڭەسشىسى. 2008 جىلدان – ماينداعى فرانكفۋرت قالاسىنداعى قازاقستاننىڭ باس كونسۋلى. 2010 جىلدان – مالايزيا, يندونەزيا رەسپۋبليكاسى, برۋنەي-دارۋسسالام, فيليپپين رەسپۋبليكاسىندا قازاقستاننىڭ توتەنشە جانە وكىلەتتى ەلشىسى. 2012 جىلدان – يندۋستريا جانە جاڭا تەحنولوگيالار مينيسترلىگىنىڭ جاۋاپتى حاتشىسى. ال 2014 جىلدان ينۆەستيتسيالار جانە دامۋ مينيسترلىگىنىڭ جاۋاپتى حاتشىسى بولدى. باقتيار تايجان. دەرەك, سۋرەت: egemen.kz.