فوتو: ۆيدەودان الىنعان كادر
الەۋمەتتىك جەلىلەردە جۇقا مۇزدىڭ ۇستىندە جۇرگەن تۇرعىنداردىڭ بەينەجازباسى تارادى. كەيبىرى مۇز بەتىندە سۋرەتكە ءتۇسىپ قانا قويماي, بالالارىن قولاربامەن سىرعاناتقان.
قالالىق توتەنشە جاعدايلار قىزمەتىنىڭ مالىمەتىنشە, قازىر ەسىل وزەنى مەن بوتانيكالىق باقتاعى سۋقويمادا مۇزدىڭ قالىڭدىعى نەبارى 2 سانتيمەترگە جەتەدى. كەي بولىكتەرىندە مۇلدە قاتپاعان. مامانداردىڭ ايتۋىنشا, مۇنداي قالىڭدىق ادام سالماعىن كوتەرۋگە مۇلدە جەتكىلىكسىز. قاۋىپسىز ءجۇرۋ ءۇشىن مۇز كەمىندە 10 سانتيمەتر بولۋى قاجەت.
«مۇزدىڭ قالىڭدىعىنا كوز جەتكىزبەي وعان شىقپاڭىز, بۇل ومىرىڭىزگە قاۋىپ توندىرەدى. بالالاردى ەشقاشان باقىلاۋسىز مۇز ۇستىنە جىبەرمەڭىز. قاتپاعان مۇزدىڭ ۇستىنە شىققانى ءۇشىن اكىمشىلىك قۇقىق بۇزۋشىلىق تۋرالى كودەكستىڭ 412 بابى بويىنشا شارا قولدانىلاتىنىن حابارلايمىز! وزىڭىزگە جانە جاقىندارىڭىزعا قامقور بولىڭىزدار!», دەلىنگەن تجم ەسكەرتۋىندە.
