سۋرەتتى تۇسىرگەن – ەرلان ومار, «EQ»
مەملەكەتتىك قىزمەتشىنىڭ كۇندەلىكتى ءومىرى ونىڭ كاسىبي مىندەتىمەن تىعىز بايلانىستى. رۋحاني مادەنيەتى مەن ءبىلىمى, العان تاربيەسى ونىڭ تۇلعالىق بولمىسىن قۇراپ, ناتيجەسىندە ءىس-ارەكەتىنە ىقپال ەتەدى. مەملەكەتتىك قىزمەتشى – حالىق پەن بيلىك اراسىنداعى التىن كوپىر. ونىڭ ءمىنسىز بەدەلى مەملەكەتتىك اپپاراتتىڭ بەدەلىن ارتتىرادى, ال بۇل تۇتاس ەلدىڭ تۇراقتى دامۋىنا ىقپال ەتەدى.
ادەپ پەن ادىلەت بىرگە جۇرەتىن ەگىز ۇعىم بولعاندىقتان, ادەپتى دە ادال قىزمەتشى – ادىلەتتى قوعامنىڭ ايناسى. مەملەكەتتىك قىزمەتشىنىڭ ءاربىر ىسىندە ادەپتىلىك, ادىلدىك, ادالدىق, پاراساتتىلىق كورىنىس تاپقان جاعدايدا عانا حالىقتىڭ سەنىمى دە ارتادى.
ادەپ دەگەنىمىز – تەك مىنەز-ق ۇلىق نورمالارى ەمەس, قىزمەت مادەنيەتىنىڭ, قوعام الدىنداعى جاۋاپكەرشىلىكتىڭ كورسەتكىشى. مەملەكەتتىك قىزمەتتەگى ادەپتى ءادىل شەشىم قابىلداۋ, اشىق بولۋ, پاراساتتى سويلەۋ, ءاربىر ىسىندە حالىقتىڭ سەنىمىن ساقتاۋ دەپ تۇسىنەمىز. ادەپتىلىك – كاسىبيلىكتىڭ بەلگىسى. ادەپ ساقتالعان جەردە ءوزارا سىيلاستىق ورنايدى, ال سىيلاستىق بار جەردە سەنىم مەن ناتيجەلىلىك قاتار جۇرەتىنى ءسوزسىز.
پرەزيدەنت قاسىم-جومارت توقاەۆ ايتقانداي: «ادىلەتتى قازاقستاننىڭ باستى قۇندىلىعى – ادال ەڭبەك پەن جاۋاپكەرشىلىك». مەملەكەتتىك قىزمەتشى وسى قاعيداتتى كۇندەلىكتى ىسىمەن دالەلدەۋگە ءتيىس. بۇل رەتتە ادەپ نورمالارى مەن سىبايلاس جەمقورلىققا قارسى مادەنيەت – ءبىر-ءبىرىن تولىقتىراتىن ۇعىم ءارى ءبىرتۇتاس جۇيە. ال ونىڭ تۇپقازىعى – ادامنىڭ ىشكى ادالدىعى, ياعني ءوز ىسىنە, حالقىنا, مەملەكەتىنە دەگەن شىنايى جاۋاپكەرشىلىگى جانە قوعام الدىنداعى پارىزدى سەزىنۋ.
بۇگىنگى تاڭدا ادەپ مادەنيەتىن قالىپتاستىرۋ – ءتارتىپ ساقتاۋ ەمەس, رۋحاني ورتانى جانە سەنىمگە نەگىزدەلگەن جۇمىس احۋالىن نىعايتۋ. وسى تۇرعىدا ادەپ جونىندەگى ۋاكىلدىڭ ءرولى دە ماڭىزدى. ونى كەڭەسشى, ۇيلەستىرۋشى, ۇجىم مادەنيەتىن ساقتاۋشى تۇلعا دەپ سانايمىز. سەبەبى ەتيكانى ماجبۇرلەۋ ارقىلى ۇيرەتۋ مۇمكىن ەمەس, ول تۇلعالىق سانا مەن ورتا مادەنيەتىنىڭ ۇيلەسىمىمەن جانە سەنىم ارقىلى قالىپتاسادى.
مەملەكەتتىك قىزمەت ىستەرى اگەنتتىگىنىڭ توراعاسى د.جازىقبايدىڭ «ادىلەتتى قازاقستان – ادال ازامات» اتتى مونوگرافياسىندا: «قازىرگى ءبىزدىڭ قوعام مەملەكەتتىك قىزمەتشىلەردەن ەلدىك جانە قوعامدىق مۇددەلەرگە ءادىل جانە ادال قىزمەت ەتۋىن, ءوز كۇش-جىگەرىن, ءبىلىم مەن تاجىريبەسىن وتانىمىزدىڭ دامۋىنا جۇمساۋىن كۇتەدى. مەملەكەتتىك قىزمەتشىنىڭ تۇلعالىق جەتىلۋى – تۇتاستاي قوعام وزگەرۋىنىڭ العىشارتى», دەيدى. وسى تۇرعىدا, «ادىلەتتى قازاقستان – ادال ازاماتتان باستالادى» دەگەن قاعيدا بارشا مەملەكەتتىك قىزمەتشىنىڭ كاسىبي جانە ادامگەرشىلىك ۇستانىمىنىڭ نەگىزگى ولشەمىنە اينالۋعا ءتيىس.
گۇلجاحان ۇسەنوۆا,
مەملەكەتتىك قىزمەت ىستەرى اگەنتتىگىنىڭ ادەپ جونىندەگى ۋاكىلى
