جۇمىسىمىزعا جاڭا سەرپىن بەرەدى

ەلباسىمىز حالىققا حابارلا­عان بۇل جاڭالىق ارقىلى ەلىمىز ءۇشىن وسىناۋ اسا ماڭىزدى تاريحي وقيعادان كەيىن تۇتىنۋشىلارعا تاۋارلار مەن قىزمەتتەردىڭ كەڭ اۋقىمىنا تاڭداۋ جاساۋعا جول اشىلادى. بۇگىنگى تاڭدا «ىرىس-باقىت» بولىپ قايتا قۇرىلعان ءبىزدىڭ كاسىپورىننىڭ جۇمىسى اسا اۋقىمدى. ءبىزدىڭ ەڭبەك يەلەرى مۇندا 100-دەن استام ادام تەرى وڭدەۋ, بىلعارى كيىمدەرىن تىگۋ, اياق كيىم, ات ابزەلدەرىن جاساۋ, كيىز باسۋ وندىرىسىمەن اينالىسادى. ءوندىرىس كولەمى جىلما-جىل ارتا تۇسۋدە. بۇل, ءسوز جوق, كومبيناتتىڭ دامۋ جولىنا تۇسكەندىگىنىڭ بەلگىسى. الدىڭعى جىلى 101 ميلليون تەڭگەنىڭ ءونىمى شىعارىلسا, بىلتىر بۇل كورسەتكىش 435 ميلليون تەڭگەدەن استى. كاسىپورىن جىلىنا 500 مىڭ قوي تەرىسىن, 300 مىڭ ءىرى قارا تەرىسىن وڭدەۋگە قابى­­­­­­لەت­تى. جۇمىسشىلاردىڭ ورتاشا جالا­قىسى 50 مىڭ تەڭگەدەن اينالادى. ونىمدەرىمىزدىڭ باسىم بولىگى رەسەيگە كەتىپ جاتىر. كاسىپورىن وسىعان قوسا ۇلكەن سۇرانىستاعى كيىز ءۇي جاساۋعا دا قابىلەتتى. ءبىر كەزدەرى كيىز ءۇي شىعاراتىن تالدىقورعانداعى ۇشتوبە فابريكاسىنىڭ جۇمىسىن توقتاتۋى كيىز ءۇي كەرەك ەمەس دەگەندى بىلدىرمەيدى. كەڭ-بايتاق ەلىمىزدىڭ تاماشا تابيعات مۇيىستەرىنەن دەمالىس ورىندارىنىڭ اشىلۋى, ءتۋريزمدى دامىتۋ باعىتى بويىنشا كيىز ءۇي ۇلكەن سۇرانىسقا يە بولاتىن كۇندەر الىس ەمەس. ايتسە دە ەلباسى ايتقانداي, الدىمىزدا ءالى دە اۋقىمدى جۇ­مىستار كۇتىپ تۇر. بۇل ءساتتى تالاي جىل كۇتىپ, قانشاما دايىندىقتان ءوتىپ, شىڭدالساق تا باسەكەگە دايىن بولۋىمىز قاجەت. قالپاعىمىزدى اسپانعا اتىپ, قۇر قۋانا بەرمەي, سوعان ساي ارەكەت ەتۋىمىز كەرەك. بۇل ۇيىمعا مۇشە بولۋىمىز ەل كاسىپكەرلەرىنە تىڭ كۇش, سەرپىلىس, قۋات بەرەدى دەپ ويلايمىن. ويتكەنى, بولاشاعىن ويلاعان فەرمەر, شارۋا يەسى, بيزنەس وكىلى باسەكەگە ساي بولۋ ءۇشىن قولدان كەلگەننىڭ ءبارىن جاسايدى. جۇمىسىن ساراپتاپ, جاڭادان ۇيىمداستىراتىن بولادى. كەڭەسحان احاەۆ, «ىرىس-باقىت» جشس ديرەكتورى. جامبىل وبلىسى.