فوتو: اشىق دەرەككوز
#RepublicDay, #رەسپۋبليكاكۇنى حەشتەگتەرىمەن جاريالانعان بەينەروليكتەر ەلدىڭ سان ءتۇرلى ءوڭىرىن, مادەنيەت پەن ونەرىن, جاستاردىڭ كرەاتيۆتى ويلاۋىن بىرىكتىرەتىن الاڭعا اينالدى. ءبىرى بەينەروليك ارقىلى كوك تۋدىڭ تاريحىن بايانداسا, ەندى ءبىرى ۇلتتىق كيىم كيىپ بي بيلەيدى, ءۇشىنشىسى – ەلىمىزدىڭ جەتىستىكتەرىن ينفوگرافيكا تۇرىندە كورسەتەدى. وعان قوسا, مەكتەپ وقۋشىلارى مەن ستۋدەنتتەر ءتۇرلى چەللەندجدەر ۇيىمداستىرىپ, ءوز ەلىن ماقتان ەتۋدىڭ زاماناۋي ۇلگىسىن قالىپتاستىرىپ كەلەدى.
سوڭعى جىلدارى جاستار اراسىندا تانىمال بولعان « مەنىڭ ەلىم – مەنىڭ تۋىم!» چەللەندجى الەۋمەتتىك جەلىلەردە ەرەكشە قارقىن الدى. قاتىسۋشىلار ۇيلەرىنىڭ بالكوندارىنا مەملەكەتتىك تۋدى ءىلىپ, فوتو مەن ۆيدەولار جاريالادى.
ال TikTok-تا تاراعان «مەن قازاقستاننىڭ ازاماتىمىن» فلەشموبى دا كەڭىنەن تانىلدى. وندا جاستار ۇلتتىق كيىممەن ەلدىڭ باستى رامىزدەرىن ۇستاپ, پاتريوتتىق اندەرگە بەينە تۇسىرەدى. ولاردىڭ قارالىمى ميلليوننان اسىپ, بۇل چەللەندج ۆيرتۋالدى كەڭىستىكتەگى ەڭ ءىرى وتانسۇيگىش اكتسيالاردىڭ بىرىنە اينالىپ ۇلگەردى. تسيفرلىق داۋىردەگى مۇنداي جوبالاردى ەلگە دەگەن سۇيىسپەنشىلىكتىڭ جاڭا فورماتى دەسەك تە بولادى.
ماسەلەن, ەلوردادا وتكەن «رەسپۋبليكا رۋحى – جاستىق جالىنىندا» اتتى فلەشموبتا 1500-دەن استام ستۋدەنت ەل رامىزدەرىمەن الاڭعا جينالىپ, ءبىر مەزەتتە «اتامەكەن» ءانىن شىرقادى. مەرەكە تەك قالا ورتالىقتارىندا ەمەس, شالعايداعى اۋىلداردا دا ەرەكشە اتاپ ءوتىلىپ جاتىر. اۋىل جاستارى تۇسىرگەن بەينەروليكتەرىن #مەنىڭتۋىم, #RepublicDay2025 حەشتەگىمەن ءبولىسىپ, ەلدىك سەزىمىن جەلىدە دارىپتەپ ءجۇر.
ال كىتاپحانالار مەن مادەنيەت ۇيلەرى جاستاردىڭ يدەياسىنا قولداۋ كورسەتىپ, ءتۇرلى شىعارماشىلىق بايقاۋلار ۇيىمداستىرىپ وتىر. جاس بلوگەرلەر مەن ۆولونتەرلەر دە بۇل ۇردىستەن تىس قالعان جوق. بيىلعى مەرەكەنىڭ تاعى ءبىر ەرەكشەلىگى تاربيەشىلەر بۇلدىرشىندەرگە تۋ مەن ەلتاڭبانىڭ ماعىناسىن سۋرەت پەن ويىن ارقىلى جەتكىزىپ, بالاقايلار دا چەللەندجدەرگە ءوز ۇلەسىن قوسىپ وتىر. ءتىپتى كەي بالاباقشالاردا بالالار ءوز قولىمەن تۋ جاساپ, ءانۇران شىرقاعان بەينەلەر الەۋمەتتىك جەلىدە تارالدى.
وسىنداي باستامالار قوعامدا رۋحتى كۇشەيتىپ, ەگەمەندىكتىڭ قادىرىن ۇعىنۋعا جول اشادى. اسىرەسە TikTok پەن Instagram ارقىلى تاراعان پاتريوتتىق چەللەندجدەر بۇگىندە شەكارا اسىپ, وزگە ەلدەگى قانداستاردىڭ دا قىزىعۋشىلىعىن وياتىپ وتىر. بۇل رەسپۋبليكا كۇنىنىڭ تسيفرلىق داۋىردە جاڭا تىنىس العانىنىڭ ايقىن دالەلى.
