فوتو: ۇكىمەتتىڭ ءباسپاسوز قىزمەتى
وتاندىق Paradigm Shift (CodiPlay) كومپانياسىنىڭ وكىلدەرى وزدەرىنىڭ جاڭا باستامالارى تۋرالى باياندادى. كومپانيا ازىرلەگەن AI Kitap جوباسى – بۇل مەكتەپ پاندەرى بويىنشا ءار وقۋشىنىڭ دەڭگەيىنە قاراي وقۋ ماتەريالىن لايىقتاۋعا ارنالعان, پروگرەسكە تالداۋ جاسايتىن جانە بىلىمدەگى ولقىلىقتاردى انىقتايتىن تسيفرلىق وقۋلىق. قازىر ونىڭ جۇمىس نۇسقاسى دايىندالىپ, AITU جۇيەسىمەن ينتەگراتسيا جۇرگىزىلىپ جاتىر.
سونىمەن قاتار, OlympIQ اتتى سپورت سالاسىنا ارنالعان تەحنولوگيالىق پلاتفورما تانىستىرىلدى. بۇل جۇيە سپورتشىلار مەن ۇيىمداردىڭ اناليتيكالىق, مەديتسينالىق جانە ۇيىمداستىرۋشىلىق دەرەكتەرىن جاساندى ينتەللەكت ارقىلى وڭدەيدى. قازىر جوبا بويىنشا جول كارتاسى ازىرلەنىپ, العاشقى پروتوتيپتەر دايىندالعان.
پرەمەر-مينيسترگە بۇل ەكى جوبانى پيلوتتىق رەجيمدە ەنگىزۋ جوسپارلانعان مەكتەپتەر مەن سپورت فەدەراتسيالارىنىڭ ءتىزىمى دە ۇسىنىلدى.
«جاساندى ينتەللەكت تەحنولوگيالارىن دامىتۋ – ۇكىمەتتىڭ باستى مىندەتى. ءبىز وتاندىق كومپانيالاردىڭ ونىمدەرىن جان-جاقتى قولداۋعا دايىنبىز», دەدى ولجاس بەكتەنوۆ.
كەزدەسۋ بارىسىندا سونداي-اق وندىرىستىك پروتسەستەردى وڭتايلاندىرۋعا, ەنەرگەتيكا مەن كولىك سالالارىنىڭ تيىمدىلىگىن ارتتىرۋعا باعىتتالعان تەحنولوگيالىق شەشىمدەر دە ءسوز بولدى. كومپانيا وكىلدەرى وندىرىستەگى شىعىنداردى ازايتىپ, تاۋەكەلدەردى باسقارۋعا مۇمكىندىك بەرەتىن ينتەللەكتۋالدى جۇيەلەردىڭ ازىرلەنۋى جايىندا باياندادى.
كەزدەسۋ قورىتىندىسىندا ۇكىمەت باسشىسى ءتيىستى مەملەكەتتىك ورگاندارعا IT-مامانداردىڭ ۇسىنىستارىن مۇقيات قاراپ, جۇزەگە اسىرۋ بويىنشا ناقتى شارالار قابىلداۋدى تاپسىردى.
