«بىرلىگىمىز جاراسقان!» ەتنوفەستيۆالى

شىعىس ءوڭىرى – قاشاننان دوستىق پەن بىرلىكتىڭ التىن بەسىگىنە اينالعانىن ءتۇرلى تاعىلىمدى شارالارىمەن-اق تانىتىپ كەلەدى. ناۋرىز مەرەكەسى قارساڭىندا وبلىستىق دوستىق ۇيىندە «بىرلىگىمىز جاراسقان!» ەتنوفەستيۆالى ءوتتى.  قوعامدىق كەلىسىم مەن تۇراقتىلىقتى ساقتاۋدىڭ كەپىلىنە اينالعان اسسامبلەيا ينستيتۋتىنىڭ قۇرىلعانىنا بيىل – 20 جىل. اتالعان شارا قازاقستان حال­قى اسسامبلەياسىنىڭ جىلىنا ارنالدى. وسى ورايدا ەتنوسارالىق تاتۋلىق پەن تا­عاتتىلىقتى قالىپتاستىرۋعا باعىت­تالعان مەملەكەتتىك ساياساتتى ءساتى­مەن جۇزەگە اسىرعان قۇرىلىمدى دامىتا ءتۇسۋ, ءمان-ماڭىزىن جەتە ءتۇسىن­دىرۋ – قازاقستاندىق قوعامنىڭ نەگىزگى ءتىنى بولىپ وتىر. بۇل جولى ەتنوفەستيۆالعا قا­تى­سۋ­شىلار حالىق شىعارماشىلىعى ارقى­لى ەلىمىزدىڭ تاۋەلسىزدىك جىلدارى قول جەتكىزگەن باستى بايلىعى – قازاق­ستاندىق كەلىسىم مودەلىن ناسيحاتتا­دى. فەستيۆالگە وسكەمەندىك ەتنوما­دەني ۇيىمداردىڭ انشىلەرى, ۆوكالدى انسام­بلدەرى, بي ۇجىمدارى, مۋزىكالىق اسپاپتاردا ويناۋشىلار مەن كوركەم ءسوز وقۋشىلار قاتىستى. ءار قاتىسۋشى وزدەرىنىڭ ۇلتتىق ەرەكشەلىگى بويىن­شا جاساعان قولونەر تۋىندىلارى مەن كادەسىيلارىن دوستىق ءۇيىنىڭ مۇراجايىنا تابىس ەتتى. بەلورۋس ەتنومادەني بىرلەستىگىنىڭ ءتورا­عاسى يا.ۆولكوۆيچ پەن ۋكراين ەتنو­مادەني بىرلەستىگىنىڭ ءتورايىمى گ.جام­پەيىسوۆا اسسامبلەيانىڭ بۇگىندە جالپى قازاقستاندىقتارعا ورتاق ازاماتتىق جانە حالىقتىق ينستيتۋتقا اينالعانىن, ەلى­مىزدىڭ تۇراقتىلىعى مەن قوعامدىق كەلىسىمىن ساقتاۋ جولىنداعى نەگىزگى تىرەگى ەكەنىن جەتكىزدى. – اسسامبلەيانىڭ جاۋاپكەرشىلىگى جىلدان-جىلعا ارتىپ كەلەدى. ونىڭ نەگىزگى مىندەتى مەن ماقساتى ءححى عاسىردا ۇنەمى كەڭەيە تۇسەدى دەپ ويلايمىز. بۇل – ەلباسى نۇرسۇلتان نازارباەۆتىڭ پاراساتتى پايىمى مەن كورەگەن ساياساتىنىڭ كورىنىسى, – دەدى گ.جامپەيىسوۆا. ەتنومادەني ۇيىمداردىڭ مۇشەلەرى فەستيۆال اياسىندا ازاماتتىق ۇستانىمعا ادالدىق تانىتىپ, الداعى پرەزيدەنتتىك سايلاۋعا بەلسەنە قاتىسۋعا شاقىردى. سون­داي-اق, فەستيۆالعا ۇلان اۋدانى ايىرتاۋ اۋىلىنىڭ گاگارين اتىن­داعى مەكتەبىنىڭ وقۋشىلارى ارنايى كەلگەن ەكەن. جاس مەيماندار دوستىق ءۇيى – قوعامدىق كەلىسىم ورتالىعى عيمارا­تىمەن, ەتنومادەني ۇيىمداردىڭ جۇمىسىمەن تانىسىپ, «دوستىق بەسىگى» اتتى ءفيلمدى تاماشالادى. دۋمان اناش, «ەگەمەن قازاقستان». وسكەمەن.