فوتو: سۋ رەسۋرستارى جانە يرريگاتسيا مينيسترلىگى
8 شاقىرىمنان اساتىن «كوشىم» كانالى, ۇزىندىعى 3 شاقىرىمنان اساتىن سۋ قويماسىنىڭ بوگەتى, سونداي-اق پەرۆوماي, بۋدارين, كيروۆ-چيجين كانالدارى جوندەلىپ جاتىر.
سۋ رەسۋرستارى جانە يرريگاتسيا مينيسترلىگىنىڭ مالىمەتىنشە, سونىمەن قوسا, ۇزىندىعى 2,2 شاقىرىمنان اساتىن ەكى ەلەكتر جەلىسى جانە 3,77 شاقىرىمدىق سىرتقى جارىقتاندىرۋ جۇيەسى سالىنىپ, بەينەباقىلاۋ, اۆتوماتتاندىرىلعان ەسكەرتۋ جۇيەلەرى جانە باقىلاۋ-وتكىزۋ پۋنكتتەرى ورناتىلىپ جاتىر.
سالا ءمينيسترى نۇرجان نۇرجىگىتوۆ ايتۋىنشا جوبا جۇزەگە اسقان سوڭ كيروۆ سۋ قويماسىنىڭ بەرىكتىگى ارتىپ, تۇتىنۋشىلارعا سۋارمالى سۋ ۇزدىكسىز بەرىلەدى.
«رەكونسترۋكتسيا نىساننىڭ سىيىمدىلىعىن ۇلعايتىپ, ونىڭ فۋنكتسيونالدىق مۇمكىندىكتەرىن جاقسارتادى. ناتيجەسىندە وبلىستىڭ 12 مىڭ گەكتاردان استام ەگىستىك القاپتارى سۋمەن قامتاماسىز ەتىلەدى», دەدى ن.نۇرجىگىتوۆ.
1967 جىلى پايدالانۋعا بەرىلگەن, جالپى سىيىمدىلىعى 62,9 ملن تەكشە مەتردى قۇرايتىن كيروۆ سۋ قويماسى – ورال-كوشىم سۋارۋ جانە سۋلاندىرۋ جۇيەسىنىڭ ماڭىزدى بولىگى.
