باسىن بايگەگە تىككەن

تۇعىرى بولەك تۇلعاعا,  ۇلت ءۇشىن تۋعان جامپوزعا ەسكەرتكىش-ءمۇسىن ورناتىلىپ, مۇراجاي اشىلدى «ءار ۋاقىتتا مەنىڭ جۇرەگىمنىڭ تورىنەن ورىن الاتىن مەنىڭ ەر ءىنىم – جۇمابەك». دۋالى اۋىز عابيت مۇسىرەپوۆ ن. حرۋششەۆتىڭ قۇرىق بويلامايتىن زىمياندىق ساياساتى سالدارىنان قازاقتىڭ ۇلان-بايتاق جەرى بولشەكتەنىپ كەتە جازداعان تۇستا ارىستانداي ايبات, جولبارىستاي قايرات كورسەتىپ, ەل تۇتاستىعىنىڭ ساقتالىپ قالۋىنا سەبەپكەر بولعان ۇلتجاندى ازاماتتىڭ ەرلىگىن وسىلاي باعالاعان ەكەن. ول كەزدەرى بوداندىق قامىتىن كيىپ, وتارلاۋدىڭ تەپەرىشىن ابدەن تارتقان قازاق حالقىنىڭ جانايقايىن ماسكەۋدەگى بيلىككە اشىق ايتۋ مۇمكىن ەمەس-تۇعىن. باسىنا قارا بۇلت ۇيىرىلەتىنىن, قىزمەتتەن شەتتەتىلەتىنىن, قۋعىن­داۋعا تۇسەتىنىن بىلە تۇرا ەكىنىڭ ءبىرى تاۋەكەل ەتە بەرمەيتىن قادامعا بارۋىن كوزسىز ەرلىكتەن گورى اتا-بابامىز قاسىق قانىمەن قورعاپ, كەيىنگە اماناتتاپ كەتكەن اتامەكەنگە دەگەن زور سۇيىسپەنشىلىكتىڭ ەرەن ۇلگىسى دەپ تۇسىنگەن دۇرىس بولار. سولتۇستىكقازاقستاندىقتار ءۇشىن دە جۇ­ما­بەك تاشەنوۆتىڭ ورنى بولەك. سانالى عۇمىرىنىڭ بەس جىلىن قىزىلجار وڭىرىندە (1947-1952 جىلدارى-وبلاتكوم توراعاسىنىڭ ورىنباسارى, توراعاسى) وتكىزگەن ونىڭ ەكونوميكانى, مادەنيەتتى, رۋحانياتتى دامىتۋعا قوسقان ۇلەسى ولشەۋسىز. دەمەك, نار تۇلعالى ازا­ماتتى قالاي ۇلىق­تاساق تا جاراسادى. كوپ­تەن بەرى ەسىمى ەلەۋسىز بولىپ كەلگەن مەم­لەكەت جانە قوعام قايراتكەرىنىڭ 100 جىل­دىق مەرەيتويى قارساڭىندا پەتروپاۆل قا­لا­سىنداعى № 20 مەكتەپكە اتىن بەرۋ تۋرالى كوپشىلىكتىڭ ۇسىنىستارى ۇكىمەت تاراپىنانا قولداۋ تاپتى. ەندى, مىنە, ۇلتتىق ءتالىم-تاربيە بەرەتىن وقۋ ورداسى الدىنا ەسكەرتكىش-ءمۇسىن ورناتىلىپ, مارقۇمنىڭ تۋعان-تۋىستارىنىڭ, زيالى قاۋىم وكىلدەرىنىڭ, جاستاردىڭ, وقۋشىلاردىڭ قاتىسۋىمەن وتكەن سالتاناتتى شارا ەرەكشەلىگىمەن ەستە قالدى. وبلىس اكىمى ەرىك سۇلتانوۆ جينال­عانداردى ايتۋلى وقيعامەن قۇتتىقتاپ, تا­عىلىمدى دا ءتالىمدى ىستەرى حالىق جادىندا وشپەستەي ساقتالىپ قالعان تۇلعا جايلى تولعانا سويلەدى. مارقۇمنىڭ ۇلى سايان جۇمابەك ۇلى اكە جايلى جىلى ەستەلىكتەرمەن, ءار جىلدارى قىزمەت اتقارعان سولتۇستىك قازاقستان وبلى­سى­نىڭ قۇرمەتتى ازاماتى جاقسىلىق ىسقاقوۆ, گريگوري كۋحار, تاعى باسقالارى جارقىن بەينەسى جايلى اسەرلەرىمەن ءبولىستى. ەسكەرتكىش-ءمۇسىننىڭ اۆتورى, ۆ. سۋريكوۆ اتىنداعى ماسكەۋ مەملەكەتتىك اكادەميالىق كوركەمسۋرەت ينستيتۋتىنىڭ تۇلەگى, بۇگىندە ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ كافەدرا مەڭگەرۋشىسى قىزمەتىن اتقاراتىن مالىك جۇنىسباەۆتىڭ ەسىمى دە قىزىلجارلىقتارعا جاقسى تانىس. كەزىندە ۇكىلى ىبىرايدىڭ ءمۇسىنىن تاماشا سومداعان شەبەرگە تاڭداۋدىڭ ءتۇسۋى بەكەر ەمەس. ونىڭ وزىنە جۇكتەلگەن مىندەتتى ۇلكەن جاۋاپكەرشىلىكپەن اتقارىپ شىققانى بىردەن اڭعارىلادى. پاراساتتى كەلبەت, قايسار رۋح مۇسىندە كەرەمەت كەلىسىم تاپقان. ايتۋلى شاراعا مەكتەپ باسشىلىعى, مۇعا­لىمدەر مەن وقۋشىلار ەرەكشە ىجدا­ھات­تى­لىقپەن دايىندالىپتى. «قايسار رۋحتى ازامات» دەپ اتالاتىن ستەندتە مول ماعلۇماتتار توپتاستىرىلىپتى. مارتەبەلى قوناقتار مۇراجايدىڭ تۇساۋكەسەرىنە قاتىسىپ, قايراتكەردىڭ جەكە زاتتارىمەن, ەڭبەك, ءومىر جولدارىنان سىر شەرتەتىن شىعارمالارمەن, ەستەلىكتەرمەن تانىستى. – مەكتەپتە 2010 جىلدان بەرى «ىزدەۋ» توبى جۇمىس ىستەيدى. ونىڭ مۇشەلەرىنىڭ تىنىمسىز ىزدەنىستەرى ارقاسىندا كوپتەگەن تىڭ دەرەكتەر جينالدى. كورشى وبلىستاردان قولجازبالار, جادىگەرلەر الىندى. شىمكەنت قالاسىنا دەيىن بارىپ قايتتىق,–دەدى سويلەسكەنىمىزدە تاريح ءپانىنىڭ مۇعالىمى كلارا مولداحمەتوۆا. اكت زالىندا جاس ورەندەر ۇيىم­داستىرعان ادەبي-كومپوزيتسيالىق كەشكە ج.تاشەنوۆتىڭ كەلىنى فاتيما سادىققىزى ريزاشىلىعىن ءبىلدىرىپ, العىسىن جاۋدىردى. ءومىر ەسقالي, «ەگەمەن قازاقستان». سولتۇستىك قازاقستان وبلىسى. سۋرەتتى تۇسىرگەن امانگەلدى بەكمۇراتوۆ.