فوتو:BeWoman / جاندوس ەرگازيەۆ
«BE WOMAN ASIA فورۋمى ساياساتقا ارالاسپايدى. ءبىزدىڭ مىندەتىمىز — ورتالىق ازيا ايەلدەرىنە داميتىن, ءوزارا ىنتىماقتاساتىن ورتا قۇرۋ. بيىل فورۋمدا 100 سپيكەر, 50 مەنتور جانە 30 سەرىكتەس بولدى, 2700 ادام قاتىستى. ءىس-شاراعا قاتىسقان ءار ايەل بيزنەستە, مانساپ جولىندا, جالپى ومىردە پايدالى بولاتىنداي ءبىلىم مەن تاجىريبە جيناسا دەگەن نيەتپەن اۋقىمدى باعدارلاما دايىنداعانبىز», دەلىنگەن مالىمدەمەدە.
كوميتەت ءار سپيكەرمەن الدىن الا بريفينگ وتكىزىپ, رەسمي كەلىسىمشارتقا قول قوياتىنىن اتاپ ءوتتى. قۇجاتتا قازاقستان رەسپۋبليكاسىنىڭ زاڭناماسىن بۇزاتىن نەمەسە فورۋم مەن ونىڭ قاتىسۋشىلارىنا نۇقسان كەلتىرەتىن ساياسي جانە وزگە دە مالىمدەمەلەرگە تىيىم سالىنعان. سونىمەن قاتار, ساحناعا شىعار الدىندا سپيكەرلەرگە ەرەجەلەر تولىق تۇسىندىرىلەدى.
الايدا فورۋم تىكەلەي ەفيردە وتكەندىكتەن, ءبىر سپيكەردىڭ ءسوزى رەگلامەنتتەن تىس ايتىلعان. ۇيىمداستىرۋشىلار مۇنداي جاعدايعا قاپالانعانىن جانە بۇل فورۋمنىڭ قۇندىلىقتارىنا قايشى ەكەنىن جەتكىزدى.
«ەل الدىنا شىعىپ ءسوز سويلەۋدىڭ اسا ۇلكەن جاۋاپكەرشىلىك ەكەنىن ەسكەرە وتىرىپ, ساحناعا شىقپاس بۇرىن سپيكەرگە ەرەجەلەردى ەگجەي-تەگجەيىنە دەيىن ايتىپ تۇسىندىرەمىز. دەگەنمەن فورۋم تىكەلەي ەفيردە وتەتىندىكتەن, وكىنىشكە قاراي, سپيكەردىڭ ءبىر ءسوزى رەگلامەنتتەن تىس ايتىلدى. الاڭىمىزعا ساياسي تاقىرىپتىڭ كىرىستىرىلگەنىنە قاپالاندىق. بۇل BE WOMAN ASIA قۇندىلىعىنا ءارى جوبانىڭ ميسسياسىنا ساي كەلمەيدى. ءبىز قاراپايىم ءارى ناقتى ەرەجەنى ۇستانامىز: فورۋمدى ساياسيلاندىرۋعا قارسىمىز. ءبىز ءبىر-بىرىنە قۇرمەتپەن قاراۋدى, ءوزارا ىنتىماقتاستىقتى جانە ديالوگتى قولدايمىز», دەدى كوميتەت وكىلدەرى.
ۇيىمداستىرۋشىلار مودەراتسيانى كۇشەيتىپ, رەگلامەنتتى قاتاڭ قاداعالاۋعا جانە سپيكەرلەرمەن ءتۇسىندىرۋ جۇمىستارىن ارتتىرۋعا ۋادە بەردى.
سونىمەن قاتار, ۇيىمداستىرۋ كوميتەتى جەكە ادامنىڭ ايتقان پىكىرىن بۇكىل فورۋمعا, قاتىسۋشىلارعا نەمەسە سەرىكتەستەرگە تەلىمەۋدى سۇرادى.
