سۋرەت: gov.kz
قازىر جۇرتشىلىق ءجيى-ءجيى ۇيىمداستىرىلاتىن سەنبىلىكتەرگە بوي ۇيرەتىپ كەلەدى. باستاپقىدا «قىزىلوردانىڭ جەلى بۇگىن جيناعانىڭدى ەرتەڭ شاشادى, بىزدىكى وسى نە اۋرە؟» دەگەندەر دە تابىلماي قالعان جوق. بىراق جۇيەلى ۇيىمداستىرىلعان ءىس بۇل سەكەمدى دە سەيىلتتى. جينالعان قوقىس ارنايى ورىنعا جەدەل جەتكىزىلگەنى بۇل ءىستىڭ كوز الداۋ ءۇشىن جاسالماعانىن كورسەتىپ, مۇنتازداي كوشەلەر مەن جيناقى باقتار مەن گۇلزارلار تاربيە مەن ءتارتىپ باسى تازالىق ەكەنىن دالەلدەي ءتۇستى.
وبلىس ورتالىعىنداعى «وتان قورعاۋشىلار» اللەياسىندا «تازا قازاقستان – تازا ايماق» اتتى ەكولوگيالىق اكتسيا ءوتىپ, وعان بەلسەندى جاستار, ەرىكتىلەر, «Amanat» پارتياسى جانىنداعى «جاستار رۋحى» جاستار قاناتى مەن وبلىستىق, قالالىق جاستار رەسۋرستىق ورتالىقتارىنىڭ وكىلدەرى قاتىستى. اكتسيا اياسىندا ەلۋگە جۋىق جاس اللەيا اۋماعىن قوقىستان, قۇرعاق بۇتاقتار مەن تۇسكەن جاپىراقتاردان تازارتتى.
«ورتاق ىسكە ۇلەس قوسقاندار كوپ. جۇرتتى جاقسىلىققا جۇمىلدىرعان مۇنداي باستامالاردىڭ وسكەلەڭ ۇرپاقتى تابيعاتتى ايالاۋعا تاربيەلەۋدەگى ماڭىزى ەرەكشە», دەيدى وبلىستىق جاستار رەسۋرستىق ورتالىعىنىڭ ديرەكتورى ءالىبي باساروۆ.
بۇل كۇنى قالاداعى ساياحات شاعىن اۋدانىندا دا سەنبىلىك ۇيىمداستىرىلىپ, جاۋاپتى سالا وكىلدەرىنەن بولەك, ماڭاي تۇرعىندارى دا ورتاق ىسكە جۇمىلدى.
قالاداعى دەنساۋلىق جانە دەمالىس ساياباعىندا دا كەڭ كولەمدى سەنبىلىك ۇيىمداستىرىلدى. وبلىستىق باسقارمالار مەن مەكەمەلەردىڭ قىزمەتكەرلەرى, جاستار ۇيىمدارىنىڭ بەلسەندىلەرى, ەرىكتىلەر, سونداي-اق قالا تۇرعىندارى قاتىسقان سەنبىلىك بارىسىندا ساياباق اۋماعىنداعى قوقىس جينالىپ, اعاشتاردىڭ ءتۇبى قوپسىتىلىپ, جاسىل جەلەك سۋارىلدى. جاڭادان جاس كوشەتتەر وتىرعىزىلىپ, گۇلزارلار رەتكە كەلتىرىلدى. وسىنداي باستامالار بارلىق اۋداندا ۇيىمداستىرىلىپ, جول جيەكتەرى مەن جاياۋ جۇرگىنشىلەر جولدارى, قوعامدىق ورىندار تازارتىلىپ, رەتسىز وسكەن شوپتەر شابىلىپ, قۋراعان بۇتاقتار كەسىلدى.
جاستار بەلسەندىلەرى سەنبىلىك كەزىندە ەكولوگيالىق مادەنيەتتى كەڭىنەن ءسوز ەتىپ, تابيعاتتى قورعاۋدىڭ ماڭىزدىلىعىن ءتۇسىندىرىپ ءجۇر. ولار جۇرتشىلىق اراسىندا قورشاعان ورتانىڭ تازالىعىن ساقتاۋ ءار ازاماتتىڭ مىندەتى ەكەنىن, مۇنداي ءىس-شارالار تەك سەنبىلىك كۇندەرى عانا ەمەس, كۇندەلىكتى ادەتكە اينالۋى كەرەكتىگىن ناسيحاتتايدى.
قىزىلوردا
