كورەيا جانە ورتا ازيا ەلدەرىنىڭ, سونداي-اق ەلىمىزدىڭ وزگە وڭىرلەرىنىڭ دەلەگاتسياسى قاتىسقان حالىقارالىق فورۋمدا تۇركىستان وبلىسىنىڭ ينۆەستيتسيالىق مۇمكىندىكتەرى تانىستىرىلدى. «قازاقستان مەن كورەيا اراسىنداعى ىنتىماقتاستىقتىڭ ماڭىزدى ناتيجەلەرىنىڭ ءبىرى – تۇركىستان وبلىسىندا قۋاتتىلىعى 926 مۆت بولاتىن بۋ-گاز ەلەكتر ستانتسياسى قۇرىلىسىنىڭ باستالۋى بولدى. اتالعان جوبا «Samruk-Kazyna» قورى مەن وڭتۇستىك كورەيانىڭ «Doosan Enerbility» كومپانياسىمەن بىرلەسىپ جۇزەگە اسىرىلۋدا. بۇل قازاقستاننىڭ ەنەرگەتيكا سالاسىنداعى ءىرى ينۆەستيتسيالاردىڭ ءبىرى. ءوزىنىڭ ستراتەگيالىق گەوگرافيالىق ورنالاسۋىنىڭ ارقاسىندا تۇركىستان وبلىسى ورتالىق ازياداعى ماڭىزدى كولىك-لوگيستيكالىق حاب ءرولىن اتقارادى. ءبىز وسى الەۋەتتى ينۆەستيتسيا تارتۋ, ەكسپورتتىق مۇمكىندىكتەردى ارتتىرۋ جانە شەتەلدىك سەرىكتەستەرمەن, سونىڭ ىشىندە كورەيامەن ەكونوميكالىق بايلانىستى نىعايتۋ ءۇشىن ءتيىمدى پايدالانۋعا دايىنبىز», – دەدى وبلىس اكىمى نۇرالحان كوشەروۆ. سونداي-اق وبلىس اكىمى جاڭا جوبالاردى جۇزەگە اسىرۋعا جان-جاقتى قولداۋ كورسەتىلەتىنىن ايتىپ, ۇزاقمەرزىمدى ىنتىماقتاستىققا سەنىم ءبىلدىردى.
سونىمەن قاتار فورۋمدا كورەيا رەسپۋبليكاسىنىڭ قازاقستانداعى ەلشىسى چجو تە يك, «GAROK» قاۋىمداستىعىنىڭ باس حاتشىسى يۋ مين بون, قىرعىزستان رەسپۋبليكاسى مينيسترلەر كابينەتى جانىنداعى مەملەكەتتىك قىزمەت جانە جەرگىلىكتى ءوزىن-ءوزى باسقارۋ ىستەرى جونىندەگى مەملەكەتتىك اگەنتتىكتىڭ جەرگىلىكتى ءوزىن-ءوزى باسقارۋدى دامىتۋ باسقارماسىنىڭ باسشىسى دجەەنباەۆ باكتىياربەك, «Woosong University Kazakhstan» ۋنيۆەرسيتەتىنىڭ ديرەكتورى چون يونگ حۆا ءسوز الىپ, سەرىكتەستىك ورناتۋعا دايىن ەكەندەرىن جەتكىزدى.
تۇركىستان وبلىسى – قازاقستانداعى جەتەكشى اگرارلىق وڭىرلەردىڭ ءبىرى. جىل سايىن جىلىجايلار مەن ەگىستىك القاپتارىنىڭ كولەمى ارتۋدا. سالاعا كورەيانىڭ جاساندى ينتەللەكت, روبوتوتەحنيكا جانە بيوتەحنولوگياعا نەگىزدەلگەن وزىق اگروتەحنولوگيالارىن, سونىڭ ىشىندە زاماناۋي «اقىلدى» جىلىجايلار سالۋ تاجىريبەسىن ەنگىزۋ جوسپارلانىپ وتىر. سونىمەن قاتار تۇركىستان قالاسىندا IT سالاسىنىڭ ماماندارىن دايىندايتىن Woosong ۋنيۆەرسيتەتىنىڭ فيليالىن اشۋ – ءوڭىردىڭ تسيفرلىق ترانسفورماتسياسىنا باعىتتالعان ماڭىزدى قادام. بۇل جوبا قازاقستان مەن كورەيا اراسىنداعى عىلىمي-ءبىلىم بەرۋ ىنتىماقتاستىعىن نىعايتا تۇسپەك.
ايتا كەتەيىك, وتكەن جىلى ەكى ەل اراسىنداعى ەكىجاقتى تاۋار اينالىمى 3,1 ملرد اقش دوللارىنا جەتتى. بۇگىنگى تاڭدا قازاقستاندا Hyundai, KIA, Samsung, LG, Doosan جانە باسقا دا 876 وڭتۇستىككورەيالىق كومپانيا تابىستى جۇمىس ىستەپ كەلەدى.
تۇركىستان
