فوتو: اشىق دەرەككوز
«جوبادا پروتەزدەۋ جانە تىستەردى يمپلانتاتتاۋ سياقتى ستوماتولوگيالىق قىزمەتتەرگە بىرجولعى زەينەتاقى تولەمدەرىن پايدالانۋ جونىندەگى نورمانى الىپ تاستاۋ كوزدەلەدى. شەشىم مەديتسينالىق قۇجاتتاردى فالسيفيكاتسيالاۋ جانە زەينەتاقى جيناقتارىن ماقساتسىز پايدالانۋدىڭ كوپتەگەن جاعدايلارىنا بايلانىستى», دەلىنگەن قۇجات جوباسىندا.
مينيسترلىكتىڭ حابارلاۋىنشا, ستوماتولوگيالىق قىزمەتتەرگە اقى تولەۋگە بەرىلگەن وتىنىشتەردى تالداۋ ناتيجەلەرى بويىنشا ازاماتتاردىڭ قاراجاتىنىڭ ءبىر بولىگى الاياقتىق سحەمالار ارقىلى بىرقاتار ەمحانالاردىڭ پايداسىنا الىنعان. وسىعان بايلانىستى بيىلعى جىلدىڭ 15 قىركۇيەگىنەن باستاپ مەديتسينالىق كومەكتىڭ وسى ءتۇرىن زەينەتاقى قورلارى ەسەبىنەن قارجىلاندىرۋعا وتىنىشتەردى قابىلداۋ توقتاتىلدى.
«وتباسى بانكىنىڭ اقپاراتى بويىنشا, 2021 جىلدان باستاپ 2025 جىلعى 20 تامىزعا دەيىنگى كەزەڭدە پلاتفورما ارقىلى enpf-otbasy.kz تەك «ستوماتولوگيالىق قىزمەتتەر» ماقساتى بويىنشا 757 ملرد تەڭگە سوماسىنا 795 424 ترانزاكتسيا جۇرگىزىلدى. تالداۋ كورسەتكەندەي, 222 ملرد تەڭگەدەن استام قاراجات توپ-20 ستوماتولوگيالىق كلينيكاعا جىبەرىلدى. نەگىزگى كلينيكالاردىڭ بولىگى قازاقستاننىڭ ءىرى قالالارىندا ورنالاسقان. اتالعان كەزەڭدە وتباسى بانكىنە 29 797 ءوتىنىم بەرىلدى, ونىڭ 88,3% - ى نەمەسە «ستوماتولوگيالىق قىزمەتتەر» ماقساتى بويىنشا 26 312 ءوتىنىم بەرىلگەن», دەلىنگەن حابارلامادا.
