فوتو: اشىق دەرەككوز
«بىلتىر ءبىزدىڭ تەرريتوريامىز ارقىلى جۇك تاسىمالداۋ كولەمى 1 ميلليارد توننادان استى. سونىمەن بىرگە ەلىمىزدىڭ ترانزيتتىك الەۋەتىن ارتتىرۋعا ءالى دە زور مۇمكىندىك بار. «سولتۇستىك – وڭتۇستىك» كولىك ءدالىزى پارسى شىعاناعى مەن وڭتۇستىك ازيا ەلدەرىنىڭ نارىعىنا تىكەلەي جول اشادى. ال «شىعىس – باتىس» ءدالىزى مەن قىتايدىڭ ء«بىر بەلدەۋ, ءبىر جول» جاھاندىق باستاماسى قازاقستاننىڭ ەۋرازياداعى نەگىزگى قۇرلىق جولى رەتىندەگى ءرولىن كۇشەيتە تۇسەدى», دەدى مەملەكەت باسشىسى.
قازاقستان ءۇشىن ترانسكاسپي كولىك باعىتىن دامىتۋدىڭ ماڭىزى ارتا باستادى. پرەزيدەنت اتاپ وتكەندەي, بۇل باعىتتاردىڭ ءبارى ءبىرتۇتاس جۇيە سياقتى جۇمىس ىستەپ, ەلىمىزگە ەداۋىر تابىس اكەلۋى كەرەك.
«سونداي-اق ينفراقۇرىلىمدى جاقسارتۋعا جاڭا ينۆەستيتسيا تارتۋى قاجەت, ساپالى جۇمىس ورىندارىن اشۋعا ىقپال ەتۋگە ءتيىس. وسى ورايدا, تسيفرلىق تاسىلدەردى اۋقىمدى تۇردە قولدانعان ابزال. ونسىز ەشقانداي تيىمدىلىك بولمايدى. وڭىرلەردىڭ كولىك بايلانىسىنا قاتىستى ماسەلەمەن مىقتاپ اينالىسۋ كەرەك. ءىرى ترانزيتتىك ايماق سانالاتىن قازاقستان ءۇشىن بۇل باعىت ايرىقشا ماڭىزدى», دەدى پرەزيدەنت.
ەستەرىڭىزگە سالا كەتەيىك, ءبىز تاياۋدا ۆەتنامعا قىتايدىڭ ليانيۋنگان پورتى ارقىلى بيدايدىڭ العاشقى لەگىن جونەلتتىك.
«اۋعانستاندا پاكىستان نارىعىنا شىعۋعا مۇمكىندىك بەرەتىن «تۋرگۋندي – گەرات» تەمىر جولىن سالۋ جوسپاردا بار. الايدا, جاڭا كولىك باعىتتارىنا جانە جاڭا نارىقتارعا جول اشاتىن مۇمكىندىكتەر مۇنىمەن شەكتەلمەيدى. الدا اتقارار شارۋا كوپ», دەدى مەملەكەت باسشىسى.
جالپى, الەمدە ترانزيت ءۇشىن باسەكە كۇشەيىپ بارا جاتىر. باسقا دا ارزان بالاما باعىتتار مەن جولدار ۇسىنىلىپ وتىر. پرەزيدەنت ترانزيتتىك تاسىمالدىڭ كولەمىن ارتتىرامىز دەسەك, ءبىز الدىن الا ارەكەت ەتىپ, ءاردايىم ءبىر قادام الدا بولۋىمىز كەرەكتىگىن ەسكە سالدى.
«تاعى دا قايتالاپ ايتارىم, ينفراقۇرىلىمدى جاڭعىرتۋ ءىسىن ودان ءارى جالعاستىرىپ, وسى سالاداعى وزىق ەل بولۋ ءۇشىن تسيفرلاندىرۋ مەن جاساندى ينتەللەكتىنى كەڭ اۋقىمدا پايدالانعان ءجون», دەدى قاسىم-جومارت توقاەۆ.
سونىمەن قاتار پرەزيدەنت ءوز سوزىندە بيىل ۇزىندىعى – 836 شاقىرىم بولاتىن «دوستىق – مويىنتى» تەمىر جولىنىڭ ەكىنشى جەلىسى ىسكە قوسىلاتىنىن اتاپ ءوتتى. جوبا وتە قىسقا مەرزىم ىشىندە جۇزەگە اسقان. بۇل جولدىڭ ءمان-ماڭىزى ەرەكشە, سەبەبى «شىعىس-باتىس» باعىتىنىڭ جۇك وتكىزۋ مۇمكىندىگىن ايتارلىقتاي ارتتىرادى.
«بىراق مۇنىمەن توقتاپ قالۋعا بولمايدى. ۇكىمەت «باقتى-اياگوز», «قىزىلجار-مويىنتى» جوبالارىن ۋاقىتىلى جۇزەگە اسىرۋعا ءتيىس. سەبەبى, اتالعان جوبالار ەلىمىزدەگى تەمىرجول جۇيەسىنىڭ تولىق قاڭقاسىن قالىپتاستىرادى», دەدى توقاەۆ.
