سولتۇستىك قازاقستاندا مەرەكەلىك مەدالدار تابىستالدى

پەتروپاۆل. 20 ناۋرىز. ءوڭىر باسشىسى ەرىك سۇلتانوۆ ەل پرەزيدەنتىنىڭ جارلىعىمەن  بەلگىلەنگەن “1941-1945 جىلدارداعى ۇلى وتان سوعىسىنداعى جەڭىسكە 70 جىل” بىرىڭعاي مەرەكەلىك مەدالىن ءبىر توپ سوعىس ارداگەرلەرى مەن تىل ەڭبەككەرلەرىنە سالتاناتتى جاعدايدا  تاپسىردى. بۇل تۋرالى اكىمدىكتىڭ ءباسپاسوز قىزمەتى حابارلادى. ۇلىستىڭ ۇلى كۇنى مەرەكەسى قارساڭىنداعى كەزدەسۋگە كوتەرىڭكى كوڭىل كۇيمەن كەلگەن ارداگەرلەر الدىندا ءسوز سويلەگەن وبلىس اكىمى: – ۇلى وتان سوعىسىنداعى اعا ۇرپاقتىڭ وشپەس ەرلىگى تاريحتا ماڭگى ساقتالادى. بۇگىن, ءبىز, سىزدەرگە, سوعىس ارداگەرلەرى مەن تىل ەڭبەككەرلەرىنە, اسقان ەرلىكتەرىڭىز, قاھارماندىقتارىڭىز بەن جان اياماس قايسارلىقتارىڭىز ءۇشىن قۇرمەت كورسەتە وتىرىپ, ۇلى جەڭىستىڭ 70 جىلدىعىنا ارنالعان مەرەكەلىك مەدالداردى تاپسىرعالى وتىرمىز, – دەدى. زال تورىنە شاقىرىلعان 27 ارداگەردىڭ ارقايسىسىنا مەرەكەلىك مەدالداردى ءوڭىر باسشىسى ەلباسى اتىنان تاپسىردى. مەرەكەلىك مەدال العانداردىڭ قاتارىندا سوعىس ارداگەرلەرى سەرگەي پرەسنياكوۆ, اناتولي گەرشۋنوۆ, ستەپان باشكيروۆ, ۆلاديمير ديادىك, تىل ەڭبەككەرلەرى ءالىمجان ءماجيتوۆ, ەسكەندىر نۇرىموۆ, جاقسىلىق ىسقاقوۆ, تاتيانا الەشينا جانە تاعى باسقالارى بولدى. ماراپاتتالعاندار اتىنان ءسوز العان جاقسىلىق ىسقاقوۆ پەن الەكساندر سەليششەۆ وزدەرىنىڭ ەل باسىنا قاتەر تونگەن كەزدە وتان ءۇشىن قان توككەن, تىلدا ايانباي ەڭبەك ەتكەن ەرلىك ىستەرى مەن ەڭبەكتەرىن باعالاپ, قۇرمەت كورسەتىپ وتىرعانى ءۇشىن مەملەكەت باسشىسىنا العىستارىن جەتكىزدى. ءومىر ەسقالي. دەرەك: سولتۇستىك قازاقستان وبلىسى اكىمدىگىنىڭ ءباسپاسوز قىزمەتى. سۋرەت: سولتۇستىك قازاقستان وبلىسى اكىمدىگىنىڭ ءباسپاسوز قىزمەتى.