2 قىركۇيەك كۇنى وسكەمەن قالاسىندا №31, №40, №41 مەكتەپتەر العاش رەت ەسىگىن ايقارا اشتى. سونىمەن قاتار گلۋبوكوە اۋدانىنىڭ بەلوۋسوۆكا اۋىلىنداعى №2 ورتا مەكتەبى مەن «وپىتنوە پولە» مەكتەبى, زايسان قالاسىنداعى «ساۋىر» ورتا مەكتەبى وقۋشىلاردى قابىلداي باستادى.
اتالعان جوبالار ءبىلىم بەرۋ ينفراقۇرىلىمىن دامىتۋ قورىنىڭ قولداۋىمەن جۇزەگە اسىرىلدى. ودان بولەك, ريددەر قالاسىندا 600 ورىندىق №12 مەكتەپتىڭ لەنتاسى سالتاناتتى تۇردە قيىلدى. اشىلۋ راسىمىنە وبلىس اكىمى نۇرىمبەت ساقتاعانوۆ قاتىستى. ءوڭىر باسشىسى سىنىپتاردى ارالاپ, ۇستازدار مەن وقۋشىلاردى ءبىلىم كۇنىمەن قۇتتىقتادى.
– مەملەكەت باسشىسى قاسىم-جومارت توقاەۆ ءبىلىم سالاسىنا نازار اۋدارىپ وتىر. ەل ەرتەڭى ءۇشىن اۋقىمدى جوبالار جۇزەگە اسىپ جاتىر. بۇگىنگى ۇرپاقتىڭ ءبىلىمدى ازامات بولىپ قالىپتاسۋى ءۇشىن بارلىق جاعداي جاسالۋدا, – دەدى وبلىس اكىمى نۇرىمبەت ساقتاعانوۆ.
قازىر ريددەردە «كازتسينك» كومپانياسىنىڭ قارجىلاندىرۋىمەن تاعى 600 ورىندىق مەكتەپتىڭ قۇرىلىسى ءجۇرىپ جاتىر. نىسان كەلەسى جىلى پايدالانۋعا بەرىلمەك. بۇدان بولەك, قۇنى 8,3 ملرد تەڭگەنى قۇرايتىن 200 ورىندىق جىل بويى جۇمىس ىستەيتىن بالالارعا ارنالعان دەمالىس ورتالىعىنىڭ جوباسى ازىرلەنۋدە. ريددەردە قوسىمشا 6 ءبىلىم نىسانىنا جوندەۋ جۇرگىزىلىپ جاتىر. بيىل روبوتتەحنيكا, بيولوگيا جانە فيزيكا باعىتىنداعى 3 جاڭا كابينەت ساتىپ الىنادى.
– ءبىلىم كۇنى قارساڭىندا وبلىسىمىزدىڭ جەر-جەرىندە جاڭا مەكتەپتەر اشىلدى. ەرتەڭگى بولاشاق ءۇشىن ەڭ اۋەلى وسى ءبىلىم سالاسىن جولعا قويۋىمىز كەرەك. ول باعىتتا ايتۋلى جۇمىس جۇرگىزىلىپ جاتىر. قۋانىشتىمىز, – دەيدى №41 مەكتەپتىڭ اتا-اناسى اينۇر ادىلبەكقىزى.
ايتا كەتەرلىگى, جاڭا وقۋ جىلى قارساڭىندا وبلىستاعى 319 مەكتەپ اسحاناسى تولىقتاي جوندەلىپ, بارلىق قالا مەن اۋدانداردا وقۋشىلاردىڭ تاماقتانۋ ساپاسىن باقىلاۋ توپتارى جۇمىسىن باستادى.
ءبىلىم سالاسىنداعى اۋىز تولتىرىپ ايتار جاڭالىقتىڭ تاعى ءبىرى, ۇلان اۋدانىنداعى بوزانباي ورتا مەكتەبىن ەرەكشە اتاپ وتۋگە بولادى. ول ەلىمىزدەگى ۇزدىك 100 مەكتەپتىڭ قاتارىنا ەندى. مەكتەپتە كۇردەلى جوندەۋ جۇرگىزىلىپ, ماتەريالدىق-تەحنيكالىق بازا جاڭارتىلدى. جاڭا وقۋ كابينەتتەرى, كىتاپحانا, تەلەستۋديا, STEM-زەرتحانا جانە زاماناۋي سپورت زالى اشىلدى.
«كەلەشەك مەكتەپتەرى» ۇلتتىق جوباسى – بالالاردىڭ كەڭ سىنىپتاردا ساپالى ءبىلىم الۋىنا, زاماناۋي سپورت زالدارىندا شىنىعۋىنا, IT-كابينەتتەر مەن زەرتحانالاردا جاڭا تەحنولوگيالاردى مەڭگەرۋىنە مۇمكىندىك جاسايدى.
شىعىس قازاقستان وبلىسى
