سونداي-اق, وندىرىسكە بىرقاتار جاڭا تەحنولوگيالار ەنگىزىلىپ, كاسىپشىلىك ىشىندەگى 300 شاقىرىم قۇبىر جاڭعىرتىلدى جانە اۆتوپاركتى جاڭارتۋدا جاقسى جۇمىستار ىسكە استى, كولىكتىك باسقارمالارداعى تەحنيكالاردى اۆتوبولشەكپەن قامتۋدىڭ ءتيىمدى ءادىسى ىسكە قوسىلدى, ءوندىرىستى اۆتوماتتاندىرۋ سالاسىندا ءبىراز تابىستار بار.
2009 جىلى قابىلدانعان, «وزەنمۇنايگاز» مۇنايشىلارىنىڭ الەۋمەتتىك-تۇرمىستىق جاعدايىن جاقسارتۋ باعدارلاماسى اياسىندا كاسىپورىن قۇزىرىندا قۇرىلىستار قارقىن الدى. مۇنايشىلار تاماقتاناتىن جاڭا اسحانالار سالىنىپ, قازىر مۇنايشىلاردىڭ اسحانالارى 100 پايىزعا جاڭاردى. سكۆاجينالاردى جەراستى جوندەۋ بريگادالارىنىڭ قىزمەتكەرلەرى ءۇشىن تەرموستىق جۇيەدە تاماقتاندىرۋ جولعا قويىلىپ, مۇنايشىلاردى اس-اۋقاتپەن قامتۋ ماسەلەسى تولىعىمەن شەشىلدى. باعدارلاما بويىنشا توپتىق قوندىرعى, سورعىلار ستانساسى قىزمەتكەرلەرى ءۇشىن جاڭا مادەني ۇيشىكتەر, وپەراتورلىق بلوكتار بوي كوتەرە باستادى.
بۇل نىسانداردا جۇمىسكەرلەردىڭ كيىم اۋىستىرۋىنا, جۋىنىپ-شايىنۋىنا, ازداپ تىنىعۋىنا تولىق جاعداي جاسالعان. بۇل باعىتتاعى جۇمىس 85 پايىزعا ەڭسەرىلدى دەپ ايتۋعا بولادى. كومپانياعا قاراستى مۇناي دايىنداۋ جانە وندىرىسكە قىزمەت كورسەتۋ باسقارماسى, №3 سكۆاجينالارعا قىزمەت كورسەتۋ باسقارماسى, حيميالاندىرۋ جانە ەكولوگيا باسقارمالارىندا اكىمشىلىك-تۇرمىستىق كەشەندەر, №3 مۇناي- گاز ءوندىرۋ باسقارماسىنىڭ جاڭا اكىمشىلىك عيماراتى ىسكە قوسىلدى. قىزىلساي اۋىلى مۇنايشىلارىنىڭ جۇمىسقا قاتىناۋى ءۇشىن 50 ورىندىق جاڭا اۆتوستانسا سالىنىپ, قالانىڭ وندىرىستىك ايماعىنان 1250 ورىندىق جاڭا اۆتوبەكەت پايدالانۋعا بەرىلدى. جىل سايىن جاڭاوزەن قالاسىنا 750 ميلليون, قاراقيا اۋدانىنا 150 ميلليون تەڭگە كولەمىندە قارجىلاي قولداۋ كورسەتەتىن مەكەمە اسفالت جول سالۋ, اباتتاندىرۋ, الەۋمەتتىك نىساندار سالىپ بەرۋ باعىتىنداعى جۇمىستاردى جالعاستىرىپ كەلەدى.
مۇناي باعاسىنىڭ ءتۇسۋى سالدارىنان بولۋى مۇمكىن جاعدايلاردى ەسەپتەپ, قيىندىقتان شىعۋ جولدارىن قاراستىرعان, جۇمىس ورىندارى مەن جالاقى كولەمىن قىسقارتپاۋعا تىرىسقان «وزەنمۇنايگاز» اق ءوز ىشتەرىندە جاسالىپ جاتقان جۇمىستاردىڭ باستاۋىن ەلدەگى تىنىشتىقتىڭ, ءبىر بولاشاق ءۇشىن جۇمىلعان اۋىزبىرلىكتىڭ ناتيجەسى دەپ بىلەدى. «وزەنمۇنايگاز» اق ۇجىمى ءساۋىر ايىندا وتەتىن ەل پرەزيدەنتى سايلاۋىنا قاتىستى باس قوستى. «وزەنمۇنايگاز» اق باس ديرەكتورى م.يباعاروۆ ءوزىنىڭ سوزىندە بىلاي دەدى: – قازاقستان پرەزيدەنتىنىڭ كەزەكتەن تىس سايلاۋىن وتكىزۋ – پاتريوتتىق اكت. سول سەبەپتى, ەلدىڭ تاعدىرىنا بەيجاي قارامايتىن ءاربىر ازامات ءوزى تاڭداعان كانديداتقا داۋىس بەرىپ, ماڭىزدى ساياسي شارادان شەت قالماۋى ءتيىس. ءبىز, مۇنايشىلار, جاڭاوزەندەگى جالعىز قالاقۇراۋشى الىپ كاسىپورىن رەتىندە وزگەلەرگە ۇلگى بولىپ, سايلاۋعا بەلسەندى قاتىسۋىمىز كەرەك دەپ ەسەپتەيمىن. ارنايى ۇندەۋ قابىلداعان ۇجىم قازاقستاندىقتاردى پرەزيدەنتتىك سايلاۋعا ءبىر كىسىدەي اتسالىسۋعا شاقىردى.
گۇلايىم شىنتەمىرقىزى, «ەگەمەن قازاقستان». ماڭعىستاۋ وبلىسى.
