«1995 جىلى بۇكىلحالىقتىق رەفەرەندۋمدا قابىلدانعان كونستيتۋتسيا – مەملەكەتتىلىكتىڭ بەرىك ىرگەتاسى. بىراق حالىقتىڭ جادىندا ءۇش جىل بۇرىنعى تاريحي رەفەرەندۋم ەرەكشە ساقتالىپ وتىر. سول كەزدە كونستيتۋتسيانىڭ ۇشتەن ءبىرى جاڭاردى. ارينە, ول كەزەڭدە جاڭا كونستيتۋتسيا قابىلدايىق دەگەن پىكىرلەر دە بولدى. زاڭ جۇزىندە دە, ساياسات تۇرعىسىنان دا قيسىندى ۇسىنىستار ەدى. بىراق مەملەكەت باسشىسى ساباقتاستىقتى تاڭدادى. ەگەر ولاي بولماعاندا, ءبىز قازىر 30 جىلدىقتى ەمەس, ءۇش جىلدىقتى اتاپ وتەر ەدىك», – دەدى ول.
سەناتوردىڭ ايتۋىنشا, سوڭعى ءۇش جىل ىشىندە كونستيتۋتسيا نەگىزىندە ەلىمىزدە اۋقىمدى وزگەرىستەر جۇزەگە اسىرىلدى.
«كونستيتۋتسيالىق سوت قۇرىلدى. پرەزيدەنت پارتيادان تىس مارتەبەگە يە بولدى. ماجوريتارلىق سايلاۋ جۇيەسى قايتا ورالدى. ادام قۇقىقتارىن قورعاۋ ينستيتۋتى كۇشەيدى. ءولىم جازاسىنا تۇبەگەيلى تىيىم سالىندى. بۇل – جاي عانا وزگەرىستەر ەمەس, قوعامنىڭ جاڭا داۋىرگە قادام باسقانىنىڭ ايعاعى», – دەپ اتاپ ءوتتى بيبىگۇل جەكسەنباي.
سونىمەن قاتار ول پرەزيدەنت قاسىم-جومارت توقاەۆتىڭ ءسوزىن مىسالعا كەلتىرىپ, حالىق ءۇشىن ەڭ ۇلكەن جەتىستىك رەتىندە جەردىڭ, جەر قويناۋى مەن تابيعي بايلىقتىڭ حالىق مەنشىگى بولىپ زاڭدا بەكىتىلگەنىن ەرەكشە اتاپ ءوتتى.
«جەر – حالىقتىكى» قاعيداسى – قازاق ءۇشىن ومىرلىك ماسەلە. بۇل – ەلدىڭ ار-نامىسى مەن بولاشاعى», – دەدى سەناتور.
ول سونداي-اق كونستيتۋتسيوناليزمنىڭ تابيعاتىنا توقتالىپ, ونى «قوزعالىستاعى جۇيە» دەپ سيپاتتادى. ونىڭ پىكىرىنشە, تسيفرلاندىرۋ, جاساندى ينتەللەكت, بيوتەحنولوگيالار مەن گەوساياسي وزگەرىستەر قۇقىق جۇيەسىنە جاڭا سىن-تەگەۋرىندەر اكەلىپ وتىر.
«بۇگىنگى كونستيتۋتسيانى قورعاۋ – ەرتەڭگى ۇرپاقتىڭ تاعدىرىن قورعاۋ. كونستيتۋتسيوناليزم ەشقاشان توقتاپ قالمايدى, ول زاڭ شىعارۋ ۇدەرىسىمەن بىرگە داميدى. ەندىگى مىندەت – تاۋەلسىزدىكتى قورعاپ, ۋاقىت تالابىنا ساي جاڭارىپ وتىرۋ», – دەدى بيبىگۇل جەكسەنباي.
