كونستيتۋتسيالىق سوت ءوز جۇمىسىن 2023 جىلعى 1 قاڭتاردا باستادى. كونستيتۋتسيالىق سوتتىڭ سۋدياسى ەركىن وڭعارباەۆتىڭ ايتۋىنشا, كونستيتۋتسيالىق سوتتىڭ بۇرىنعى كونستيتۋتسيالىق كەڭەستەن باستى ايىرماشىلىعى – ازاماتتاردىڭ تىكەلەي جۇگىنۋ قۇقىعىنىڭ پايدا بولۋى.
«بۇرىن مۇنداي قۇقىق بولماعان. 2023 جىلعى 1 قاڭتاردان وسى كۇنگە دەيىن كونستيتۋتسيالىق سوتقا كەلىپ تۇسكەن وتىنىشتەردى قاراساق, ازاماتتاردان 11 مىڭنان استام ءوتىنىش كەلىپ تۇسكەن. باسقا مەملەكەتتىك ورگانداردىڭ, پرەزيدەنتتىڭ, پارلامەنت دەپۋتاتتارىنىڭ وتىنىشتەرى بار. الايدا, 99%-ى – ازاماتتاردىڭ تىكەلەي وتىنىشتەرى. ارينە, بۇل — دەموكراتيالىق مەملەكەتتىڭ دامۋى جولىنداعى ۇلكەن سەرپىلىس. پرەزيدەنتىمىز ءجيى ايتاتىن ادىلەتتى قازاقستان يدەياسى – وسى كونستيتۋتسيالىق سوتتىڭ قىزمەتى ارقىلى دا ىسكە اسىپ جاتىر», دەدى ەركىن وڭعارباەۆ.
ونىڭ ايتۋىنشا, كونستيتۋتسيالىق سوتتىڭ قۇرىلۋى مەملەكەتتىك ورگانداردى تارتىپكە كەلتىرىپ, زاڭ شىعارۋ پروتسەسىنە, سونىڭ ىشىندە پارلامەنت پەن ۇكىمەت جۇمىسىنا اسەر ەتەدى.
«كونستيتۋتسيالىق سوت ءوز جۇمىسىن باستاعالى بەرى 74 نورماتيۆتىك قاۋلى قابىلدادى, ولاردىڭ باسىم بولىگى – ازاماتتاردىڭ كونستيتۋتسيالىق قۇقىقتارىن قورعاۋعا باعىتتالعان», دەپ ناقتىلادى كونستيتۋتسيالىق سوت سۋدياسى.
كونستيتۋتسيالىق سوت ءوز جۇمىسىندا حالىقارالىق قۇقىق قاعيداتتارىنا سۇيەنەدى جانە قۇقىق ارقىلى دەموكراتيا ءۇشىن ەۋروپالىق كوميسسياسىمەن (ۆەنەتسيا كوميسسياسى) تىعىز ىنتىماقتاستىق ورناتقان.
«1948 جىلى بۇۇ ادام قۇقىقتارىنىڭ جالپىعا بىردەي دەكلاراتسياسىن قابىلدادى. ەگەر كونستيتۋتسيامىزعا قارايتىن بولساق, وندا وسى ادام مەن ازاماتتىڭ نەگىزگى قۇقىقتارى مەن بوستاندىقتارىنىڭ بارلىعى دەرلىك ءبىزدىڭ زاڭنامامىزدا كورىنىس تاپقان. ءبىزدىڭ باستى ءرولىمىز – ادام قۇقىقتارىن, ولاردىڭ بولىنبەيتىن جانە ءابسوليۋتتى سيپاتىن كونستيتۋتسيالىق سوت ارقىلى قورعاۋ», دەدى ەركىن وڭعارباەۆ.
