ەڭ باستى جاڭالىق – باعاسى بۇرىنعى Tesla ۇلگىلەرىنە قاراعاندا ارزان. كومپانيا ونى تابىسى ورتاشا وتباسىلارعا قولجەتىمدى ەتۋدى جوسپارلاپ وتىر.
19 تامىز كۇنى Tesla قىتايدىڭ Weibo الەۋمەتتىك جەلىسىندە YL-ءدىڭ باعاسىن جاريالادى. جاڭا كولىك 339 مىڭ يۋان تۇرادى. بۇل شامامەن 25 ميلليون تەڭگە نەمەسە 47 مىڭ دوللار. اۆتوكولىك 2025 جىلدىڭ قىركۇيەگىنەن باستاپ ساتىلىمعا شىعارىلادى.
YL ۇلگىسى بۇرىنعى Y مودەلىنە قاراعاندا ءسال ۇلكەن – شامامەن 15 سانتيمەترگە ۇزىن. سەبەبى ءۇشىنشى قاتارعا قوسىمشا ورىندىق قويىلعان. ءبىر مارتە تولىق قۋاتتاعاندا, كولىك 751 شاقىرىمعا دەيىن جول جۇرە الادى.
ساراپشىلاردىڭ ايتۋىنشا, Tesla ەندى ارزان باعامەن قىتايدىڭ Li Auto كومپانياسىنىڭ L8 ۇلگىسىمەن جانە Huawei-ءدىڭ Aito M8 كولىگىمەن باسەكەلەس بولا الادى.
Tesla بۇل قادامعا جايدان-جاي بارعان جوق. سوڭعى ۋاقىتتا قىتايداعى سۇرانىس ازايىپ كەتكەن. مىسالى, كومپانيانىڭ شانحايداعى زاۋىتىنان شىققان كولىكتەر شىلدە ايىندا از ساتىلدى. سول سەبەپتى يلون ماسكتىڭ كومانداسى باعانى تومەندەتىپ, جاڭا ۇلگىلەر شىعارۋعا كىرىستى.
قازىر الەمدىك نارىقتا ەلەكتروموبيلدەر وتە كوپ. اي سايىن جاڭا ۇلگىلەر شىعىپ جاتىر. Tesla دا ارتتا قالماي, تۇتىنۋشىلارعا ىڭعايلى ءارى قولجەتىمدى كولىك ۇسىنۋدى كوزدەپ وتىر. تامىز ايىندا كومپانيا قىتايعا قۋاتى ۇزاققا جەتەتىن جاڭا سەدانىن تانىستىرعان ەدى.
