بۇگىندە قۇنى 1,3 ملرد تەڭگەنى قۇرايتىن نىساننىڭ 50 پايىزى دايىن. 11 شاقىرىم جەرگە سۋ قۇبىرى تارتىلىپ, قۇدىقتار ورناتىلىپ, سورعى ستانسالارى قۇرىلدى. سونداي-اق دانەكەرلەۋ جانە ەلەكتر-تەحنيكالىق جۇمىستار اياقتالدى. جوبا بەيىمبەت مايلين اۋدانىنىڭ بارلىق حالقىن اۋىزسۋمەن قامتۋعا مۇمكىندىك بەرەدى.
– بۇعان دەيىن ەلىمىزدە شامامەن 700 اۋىلدا اۋىزسۋ مۇلدە بولماعان. بۇگىندە پارتيامىزدىڭ تاباندى ۇستانىمىنىڭ ارقاسىندا بۇل باعىتتا ايتارلىقتاي ناتيجەگە قول جەتكىزدىك. ەرەكشە اتاپ وتەرلىگى, مەملەكەتتىك قوردان قوسىمشا قاراجات تارتىلدى. بۇعان دەيىن جەمقورلاردان تاركىلەنگەن قارجى تەك مەكتەپ قۇرىلىسىنا جۇمسالسا, ءبىز ونى حالىقتىڭ كۇندەلىكتى تۇرمىسىمەن تىكەلەي بايلانىستى جوبالارعا دا باعىتتاۋ قاجەتتىگىن كوتەردىك. سونىڭ ناتيجەسىندە ەلىمىزدىڭ جۇزدەگەن اۋىلىندا سۋ قۇبىرىن جۇرگىزۋ مۇمكىندىگى تۋدى. الدىمىزدا ءالى دە ۇلكەن مىندەتتەر بار. جاڭا سپورت زالدارىنىڭ, مادەنيەت ۇيلەرىنىڭ, وزگە دە الەۋمەتتىك نىسانداردىڭ سالىنۋىنا اتسالىسۋ قاجەت. ءبىز اكىمدىكتەر جانە ماسليحاتتارمەن بىرلەسە ءار تەڭگەنىڭ ماقساتتى جۇمسالۋىن قاتاڭ باقىلاۋدا ۇستايمىز, – دەدى ءماجىلىس توراعاسىنىڭ ورىنباسارى البەرت راۋ.
ال تۇركىستان وبلىسىنىڭ ساۋران اۋدانىنا قاراستى وراڭعاي اۋىلىندا پسيحونەۆرولوگيالىق اۋرۋلارى بار بالالارعا ارنالعان 50 ورىندىق وڭالتۋ ورتالىعىنىڭ قۇرىلىسى اياقتالۋعا جاقىن. وسىعان وراي ءماجىلىس دەپۋتاتى, «Amanat» پارتياسى فراكتسياسىنىڭ مۇشەسى ەرلان ابديەۆ نىساننىڭ قۇرىلىس جۇمىستارىن كورىپ قايتتى.
پارتيانىڭ سايلاۋالدى باعدارلاماسى اياسىندا بوي كوتەرىپ جاتقان ورتالىقتىڭ جالپى اۋماعى 9 مىڭ شارشى مەتردى قۇرايدى. وندا تۇرعىن بولمەلەر, جەكە جانە توپتىق وڭالتۋ ساباقتارىنا ارنالعان كابينەتتەر, ەمدىك دەنە شىنىقتىرۋ زالى, پسيحولوگ, پسيحياتر, نەۆرولوگ, لوگوپەد كابينەتتەرى, فيزيوتەراپيا بلوگى جانە اسحانا قاراستىرىلعان. سونىمەن قاتار مۇندا 3 پەن 18 جاس ارالىعىنداعى تىرەك-قيمىل اپپاراتى بۇزىلعان 50 بالاعا قىزمەت كورسەتىلىپ, جارتىلاي ستاتسيوناردا كۇندىزگى بولىمگە وسى اۋماققا جاقىن اۋدانداردان 30 بالا قابىلدانادى. جوبا قۇنى 3,2 ملرد تەڭگە.
مۇندا يپپوتەراپيا ادىسىمەن ەمدەۋدە وڭتۇستىك كورەيادان مەحانيكالىق ات جابدىعى الىنعان. ەلەكتروندى جابدىق ءار ەكى مينۋت سايىن ءتۇرلى جاتتىعۋ فورمالارىنا ەنەدى. جالپى, يپپوتەراپيانىڭ 10 ءتۇرلى ءادىسى قولدانىلادى. وڭالتۋ ورتالىعى كونستيتۋتسيانىڭ 30 جىلدىعى قارساڭىندا اشىلادى دەپ جوسپارلانعان.
– «كەدەرگىسىز ورتا» تۋرالى ايتقاندا, بۇل ابستراكتىلى ۇعىم ەمەس, ادامداردىڭ ءومىرىن ءدال قازىر وزگەرتەتىن ناقتى شەشىم ەكەنىن ءتۇسىنۋىمىز قاجەت. وراڭعايداعى وڭالتۋ ورتالىعى – ەرەكشە كۇتىمدى قاجەت ەتەتىن بالالاردىڭ اتا-انالارى ءۇشىن پەرزەنتىنىڭ كاسىبي كومەك الىپ, تولىققاندى ومىرگە قادام باسۋىنا دەگەن سەنىم. ەرەسەكتەر ءۇشىن – قوعامنان شەت قالماي, بەلسەندى ءومىر سۇرۋىنە مۇمكىندىك بەرەتىن قولداۋ, – دەدى ە.ابديەۆ.
دەپۋتاتتاردىڭ وڭىرلەرگە ءىسساپارى بارىسىندا اقمولا وبلىسى ەگىندىكول اۋدانىنىڭ تۇرعىندارى اۋىزسۋ, جولدىڭ ناشارلىعى, ەلدى مەكەندەگى توراپتاردىڭ سۋاستىندا قالۋىنا شاعىمداندى. ءوز كەزەگىندە ءماجىلىس دەپۋتاتى, «Amanat» پارتياسى فراكتسياسىنىڭ مۇشەسى يۋليا كۋچينسكايا سۋعا قاتىستى جوبالاردىڭ ىسكە اسىرىلۋىنا باقىلاۋدى كۇشەيتۋگە ۋادە بەرىپ, كەيىن نۇرا توپتىق سۋ قۇبىرىن جاڭعىرتۋعا ارنالعان كەڭەس وتكىزدى.
– ساپالى اۋىزسۋعا قول جەتكىزۋ – ءار ازاماتتىڭ زاڭدى قۇقىعى, بۇل ارتىقشىلىق ەمەس, ومىرلىك قاجەتتىلىك. ەگىندىكول اۋدانىندا كوپ جىلدان بەرى قوردالانعان ماسەلە پارتيامىز بەن مەملەكەتتىك ورگانداردىڭ جۇيەلى جۇمىسىنىڭ ارقاسىندا شەشىمىن تاۋىپ كەلەدى, – دەدى دەپۋتات.
جالپى, نۇرا توپتىق سۋ قۇبىرى وبلىستىڭ ءۇش اۋدانىن اۋىزسۋمەن قامتىپ وتىر. وعان 2023 جىلى اۋقىمدى جۇمىس جۇرگىزىلىپ, سابىندى اۋىلىنان ەگىندىكولگە دەيىنگى 68,5 شاقىرىمدىق بولىگى قايتا قالپىنا كەلتىرىلدى.
بيىل دا سۋ نىساندارىن جوندەۋگە, سورعىلاردى, ىسىرمالاردى جانە سۋ وتكىزەتىن قۇبىرلاردى اۋىستىرۋعا, ەسەپتەگىش قۇرالداردى ورناتۋعا قاراجات ءبولىندى. سونىڭ ارقاسىندا ەگىندىكول جانە پولتاۆكا اۋىلدارىندا سۋ مۇنارالارى جوندەلەدى. ال اباي, جۇلدىز جانە جالمانقۇلاق اۋىلدارىندا سۋدى تازارتۋعا ارنالعان بلوك-مودۋلدەر ورناتىلادى.
وسى جىلى كەمىندە 80 اۋىلدى اۋىزسۋمەن قامتۋ جوسپارلانعان. وسىلايشا, جالپى سانى 148 اۋىل تازا اۋىزسۋعا قول جەتكىزەدى. سونىمەن قاتار كوكشەتاۋ, قوسشى, ماكينسك جانە ەرەيمەنتاۋ قالالارىندا جانە اۋىلدىق وكرۋگتەردە جوبالار ىسكە اسىرىلىپ جاتىر. قازىرگى تاڭدا اقمولا وبلىسىندا ورتالىقتاندىرىلعان سۋمەن قامتۋدىڭ كورسەتكىشى قالالاردا – 99%, اۋىلداردا 96,6%-دى قۇرايدى.
