ەۋرووداق دەلەگاتسياسىمەن كەزدەستى

ادام قۇقىقتارى جونىندەگى ۋاكىل اسقار شاكىروۆ ەۋروپا وداعىنىڭ زاڭدىلىقتى ساقتاۋ جانە ادام قۇقىقتارى جونىندەگى باس ديرەكتورى ف. بۋايا باستاعان وسى وداق دەلەگاتسياسىمەن كەزدەستى. بولعان ءىس-شارانىڭ ماقساتى قازاقستانمەن, ەۋروپا كەڭەسى مەن ەۋروپالىق وداقپەن «قازاق­ستانداعى ءادىل سوت جۇيەسىنىڭ ساپاسى مەن تيىمدىلىگىن جاقسارتۋدى قولداۋ» اتتى ورتاق جوبانىڭ شەڭ­بەرىندە جۇزەگە اسىرىلاتىن 2015-2017 جىلدار كەزەڭىندەگى ەكىجاقتى ىنتىماقتاستىقتى تالقىلاۋ بولدى. كەزدەسۋدىڭ بارىسىندا ا. شاكىروۆ شەتەلدىك ارىپتەستەرىنە ۇلتتىق قۇقىق قورعاۋ مەكەمەسى قىزمەتىنىڭ تۇرلەرى مەن ادىستەرى, نەگىزگى باعىتتارى تۋرالى اقپارات بەردى. ادام قۇقىقتارى جونىندەگى ۋاكىل مەكەمەسى جوبانىڭ قاتىسۋشىسى بولعاندىقتان, ۋاكىل جوبانى جۇزەگە اسىرۋدى تولىقتاي قولدايتىنىن ءبىلدىردى. – ءبىزدىڭ تاجىريبەمىز قۇقىق قورعاۋشىلار اراسىنداعى كاسىبي الەۋەت پەن ءبىلىمدى ارتتىرۋ ادام قۇقىقتارى جونىندەگى جاعدايلاردى نىعايتۋدا شەشۋشى فاكتور بولىپ تابىلاتىندىعىن كورسەتەدى, – دەدى ا. شاكىروۆ. ونىڭ اتىنا كەلىپ تۇسەتىن شاعىمداردىڭ تورتتەن ءبىر بولىگىن سوت ارەكەتتەرىنە, سونداي-اق, قۇقىق قورعاۋ ورگاندارىنىڭ ارەكەتتەرىنە كەلىسپەۋ شاعىمدارى قۇرايتىن كورىنەدى. قازاقستاندىق ۋاكىلدىڭ ايتۋىنشا, باستالعان ارەكەتتەستىك ۇلتتىق قۇقىق قورعاۋ مەكەمەسىنىڭ الەۋەتىن ودان ءارى نىعايتۋعا كومەكتەسەدى, اسىرەسە, ول سوت تورەلىگى, حالىققا, ونىڭ ىشىندە حالىقتىڭ الەۋمەتتىك وسال توپتارىنا كورسەتىلەتىن مەملەكەتتىك قىزمەتتەردىڭ ساپاسىنا, سوت ادىلدىگىنە قول جەتكىزۋ سالاسىندا كورىنىس تابادى. شەتەلدىك ارىپتەستەرىمەن تاجىريبە الماسۋ جانە ينستيتۋتتىق مۇمكىندىكتەردى نىعايتۋ جونىندەگى ءىس-شارالار ماڭىزدى ءرول اتقاراتىن بولادى. ال ف. بۋايا قازاقستاندىق ۋاكىلدى جوبانىڭ نەگىزگى سەرىكتەسى دەپ بەلگىلەدى. ساياسي-قۇقىقتىق بىرەگەي ءرول, مەملەكەتتىك ورگاندار مەن ازاماتتىق قوعامنىڭ اراسىنداعى قاتىناستاردا مەديا­تور فۋنكتسياسى تاراپتاردىڭ الدىنا قويىلعان ماقساتتارعا ءتيىمدى قول جەتكىزۋگە مۇمكىندىك بەرەدى. «ەگەمەن-اقپارات».