ەرجان توقتاسىنوۆ العاشىندا اسكەري قىزمەتتە جۇمىس ىستەمەيمىن دەپ ويلاعان. بىراق تاعدىر جولى قايتا-قايتا شەكارا قىزمەتىنە الىپ كەلگەن.
ء«بىر اپايىمىزدىڭ ولەڭ جولدارى بار ەدى «تاعدىر تارتقان تاباقتان ءدام تاتاسىڭ, سەن ودان قۇتىلمايسىڭ قاشساڭ-داعى» دەگەن. مەن ءوزىمنىڭ وتان الدىنداعى بورىشىمدى شەكارا قىزمەتىندە اتقاردىم. سودان بۇل اسكەري قىزمەت مەنىكى ەمەس دەپ شەشتىم. ءبىراز ۋاقىتتان سوڭ وتباسىلىق جاعدايدىڭ تالابىنان با ەكەن وسى قىزمەتكە قايتادان كەلدىم. بۇل مەنىڭ تاعدىرىم ەكەنىن ءتۇسىندىم. اسكەري ەمەس قىزمەت جاسايمىن دەپ ويلاعانمىن. ارتىنان بۇل قىزمەتتى ماعان تاعدىردىڭ ءوزى سىيلاپ تۇرعانىن ءتۇسىندىم», دەيدى ول.
ونىڭ العاشقى قادامدارى شىعىس قازاقستان وبلىسىنداعى كۇرشىم باسقارماسىنان باستالعان. ءۇش جىل تاۋلى ايماقتاردا شەكارانى كۇزەتىپ شىڭدالعان مامان 2017 جىلدان بەرى استانادا قىزمەتىن جالعاستىرىپ كەلەدى.
ەفرەيتوردىڭ ايتۋىنشا, شەكاراشىنىڭ جۇمىسى تەك قۇجات تەكسەرۋمەن شەكتەلمەيدى. جولاۋشىلارمەن سۇحباتتاسۋ, ولاردىڭ نيەتىن انىقتاۋ, كۇدىكتى تۇلعالاردى تابۋ – بارلىعى ەرەكشە قىراعىلىقتى تالاپ ەتەدى.
ء«اربىر جولاۋشىمەن سويلەسىپ, سۇراقتار قويۋ ارقىلى ونىڭ شىنايى ماقساتىن بىلۋگە تىرىسامىز. پسيحولوگيالىق ادىستەردى دە قولدانامىز. سەبەبى ءبىزدىڭ مىندەت – نيەتى تەرىس ادامداردىڭ ەلگە كىرۋىنە جول بەرمەۋ», دەيدى ەفرەيتور.
ونىڭ ايتۋىنشا, بۇل قىزمەتتىڭ ەڭ قيىنى – ادامدارمەن تىكەلەي جۇمىس ىستەۋ. ءاربىر جولاۋشىنىڭ كوڭىلىنە قاراۋ, مادەنيەتتى قارىم-قاتىناس ورناتۋ قاجەت. سونىمەن قاتار, زاماناۋي قۇجاتتاردى ۇنەمى مەڭگەرىپ وتىرۋعا دا كوپ كۇش جۇمسالادى.
ەرجان ءوزىنىڭ ەڭ العاشقى جۇمىس كۇنىن, ءتىپتى ەڭ العاش تەكسەرىستەن وتكىزگەن جولاۋشىسىن دا ەسىندە ساقتاپ قالعان ەكەن.
«ەڭ العاش تەكسەرگەن جولاۋشىم ديپلومات ازامات بولدى. قۇجاتپەن جۇمىس ىستەپ ۇلگەرمەي, ۇزاق ۇستاپ قالعانىم بار. سول كىسىنىڭ ەسكەرتۋى ماعان ۇلكەن ساباق بولدى. سودان باستاپ جىلدام ءارى ەپتى بولۋعا تىرىستىم. سوڭىندا استانا شەكارا باقىلاۋ بەكەتى - مەنىڭ ومىرلىك ينتيتۋتىما اينالدى», دەپ ەسكە الادى ول.
ەرجان توقتاسىنوۆ ءۇشىن ارىپتەستەرىنىڭ ورنى بولەك. ول ولاردان كاسىبي شەبەرلىكتى, قۇجاتتاردى تەكسەرۋ ادىستەرىن, ءتىپتى ەر ازاماتقا ءتان ۇستامدىلىقتى ۇيرەنگەنىن ايتادى.
«قازىر قۇجاتتار زامانىنا ساي دامىپ جاتىر. سوندىقتان ءبىز دە جاڭا ءبىلىمدى ۇزدىكسىز يگەرىپ وتىرۋىمىز قاجەت. ءار ەلدىڭ قۇجاتى ءارتۇرلى. ءبىر ورىندا تۇرىپ قالۋعا بولمايدى», دەيدى ول.
ەفرەيتور توقتاسىنوۆ جاستاردى دا شەكارا قىزمەتىنە قىزىعۋشىلىقپەن قاراۋعا شاقىرادى.
«جاستاردىڭ شەكارا قىزمەتىنە قىزىعۋشىلىعىن ارتتىرۋ ءۇشىن ءبىراز جۇمىس جاساۋ كەرەك سياقتى. سەبەبى, قازىر كوبىنىڭ ساناسىنا تەز كوتەرىلۋ, تەز اقشا تابۋ دەگەن سياقتى ويلار كىرىپ العان. ايتسە دە وسى قىزمەتتى جانى قالايتىن جاستارىمىز دا جوق ەمەس. بىراق كوبى قاراجاتقا كەلىپ تىرەلەدى. قىزمەتىمىزدى كاسىبي جاعىن جاستارعا دارىپتەۋ كەرەك. ءبىر ەلدىڭ شەكاراسىن كۇزەتۋ, ەلدىڭ تىنىشتىعىن كۇزەتۋ دەگەن ۇلكەن مارتەبە, ابىروي. سونى مەملەكەت بولىپ جاس ۇرپاققا دارىپتەۋىمىز كەرەك», دەيدى ول.
اڭگىمەسىنىڭ سوڭىندا كەيىپكەرىمىز ارىپتەستەرىن مەرەكەمەن قۇتتىقتاپ, وتانعا دەگەن جىلى لەبىزىن ءبىلدىردى.
«تەك 18 تامىز عانا ەمەس, ءاربىر قىزمەتكە تۇسكەن كۇنىم مەن ءۇشىن مەيرامنان كەم ەمەس. وسى سالادا قىزمەت ىستەپ جۇرگەن ارىپتەستەرىمە ساتتىلىك تىلەيمىن. ەلىمىزدىڭ ءىشى داۋدان, سىرتى جاۋدان امان بولىپ, شەكارامىزدىڭ شەبى تىنىش بولسىن!», دەدى كەيىپكەرىمىز.
