استانا. 8 مامىر. قاراعاندى-تەمىرتاۋ باعىتىنداعى تاس جولدا Mercedes ماركالى كولىك كوپىردىڭ بەتون باعاناسىنا سوعىلىپ, جۇرگىزۋشىسى تىرىلەي ورتەنىپ كەتتى. بۇل تۋرالى tengrinews.kz حابارلادى.
جول-كولىك اپاتى ءدال مەرەكە كۇنى – 7 مامىردا ءتۇس كەزىندە بولعان. اپاتقا كۋا بولعان اناتولي ۆلاسوۆ ەسىمدى ازامات كولىكتىڭ كەنەتتەن جولدىڭ ءبىر جاعىنا قاراي بۇرىلىپ بارىپ, باعاناعا سوعىلعانىن ايتادى. «مەن Mercedes-ءتىڭ ارتىندا كەلە جاتقانمىن. سوققىدان كەيىن كولىك بىردەن جانىپ كەتتى. توقتاپ, جۇرگىزۋشىگە كومەكتەسپەك بولدىم. الايدا, جالىن دەمدە بۇكىل سالونعا جايىلدى. تەرەزەلەرىنەن ءتۇتىن بۋداقتاپ, كولىككە جاقىنداۋ مۇلدە مۇمكىن بولمادى. ءبىر كەزدە كولىك جارىلىپ كەتتى», – دەيدى اپاتتى ءوز كوزىمەن كورگەن اناتولي ۆلاسوۆ.
جول اپاتىنا كۋا بولعان جىگىت بىردەن ءورت سوندىرۋشىلەر مەن پوليتسيا قىزمەتكەرلەرىن شاقىرعان. قۇتقارۋشىلار ءورتتى سوندىرگەنىمەن ءبارى كەش ەدى. تەمىرتاۋ قالالىق ىشكى ىستەر باسقارماسى اكىمشىلىك پوليتسيا ءبولىمىنىڭ حابارلاۋىنشا, قازا بولعان جۇرگىزۋشىنىڭ جەكە تۇلعاسى ءالى انىقتالماعان.
اپات بولعان جەردە جۇمىس ىستەگەن جول-پاترۋلدىك پوليتسيا قىزمەتكەرلەرى Mercedes-ءتىڭ مەملەكەتتىك تىركەۋ ءنومىرى ارقىلى رولدە كىم بولعانىن انىقتاۋدا. قازىرگى تاڭدا بۇل دەرەك بويىنشا قىلمىستىق ءىس قوزعالىپ, تەرگەۋ امالدارى جۇرگىزىلۋدە. جول-پاترۋلدىك پوليتسيا قىزمەتكەرلەرى تاراتقان مالىمەتتەرگە سۇيەنسەك, قىلمىستىق ءىس اياسىندا ءورت-تەحنيكالىق جانە اۆتوتەحنيكالىق ساراپتامالار جۇرگىزىلەدى. «وسى ساراپتامالاردىڭ قورىتىندىسى جول اپاتىنا قاتىستى بارلىق سۇراقتارعا جاۋاپ بەرىپ, جاعدايدىڭ اق-قاراسىن انىقتايدى», – دەيدى پوليتسيا قىزمەتكەرلەرى.
ەلامان قوڭىر.
دەرەك, سۋرەت: tengrinews.kz.
