مەملەكەت باسشىسى ءبىلىم ساپاسى تاربيەمەن تىعىز بايلانىستى ەكەنىن ايتىپ, بۇل ەكى ۇعىمدى ءبىر-بىرىنەن بولۋگە بولمايتىنىن ەرەكشە اتاپ ءوتتى.
ء«بىلىم تاربيەمەن ۇشتاسقاندا عانا بەرەكەلى, ساپالى بولادى. ءبىلىم مەن تاربيە – كەز كەلگەن قوعامنىڭ قوس تۇعىرى. بۇل ەكەۋىن ءبىر-بىرىنەن ءبولىپ قاراۋعا بولمايدى. مەكتەپ – ءبىلىم مەن ءتالىم-تاربيەنىڭ كيەلى ورداسى. ۇلى اباي «ادام بالاسى ادام بالاسىنان اقىل, عىلىم, ار, مىنەز دەگەن نارسەلەرمەن وزباق» دەگەن. وسكەلەڭ ۇرپاقتى بىلىمپازدىققا باۋلۋ قانشالىقتى ماڭىزدى بولسا, ولارعا دۇرىس جول كورسەتۋ, باعدار بەرۋ دە سونشالىقتى ماڭىزدى. ءبىز جاستاردىڭ ادال ءارى ەڭبەكقور بولىپ وسۋىنە ەرەكشە ءمان بەرۋىمىز قاجەت. ۇل-قىزدارىمىز جاقسى مەن جاماننىڭ, اق پەن قارانىڭ اراسىن اجىراتا ءبىلۋى كەرەك», دەدى قاسىم-جومارت توقاەۆ
بيىلدان باستاپ ەلىمىزدىڭ بارلىق مەكتەپتەرىندە, سونىڭ ىشىندە جەكەمەنشىك ءبىلىم بەرۋ ۇيىمدارىندا «ادال ازامات» ءبىرتۇتاس تاربيە باعدارلاماسى ىسكە اسىرىلادى. پرەزيدەنت بۇل باستامانى پەداگوگ مامانداردى دايارلايتىن جوعارى وقۋ ورىندارىنا دا ەنگىزۋدى ۇسىندى.
«ۇلتتىق ءبىلىم سالاسىنداعى تاربيە جۇمىسىندا ءبىرتۇتاس جۇيە بولۋى كەرەك. جاس ۇرپاقتىڭ بويىنا جالپىۇلتتىق قۇندىلىقتاردى ءسىڭىرۋ قاجەت. ءاربىر جاس وتانشىل, جاسامپاز, جاڭاشىل, ءبىلىمپاز, ەڭبەكقور, ۇقىپتى, ۇنەمشىل بولىپ ءوسۋى كەرەك. سونداي ازاماتتار عانا مادەنيەتتى, قاۋىپسىز ءارى «زاڭ مەن ءتارتىپ» ۇستەمدىك قۇراتىن قوعامنىڭ ىرگەسىن قالاماق», دەيدى پرەزيدەنت.
قاسىم-جومارت توقاەۆ ۇرپاق تاربيەسىندە اتا-انا, مۇعالىم جانە مەملەكەتتىك ورگانداردىڭ بىرلەسە جۇمىس ىستەۋى قاجەت ەكەنىن اتاپ ءوتتى. ونىڭ ايتۋىنشا, بۇل – ورتاق جاۋاپكەرشىلىك.
«حالقىمىز «تاربيە تال بەسىكتەن باستالادى» دەپ بەكەر ايتپاعان. ۇرپاق تاربيەسىندە اتا-انا, مۇعالىم جانە مەملەكەتتىك ورگاندار بىرگە جۇمىس ىستەۋگە ءتيىس. سەبەبى, جاۋاپكەرشىلىك بارىنە – ورتاق. حاكىم اباي دا «ادامنىڭ ادامشىلىعى اقىل, عىلىم, جاقسى اتا, جاقسى انا, جاقسى قۇربى, جاقسى ۇستازدان بولادى» دەپ ايتقان.
«وتباسى – مەكتەپ – مەملەكەت» ۇشتىگى ۇيلەسىمدى بولسا, جاقسى ناتيجەگە جەتۋگە بولادى. ال بۇل ۇشتىكتىڭ وزەگىندە – ەڭبەكقورلىق يدەياسى بولۋعا ءتيىس. جاس ۇرپاققا ەڭبەكسىز ەشقانداي يگىلىك بولمايتىنىن ۇنەمى ءتۇسىندىرىپ ايتۋ كەرەك. قوعامدا ماسىلدىققا جول بەرمەۋ قاجەت. سەبەبى, بۇل جول تەك تىعىرىققا تىرەيدى», دەپ اتاپ ءوتتى ەل پرەزيدەنتى.
قاسىم-جومارت توقاەۆ «تازا قازاقستان» جالپىۇلتتىق اكتسياسىن تەك قورشاعان ورتانى قورعاۋ شاراسى عانا ەمەس, سونىمەن قاتار سانا تازالىعىن قالىپتاستىرۋدىڭ ماڭىزدى قادامى رەتىندە باعالادى.
«تازا قازاقستان» جالپىۇلتتىق اكتسياسى – وسى باعىتتاعى ناقتى شارانىڭ ءبىرى. مەن بۇعان دەيىن دە ايتتىم. تازا قازاقستان دەگەنىمىز – قورشاعان ورتانى تازا ۇستاۋ عانا ەمەس. ارينە, ول دا ماڭىزدى. سونىمەن بىرگە, بۇل – وي-سانا تازالىعى دەگەن ءسوز. جان-دۇنيەسى تازا ادام قايىرىمدى, مەيىرىمدى بولادى. قولى تازا ادام جەمقورلىققا بارمايدى, ادال بولادى. اسىل قاسيەتتەردى بويىنا سىڭىرگەن ناعىز ادال ازاماتتار ادىلەتتى قازاقستاننىڭ تىرەگى بولاتىنى ءسوزسىز», دەدى مەملەكەت باسشىسى.
