ء«بىلىم ساپاسىن جاقسارتا ءتۇسۋ قاجەت. قازىر عىلىم مەن ءبىلىم, تەحنولوگيا وتە جىلدام وزگەرىپ جاتىر. كەشە العان ءبىلىمىڭ ەرتەڭ وزەكتى بولماي قالۋى مۇمكىن. سوندىقتان مۇعالىمنىڭ بىلىكتى بولۋى – وتە ماڭىزدى ماسەلە. جوعارى وقۋ ورنىندا العان بىلىممەن شەكتەلىپ قالۋعا بولمايتىنى تۇسىنىكتى», دەدى پرەزيدەنت.
سونىمەن قاتار مەملەكەت باسشىسى ۇستازداردىڭ بالالاردىڭ وقۋعا زەيىنىن اشاتىن ءادىس-تاسىلدەردى جەتىك مەڭگەرۋ كەرەكتىگىن ايتتى.
«دامىعان مەملەكەتتەردە ءبىلىم بەرۋ سالاسى ۇلتتىق ەكونوميكانىڭ تىرەگى, قوزعاۋشى كۇشى ەكەنى بەلگىلى. سونداي ەلدەردىڭ تاجىريبەسىن زەرتتەگەن ءجون.بىراق باسقالاردىڭ بالا وقىتۋ ۇلگىسىن قۇر كوشىرىپ اكەلە سالۋعا دا بولمايدى. وزىق تاجىريبەنى ۇيرەنىپ, ونى ەلىمىزدىڭ بولمىسىنا بەيىمدەۋ كەرەك. جالپى, ءبىلىم بەرۋ ستاندارتتارىنا, وقىتۋ ادىستەمەسىنە, وقۋلىققا ەنگىزىلەتىن كەز كەلگەن وزگەرىستى وتە مۇقيات سارالاۋ قاجەت. سەبەبى, ءبىلىم سالاسىندا ەشقانداي قاتەلىككە جول بەرۋگە بولمايدى. ءبىر عانا قاتەلىكتىڭ سالدارى وتە اۋىر بولۋى مۇمكىن», دەدى قاسىم-جومارت توقاەۆ.
بۇعان قوسا, پرەزيدەنت قالا جانە اۋىل مەكتەبىندەگى ءبىلىم بەرۋ دەڭگەيىن تەڭەستىرۋدى ماڭىزدى مىندەت رەتىندە اتادى.
«سوڭعى ءتورت جىلدا 4 مىڭنان استام اۋىل مەكتەبىنىڭ ماتەريالدىق-تەحنيكالىق قورى جاڭعىرتىلدى. ونىڭ باسىم كوپشىلىگى – اۋىل مەكتەپتەرى. اۋىلداعى ءبىلىم وشاقتارىنا كۇردەلى جوندەۋ جۇرگىزىلىپ, جاڭادان كىتاپحانالار, اسحانالار مەن سپورت زالدارى سالىنىپ جاتىر. بۇل جۇمىس الداعى ۋاقىتتا دا جالعاسىن تابادى. بالانىڭ ءبارى – بىردەي. اۋىل بالاسى مەن قالا بالاسىنىڭ ءبىلىم الۋ مۇمكىندىگى دە بىردەي بولۋى كەرەك. «كەلەشەك مەكتەپتەرى» جوباسىنىڭ نەگىزگى ماقساتى دا – وسى», دەدى مەملەكەت باسشىسى.
