فوتولار: primeminister.kz
سالتاناتتى راسىمگە پرەمەر-ءمينيستردىڭ ورىنباسارى ەرمەك كوشەرباەۆ, عىلىم جانە جوعارى ءبىلىم ءمينيسترى ساياسات نۇربەك, مادەنيەت جانە اقپارات مينيسترلىگىنىڭ وكىلدەرى, تۇركى مادەنيەتى مەن مۇراسىن ساقتاۋ حالىقارالىق ۇيىمىنىڭ باسشىلىعى, ءوڭىر اكىمى عاۋەز نۇرمۇحامبەتوۆ, زيالى قاۋىم مەن قالا تۇرعىندارى قاتىستى.
«تاريحي تۇلعالاردى ۇلىقتاۋ – ءبىزدىڭ پارىزىمىز عانا ەمەس, ول – تاۋەلسىزدىكتىڭ رۋحاني تىرەگى, ۇلتتىق سانا-سەزىمنىڭ بەرىك ىرگەتاسى. ماعجان جۇماباەۆ سياقتى بىرەگەي تۇلعاعا ارنالعان ورتالىقتىڭ اشىلۋى – بۇكىل ەل ءۇشىن ماڭىزدى وقيعا. ماعجان: «مەن جاستارعا سەنەمىن» دەدى. بۇگىندە ونىڭ «باتىر بايان», «قورقىت» پوەمالارى, «پەداگوگيكا» وقۋلىعى جانە باسقا دا تۋىندىلارى جاس ۇرپاقتى وتانسۇيگىشتىككە, ەلگە ادالدىققا, جاۋاپكەرشىلىككە تاربيەلەۋدى جالعاستىرىپ كەلەدى. بۇل ورتالىق ماعجان رۋحىن جاستارعا جەتكىزىپ, ولاردى باتىل ويلاۋعا, ابىرويمەن ارەكەت ەتۋگە جانە تۋعان جەرگە ادال بولۋعا شابىتتاندىرادى», دەدى پرەمەر-ءمينيسترىنىڭ ورىنباسارى ەرمەك كوشەرباەۆ.
«ماعجان ورتالىعىنىڭ» ىشكى كەڭىستىگى اقىن تۇلعاسىنىڭ سان قىرىن جانە شىعارماشىلىق مۇراسىنىڭ اۋقىمىن ايقىن كورسەتەدى. مۇندا ماعجان جۇماباەۆتىڭ جۇمىس كابينەتى تۇرمىستىق زاتتارىمەن بىرگە قايتا جاسالدى. كونفەرەنتس-زال, زاماناۋي كىتاپحانا, مۇراعات قۇجاتتارىن زەرتتەۋ كابينەتى, «ماعجان» جۋرنالىنىڭ رەداكتسياسى جۇمىس ىستەيدى. ينتەلليگەنتسياعا ارنالعان شىعارماشىلىق الاڭ جانە «ماعجانتانۋ» ادەبي كلۋبى اشىلىپ, وندا كەزدەسۋلەر, پىكىرتالاستار, تاقىرىپتىق كەشتەر وتەتىن بولادى.
«وسىنداي ورتالىقتىڭ اشىلعانىنا شىن جۇرەكتەن ريزامىز. بۇل – ءبىز ءۇشىن عانا ەمەس, بولاشاق ۇرپاق ءۇشىن دە اسا ماڭىزدى. ۇلى تۇلعالارعا دەگەن قۇرمەت پەن ولاردىڭ مۇراسىن ناسيحاتتاۋ – ەلدىڭ دۇرىس باعىتتا كەلە جاتقانىنىڭ بەلگىسى», دەدى اقىننىڭ تۋىسى دۋلات بەكەنەۆ.
«ماعجان ورتالىعى» XIX عاسىردىڭ ساۋلەت ەسكەرتكىشى مارتەبەسىنە يە عيماراتتا ورنالاسقان. عيماراتقا كەشەندى رەستاۆراتسيا جۇرگىزىلىپ, XIX عاسىرداعى سيرەك كەزدەسەتىن الفرەيلى ورنەكتەر قالپىنا كەلتىرىلدى. ديزاينىن قر سۋرەتشىلەر وداعىنىڭ مۇشەسى بولات اسەربەكوۆ ازىرلەدى, ال جۇمىستار تۇركى مادەنيەتى مەن مۇراسىن ساقتاۋ قورىنىڭ قولداۋىمەن اتقارىلدى.
ورتالىق جانىندا جەرگىلىكتى كاسىپكەرلەر مەن تۇركيالىق مەتسەناتتىڭ باستاماسىمەن «ماعجان» ارت-كومپوزيتسياسى بار زاماناۋي سكۆەر سالىنعان.
ء«بىز, سولتۇستىكقازاقستاندىقتار ءۇشىن, ماعجان – تەك ۇلتتىق قازىنا عانا ەمەس, ءبىزدىڭ ءوڭىردىڭ ماقتانىشى. ونىڭ ەسىمى قازاقستاندا عانا ەمەس, ازەربايجان, وزبەكستان, قىرعىزستاندا, اسىرەسە تۇركيادا ەرەكشە قۇرمەتكە يە. «ماعجان ورتالىعى» تەك جەرگىلىكتى تۇرعىنداردىڭ ەمەس, ەلىمىزدىڭ تۇكپىر-تۇكپىرىنەن جانە شەتەلدەن كەلەتىن قوناقتاردىڭ دا سۇيىكتى ورنىنا اينالادى دەپ سەنەمىن», دەدى وبلىس اكىمى عاۋەز نۇرمۇحامبەتوۆ.
ورتالىقتىڭ اشىلۋى ۇلى اقىنعا دەگەن قۇرمەت, سونىمەن قاتار ەلدىڭ مادەني بىرەگەيلىگىن نىعايتۋ, ءتۋريزمدى دامىتۋ مەن قازاقستاندى حالىقارالىق ارەنادا رۋحاني-مادەني مۇرا ورتالىعى رەتىندە ىلگەرىلەتۋ جونىندەگى مەملەكەتتىك ساياساتتى جۇزەگە اسىرۋداعى ماڭىزدى قادام بولىپ وتىر.
