فوتو: bilim-all.kz
مەملەكەت باسشىسىنىڭ تاپسىرماسىمەن كاسپي تەڭىزىنىڭ ەكولوگيالىق ماسەلەلەرىن زەرتتەۋ ماقساتىندا قۇرىلعان عىلىمي-زەرتتەۋ ينستيتۋتىنىڭ (عزي) قىزمەت اياسىنا بالىق قورىنىڭ كولەمىن باعالاۋ, ولاردى ساقتاۋ ادىستەرى مەن تەحنولوگيالارىن ازىرلەۋ, يحتيوفاۋنانى زەرتتەۋ, يتبالىقتاردىڭ جاپپاي قىرىلۋ سەبەپتەرىن انىقتاۋ جانە ولاردىڭ پوپۋلياتسياسىن ساقتاۋ ماسەلەلەرى كىرەدى.
ۇكىمەتتىڭ ءباسپاسوز قىزمەتىنىڭ مالىمدەۋىنشە, بۇدان بولەك, تەڭىزدىڭ گيدرولوگيالىق ۇدەرىستەرىن زەرتتەۋگە جانە ونىڭ دەڭگەيىن باقىلاۋعا, كليماتتىڭ وزگەرۋىن جانە ونىڭ ەكوجۇيەگە اسەرىن تالداۋعا, سۋدىڭ ساپاسى, بيولوگيالىق الۋانتۇرلىلىك جانە كاسپي تەڭىزىنىڭ وتاندىق بولىگى مەن جاعالاۋىنىڭ وزگە دە پارامەترلەرى جونىندەگى دەرەكتەردى جيناۋ مەن تالداۋعا باعىتتالعان.
ۇكىمەت رەزەرۆىنەن بولىنگەن قاراجات ينستيتۋتتى ودان ءارى دامىتۋعا باعىتتالىپ, گيدروبيولوگيا جانە گيدروحيميا, گيدرومەتەورولوگيا, سپۋتنيكتىك مونيتورينگ زەرتحانالارىندا عىلىمي-زەرتتەۋ جۇمىستارىن ۋاقتىلى ءارى ءتيىمدى جۇرگىزۋگە, سونداي-اق ينستيتۋتقا جۇكتەلگەن وزگە دە مىندەتتەردى ورىنداۋعا مۇمكىندىك بەرەدى.
ايتا كەتەلىك, كاسپي تەڭىزى بىرەگەي ەكوجۇيە جانە سۋ بيورەسۋرستارىنىڭ اسا ماڭىزدى كوزى, سونداي-اق باتىس وڭىرلەر مەن جالپى ەلىمىزدىڭ تۇراقتى دامۋىنا ۇلكەن ۇلەس قوسادى.
كاسپي تەڭىزىنىڭ قازاقستان تاراپىنداعى جاعالاۋىنىڭ ۇزىندىعى 2320 شاقىرىم, بۇل بارلىق كاسپي ماڭى مەملەكەتتەرى اراسىنداعى ەڭ ۇزىن جاعالاۋ سىزىعى.
