فوتو: وبلىس اكىمىنىڭ ءباسپاسوز قىزمەتى
«جەتى ادامدى ءورت شىققان ۇيدەن الىپ شىققان باتىلدىقتارىڭىز قانداي قۇرمەتكە دە لايىق. سىزدەر جەدەل ارەكەت ەتۋ ارقىلى ۇلكەن اپاتتى جاعدايدىڭ الدىن الىپ, تۇتاس ءبىر وتباسىنىڭ ءومىرىن ساقتاپ قالدىڭىزدار. بۇل ەرلىككە تەڭ ءىس دەپ بىلەمىز. سىزدەردى ماقتان تۇتامىز», دەدى وبلىس اكىمىنىڭ ورىنباسارى م.كولباەۆ.
فەلدشەر عابيت ەرعاج وقيعانى بايانداپ بەردى.
«شاقىرتۋمەن جەتىسۋ اۋىلىنا بارىپ, ەندى جۇمىسقا قايتۋ ءۇشىن قارابۇلاققا قاراي بۇرىلماقشى ەدىك, جولدىڭ تەكەلىگە باراتىن وڭ جاق باعىتىندا ءتۇتىن شىعىپ جاتقانداي بولدى, ونى اۋەلى كولىك جۇرگىزۋشىسى بايقادى. سوسىن بۇرىلىپ, كورەيىك دەدىك. سول جەردەگى وقشاۋ ءبىر ۇيدەگى قاريانىڭ سوزىلمالى سىرقاتى بار ەدى دە, شاقىرتۋمەن ءجيى باراتىنبىز. راسىندا سول ۇيدەن ءورت شىعىپ جاتىر ەكەن. ۇيىقتاپ جاتقان ءۇي يەلەرىن وياتىپ, قۇجاتتارىن جىلدام جيناستىرىپ, 7 ادامدى تۇگەندەپ ۇيدەن الىپ شىقتىق», دەيدى ع.ەرعاج.
عابيت ەرعاجدىڭ جەدەل جاردەم قىزمەتىندە جۇمىس ىستەپ جۇرگەنىنە 8 جىل تولىپتى. ال داميرا راحيموۆانىڭ تالدىقورعان مەديتسينالىق كوللەدجىن ءتامامداپ, «جاستار پراكتيكاسى» باعدارلاماسىمەن جەدەل جاردەم ستانتسياسىندا تاجىريبەدەن ءوتىپ جۇرگەنىنە نەبارى ءۇش كۇن بولعان ەكەن. ال مۇرات ساتەكوۆتىڭ جەدەل جاردەم كولىگىن جۇرگىزگەنىنە 16 جىل تولعان. كەزدەسۋگە قاتىسقان وبلىستىق جەدەل جانە شۇعىل مەديتسينالىق جاردەم كورسەتۋ ستانتسياسىنىڭ ديرەكتورى ساۆەلي پاكتىڭ ايتۋىنشا, جەدەل جاردەم كولىگىنىڭ جۇرگىزۋشىلەرى العاشقى مەديتسينالىق كومەك كورسەتۋ تۇرعىسىندا ارنايى سەرتيفيكات العاندىقتان, تولىققاندى كومەك كورسەتە الادى.
