الماتىداعى قىزمەتى ەرەكشە ەمدەۋ مەكەمەسىنىڭ ءبىرى – ۇلى وتان سوعىسى ارداگەرلەرىنىڭ ەمحاناسى «مەملەكەتتىك كوممۋنالدىق قازىنالىق كاسىپورنى». اتى ايتىپ تۇرعانداي, ەمحانا سوعىس ارداگەرلەرىنە جانە ولارعا تەڭەستىرىلگەن تۇلعالارعا, سونىمەن قاتار اۋماقتىق تىركەلگەن تۇرعىندارعا مەديتسينالىق كومەك كورسەتەتىن قالالىق كەڭەستىك-دياگنوستيكالىق ورتالىق.
بيىل اتالمىش ەمدەۋ ورتالىعى اق سامايلى ارداگەرلەردىڭ دەنساۋلىقتارىن قاداعالاۋعا قاتىستى كەشەندى ءىس-شارالار جۇرگىزۋدە.
قازىرگى تاڭدا بۇل ەمحانانى مەديتسينا عىلىمدارىنىڭ دوكتورى قالدىباي ماديبرايىموۆ باسقارادى. ايتقانداي, ول كىسى گەرونتولوگيا سالاسىنداعى ناۋقاستاردىڭ دەنساۋلىعىن تەكسەرۋ مەن ەمدەۋدىڭ زاماناۋي تەحنولوگيالارىنىڭ باستاماشىسى ەكەنىن دە ايتا كەتۋگە بولادى. وسىعان وراي, ەمحانا گەرونتولوگتارى قالاداعى باسقا ەمحانالاردىڭ گەرونتولوگتارىمەن بىرلەسە وتىرىپ, جىل باسىنان بەرى اۋقىمدى اكتسيالاردى جۇزەگە اسىرۋدا. اشىق ەسىك كۇندەرىن وتكىزىپ, ەمحاناعا تىركەلگەن جاندارعا جان-جاقتى كومەك كورسەتىپ وتىر.
اتالمىش ەمحانانىڭ ونسىز دا اتقاراتىن جۇمىسى ارداگەرلەردى ەمدەۋ ەكەنى ايان. دەگەنمەن, بۇل ەمحانادا ەرەكشە احۋال ورنالاسقان. اۋرۋحانا دارىگەرلەرى ءاربىر ارداگەرگە ەرەكشە قۇرمەتپەن قارايدى, ەسىمدەرىن جاتقا بىلەدى, اتا-انالارى قاراعانداي قۇرمەت كورسەتىپ وتىرادى. ۇيلەرىنە ۇدايى حابارلاسىپ, تەلەفونمەن بولسا دا حال-جاعدايلارىن سۇراپ, قاجەت بولعان جاعدايدا ءوز وتباسىلارىندا دارىگەرلىك كومەك كورسەتەدى.
ال ەمحانا بيىل «وتان قورعاۋشى كۇنى» مەن جەڭىس كۇنىنە ارناپ جىل باسىنان بەرى جۇمىس ىستەپ كەلەدى. ماسەلەن, اقپان ايىندا ەمحانا گەرونتولوگتارى اۋەزوۆ اۋدانىندا تۇراتىن, بىراق ءوز بەتىنشە ءجۇرىپ-تۇرا المايتىن ارداگەرلەردىڭ ۇيلەرىن ارالاپ, قاجەتتى ءدارى-دارمەكتەرى بار قوبديشالارمەن جابدىقتاعان بولاتىن.
سول سياقتى ۇلى وتان سوعىسى ارداگەرلەرىنىڭ ەمحاناسىنىڭ بازاسىندا دوڭگەلەك ۇستەلدەر وتكىزىلىپ, گەرونتولوگتار جاسى ۇلعايعان پاتسيەنتتەردىڭ دەنساۋلىعىن ساقتاۋداعى ماڭىزدى ماسەلەلەرگە قاتىستى باياندامالار جاساپ, سوعىس ارداگەرلەرىنە سىي-قۇرمەتتەرىن دە كورسەتىپ وتىرۋ ادەمى ۇردىسكە اينالعان.
ەمحانادا ۇلى وتان سوعىسى ارداگەرلەرىنە جانە ولارعا تەڭەستىرىلگەن تۇلعالارعا, سونىمەن قاتار اۋماقتىق تىركەلگەن تۇرعىندارعا مەديتسينالىق كومەك كورسەتۋ ءۇشىن دارىگەرلەر بريگاداسى قۇرىلعان. قۇرامىندا تەراپەۆت, ستوماتولوگ, نەۆروپاتولوگ, حيرۋرگ, جالپىكلينيكالىق اناليزدەر مەن ەكگ جاسايتىن دارىگەرلەرى بار بريگادا كۇن سايىن ارداگەرلەرىن ىزدەپ, جولعا شىعادى.
وعان قوسا, كۇندىزگى ستاتسيونارلاردا دا ارداگەرلەرگە كومەك كورسەتىلىپ وتىرادى. اق سامايلى جاندار كەزەگىنە, دەنساۋلىعىنا قاراي «ارداگەر», «اققايىڭ», «الماتى», «قارعالى» ساناتوريلەرىندە ەمدەلەدى.
قىسقاسى, اتالمىش ەمحانادا اي سايىن ارنايى اۋقىمدى شارالار, كۇن سايىن ەمدەۋ جۇمىستارى ءجۇرىپ جاتىر. ماسەلەن, تەك ناۋرىز ايىندا 79 ادامعا 770 مىڭ تەڭگەگە تەگىن ستوماتولوگيالىق قىزمەت كورسەتىلگەن.
ايناش ەسالي, «ەگەمەن قازاقستان».
الماتى.
