ەلىمىزدە «قازاقستاندا جاسالعان» اكتسياسى باستالدى

استانا. 16 اقپان. «قازاقستان-2050» جالپىۇلتتىق قوزعالىسىنىڭ بەلسەندىلەرى «قازاقستاندا جاسالعان» رەسپۋبليكالىق اكتسياسىن جاريالادى. ول بويىنشا يگى ىستەر باستالىپ تا كەتتى. بۇل تۋرالى «قازاقستان-2050» جالپىۇلتتىق قوزعالىسىنىڭ ءباسپاسوز قىزمەتى حابارلادى. وسى ايدىڭ 11 كۇنى وتكەن ۇكىمەتتىڭ كەڭەيتىلگەن وتىرىسىندا مەملەكەت باسشىسى نۇرسۇلتان نازارباەۆ وتاندىق وندىرۋشىلەردى قولداۋعا شاقىردى. ءسويتىپ, «قازاقستاندا جاسالعان» جالپىۇلتتىق اكتسياسىن باستاۋدى ۇسىنعان ەدى. اكتسيا بارىسىندا ساۋدا جەلىلەرىندە ساتىلاتىن قازاقستاندىق ونىمدەر كوزگە بىردەن تۇسەردەي ەرەكشە كورسەتىلىپ قويىلادى. وتاندىق وندىرۋشىلەردىڭ تاۋارىن ساتىپ العىسى كەلەتىن ازاماتتارعا بۇل وتە قولايلى. «بارلىق قازاقستاندىقتاردى, بۇگىنگىدەي قيىن جاعدايدا, ءبىزدىڭ, قازاقستاندىق تاۋارلاردى ساتىپ الۋعا شاقىرامىن. بۇل قازاقستان ەكونوميكاسىنا قوسقان ۇلەسىمىز دەپ بىلەيىك», دەگەن بولاتىن ەلباسى. پرەزيدەنت ۇندەۋىنەن كەيىن «قازاقستان-2050» جالپىۇلتتىق قوزعالىسىنىڭ بەلسەندىلەرى بىردەن ءىرى دۇكەن جەلىلەرىمەن جانە وندىرۋشىلەرمەن كەلىسسوز جۇرگىزۋدى باستاپ كەتتى. قوعامدىق ۇيىمنىڭ اكتسيا وتكىزۋ تۋرالى ۇسىنىسىن العاشقىلاردىڭ ءبىرى بولىپ «ا2» سۋپەرماركەتتەر جەلىسى قولداپ, دۇكەندەرىنىڭ بىرىندە «قازاقستاندا جاسالعان» اكتسياسى باستاۋ الدى. ناتيجەسىندە, وندىرۋشىلەردىڭ ونىمدەرى ورنالاسقان ساۋدا سورەلەرىنىڭ تۇسىنا «قازاقستاندا جاسالعان» دەپ جازىلعان ءتۇرلى-ءتۇستى بەلگى-تاقتايشالار قويىلدى. بۇل قازاقستاندىق ءونىمدى ەرەكشەلەپ, ساتىپ الۋشىلار ءۇشىن تارتىمدىلىعىن ارتتىرادى. – جىلدار بويى ەلىمىز مەنى جانە مەن سياقتى مىڭداعان قازاقستاندىقتاردى قولداپ كەلدى. جوعارى ءبىلىم الىپ, بىلىكتىلىگىمىزگە ساي كوڭىلگە قونىمدى جۇمىس تاپتىق, وتباسىن قۇرىپ, قۋانىشقا بولەندىك. قازاقستانىمىزعا, ەلىمىزگە قولداۋ كورسەتەتىن كەزەك ەندىگى دە بىزگە كەلىپ وتىر. قازاقستاندىق ءونىمدى ساتىپ الۋ ارقىلى ءبىز تەك ەل ەكونوميكاسىنا عانا كومەكتەسىپ قويمايمىز, سونداي-اق وتاندىق كاسىپورىنداردا ەڭبەك ەتىپ جۇرگەن مىڭداعان ادامدارعا قولداۋ كورسەتەمىز. ولار ءبىزدىڭ ارقامىزدا جۇمىسىن جالعاستىرادى, وتباسىن اسىراپ, ۇرپاق وربىتەدى, دارىگەرلەر مەن مۇعالىمدەردىڭ ەڭبەكاقىسى ءۇشىن سالىق تولەيدى. ءبىز قازاقستاندىق ءونىمدى قاجەت بولعاندىقتان ەمەس, سولاي دۇرىس بولعاندىقتان ساتىپ الامىز, دەدى «قازاقستان-2050» جالپىۇلتتىق قوزعالىسى كەڭەسىنىڭ توراعاسى دانات جۇمين. بۇگىندە بەلسەندىلەر ەلىمىزدەگى بارلىق ءىرى ساۋدا جەلىلەرىمەن كەلىسسوزدەر جۇرگىزۋدە. «قازاقستاندا جاسالعان» دەگەن جازۋى بار بەلگىلەردى بۇكىل قازاقستاندىقتار جۋىق ارادا كورەدى دەگەن سەنىمدەمىز. نۇرباي ەلمۇراتوۆ. دەرەك: «قازاقستان-2050» جالپىۇلتتىق قوزعالىسىنىڭ ءباسپاسوز قىزمەتى. سۋرەت: «قازاقپارات».