قازاقستاننىڭ ترانزيتتىك الەۋەتى ارتا ءتۇستى

استانا. 16 اقپان. ەلىمىز «وزبەكستان-تۇرىكمەنستان-يران-ومان» حالىقارالىق ترانزيتتىك-كولىكتىك دالىزىنە قوسىلدى. بۇدان ەلىمىزدىڭ ترانزيتتىك الەۋەتى تاعى الدەنەشە ارتقانىن كورەمىز. بۇل تۋرالى «قتج» ۇك» اق-تىڭ ءباسپاسوز قىزمەتى حابارلادى. يران استاناسى – تەگەراندا «اشحاباد كەلىسىمىنە» قاتىسۋشى ومان سۇلتاناتى مەن يران, تۇرىكمەنستان, وزبەكستان رەسپۋبليكالارى وكىلدەرىنىڭ ۇيلەستىرۋ كەڭەسىنىڭ وتىرىسى ءوتتى. وعان قازاقستان دەلەگاتسياسىن «قازاقستان تەمىر جولى» ۇك» اق پرەزيدەنتى باستاپ باردى. وتىرىستا قازاقستان اۋماعى ارقىلى سولتۇستىك-وڭتۇستىك, شىعىس-باتىس ءىرى حالىقارالىق كولىك دالىزدەرىنىڭ وتەتىندىگىن باياندالدى. ەلىمىزدىڭ گەوگرافيالىق قولايلى ورنالاسۋى مەن ەۋرازيالىق قۇرلىقتاعى مۇمكىندىگى پاش ەتىلدى. قازاقستاننىڭ ستراتەگيالىق دامۋ باستاماشىلىعىندا ەلدى كولىك-لوگيستيكالىق حابقا اينالدىرۋ مەن ترانزيتتىك الەۋەتىن ارتتىرا ءتۇسۋدىڭ ماڭىزى زور. سوندىقتان, قازاقستان عالامدىق ەۋرازيالىق كولىك جۇيەسىن دامىتۋعا مول ۇلەس قوسىپ كەلەدى. قىتاي ەكونوميكاسىنىڭ دامۋىنا وراي جۇك اعىندارىن ورتا ازيا, يران جانە پارسى شىعاناعى ەلدەرىنە باعىتتاۋ, بۇرىنعى ءداستۇرلى تەڭىز جولىنان قۇرعاق جەر ارقىلى ترانسقۇرلىقتىق باعدارعا بۇرۋ قولايلى ەكەنى بايقالىپ وتىر. وسىنى مەڭزەگەن اسقار مامين ءوز سوزىندە, قازاقستاننىڭ اشحاباد كەلىسىمىنە قاتىسۋشى ەلدەرمەن قوسىلا وتىرىپ, قوسىمشا جۇك اعىندارىن تارتۋ الەۋەتىنىڭ مولدىعىن اتاپ كورسەتتى. ماسەلەن, اشحاباد كەلىسىمىنە قاتىسۋشى ەلدەردىڭ اراسىنداعى تەمىرجول كولىگى ارقىلى بىلتىر جۇك اينالىمى 2013 جىلمەن سالىستىرعاندا 2,3 ملن. تونناعا ارتىپ, 10 پايىزعا وسكەن. بارلىعى 25 ملن. توننا جۇكتى قۇراعان. ونىڭ 41 پايىزىن وسى ەلدەرگە قازاقستان اۋماعى ارقىلى وتكەن ترانزيتتىك ەكسپورتتىق جۇكتەر قۇراپتى. بۇيىرتسا, 2020 جىلعا قاراي اشحاباد كەلىسىمىنە قاتىسۋشى ەلدەر مەن قازاقستان ارقىلى وتەتىن جۇكتەر جىلىنا 40 ملن. تونناعا جەتكىزىلۋى مۇمكىن. وسىنى نىعارلاعان دەلەگاتسيا باسشىسى قازاقستاننىڭ «اشحاباد كەلىسىمىنە» قاتىسۋشى ەلدەرمەن حالىقارالىق كولىكتىك جانە ترانزيتتىك ءدالىزدى بىرلەسىپ پايدالانۋدان كوپ ءۇمىت كۇتىپ وتىرعاندىعىن جاسىرمادى. ءوز كەزەگىندە, مۇددەلەس ەلدەردىڭ وكىلدەرى قازاقستاننىڭ حالىقارالىق ترانزيتتىك كولىكتىك ءدالىزدى ودان ءارى دامىتۋعا قوسىلۋىن قۇپتادى. نۇرباي ەلمۇراتوۆ. دەرەك: «قتج» ۇك» اق-تىڭ ءباسپاسوز قىزمەتى. سۋرەت: egemen.kz.