ەكى قىزدىڭ ەسىمى بۇگىندە ەل كولەمىندە عانا ەمەس, حالىقارالىق دەڭگەيدە دە تانىلىپ كەلەدى. ولار دايىنداعان LikiSanktum اتتى شاعىن روبوت جوباسى Kazakhstan Smart Space 2025 حالىقارالىق بايقاۋىندا ۇزدىك دەپ تانىلدى. بۇل بايقاۋعا التى ەلدەن 60-تان استام كوماندا قاتىسقان.
جاس ونەرتاپقىشتاردىڭ روبوتوتەحنيكاعا قىزىعۋشىلىعى مەكتەپتەگى ۇيىرمەدەن باستالعان. عارىش تاقىرىبىنداعى بايقاۋ تۋرالى ۇسىنىستى قىزدارعا جاتتىقتىرۋشىسى نيكولاي اۆديۋنين بىلدىرگەن. بۇل ساتتەن باستاپ ولار عىلىمي ىزدەنىس پەن تەحنيكالىق جوبالاۋعا بەل شەشە كىرىسكەن.
ءسانيا مەن ەڭلىك باستاپقىدا جاي عانا كامەراسى بار قوندىرعى جاساۋمەن شەكتەلۋدى ەمەس, وزگەشە, بىرەگەي نارسە ويلاپ تابۋدى ماقسات ەتكەن. عارىش تۋرالى ادەبيەتتەر مەن زەرتتەۋ ەڭبەكتەرىن پاراقتاي كەلە, ولاردىڭ نازارى مارستىڭ استىنداعى لاۆالىق ارنالار مەن ۇڭگىرلەرگە اۋعان. بۇل كەڭىستىكتەر مارسقا قوناتىن عارىشكەرلەر ءۇشىن رادياتسيادان جانە قۇمدى داۋىلدان قورعان بولا الادى.
وسى يدەيا نەگىزىندە ولار جەردىڭ سەيسميكالىق زەرتتەۋ پرينتسيپىنە سۇيەنىپ, ارنايى روبوتتىڭ ماكەتىن جاساپ شىعارعان. روبوت توپىراققا ءدىرىل جىبەرەدى, ال قايتىپ كەلەتىن تولقىنداردىڭ سيپاتىنا قاراپ, استىنداعى بوس كەڭىستىكتەردى انىقتاۋعا مۇمكىندىك بەرەدى.
باستىسى – قىزدار بۇل روبوتتى تەك قاعاز بەتىندە قالدىرماي, ءوز قولىمەن جاساپ شىققان. جوبا بارىسىندا 3D-پرينتەردەن باستاپ, دانەكەرلەۋ قۇرىلعىلارى مەن توكار ستانوگىنا دەيىنگى ءتۇرلى قۇرال-جابدىقتاردى قولدانعان. ءسانيا جوبانىڭ 3D مودەلىن ازىرلەسە, ەڭلىك ەلەكترونيكا مەن باعدارلامالاۋ ۇدەرىسىن باسقارعان.
«ەلەكترونيكامەن جۇمىس ىستەۋ ماعان ەرەكشە ۇنايدى. ءاربىر سىمدى جالعاپ, بولشەكتەردىڭ ءبىرتۇتاس جۇيە رەتىندە قوزعالا باستاعان ءساتى – ەڭ اسەرلى ساتتەردىڭ ءبىرى بولدى», دەيدى ەڭلىك.
قىزدار روبوتتىڭ جۇمىسىن تەكسەرۋ بارىسىندا ءتۇرلى سىناقتار جۇرگىزىپ, ءتىپتى ادەيى كەدەرگىلەر جاساپ كورگەن. قازىرگى تاڭدا روبوتتىڭ مەحانيكالىق بولىگى تولىق تەكسەرىلگەن, ال جەر ءدىرىلىن تانيتىن سەنسورلار مەن تولقىندىق سيگنالداردى وڭدەيتىن جۇيە كەلەسى كەزەڭدە ەنگىزىلمەك.
وقۋشىلار كۇن سايىن تاڭەرتەڭنەن كەشكە دەيىن ساباققا قاتىسادى. بىراق عىلىمي جوبالارعا ۋاقىت تابا ءبىلۋ – ولاردىڭ ىشكى تالپىنىسىنىڭ, قاجىرلى ەڭبەگىنىڭ دالەلى. ءسانيا ءوزىن ءبىر ورىندا وتىرا المايتىن, ۇنەمى ارەكەتكە ۇمتىلاتىن ادام رەتىندە سيپاتتايدى. ال ەڭلىك ناقتى ءبىر سالادا تاجىريبە جيناۋ عىلىم جولىنداعى العاشقى دايىندىق دەپ بىلەدى.
