سولتۇستىك قازاقستان دەلەگاتسياسى ومبى وبلىسىندا بولدى

پەتروپاۆل. 16 اقپان. ايماق باسشىسى ەرىك سۇلتانوۆ باستاعان دەلەگاتسيا رەسەيدىڭ ومبى وبلىسىنا جۇمىس ساپارمەن بارىپ, بىرقاتار مەموراندۋمعا قول قويدى. بۇل تۋرالى وبلىستىق اكىمدىكتىڭ ءباسپاسوز قىزمەتى حابارلادى. ىسكەرلىك بايلانىستار بيرجاسىنىڭ اشىلۋ سالتاناتىندا سويلەگەن سوزىندە ومبى وبلىسىنىڭ گۋبەرناتورى ۆيكتور نازاروۆ بىرىڭعاي ەۋرازيالىق وداق قۇرامىنداعى قازاقستان مەنرەسەي اراسىنداعى دوستىق قارىم-قاتىناسقا ۇلكەن باعا بەرىپ, مۇنداي بايلانىستاردىڭ ماڭىزدىلىعىن اتاپ كورسەتتى. ەرىك حامزا ۇلى ءوز كەزەگىندە شەكارالىق ايماقتارعا سالىناتىن ينۆەستيتسيالىق قارجى كولەمىنىڭ ارتىپ كەلە جاتقانىن جەتكىزدى. بۇگىندە قوس وبلىستا 200-گە جۋىق بىرىككەن كاسىپورىن جۇمىس ىستەيدى. سولتۇستىك قازاقستان وبلىسى بۇدان بىلاي دا رەسەي فەدەراتسياسىنىڭ ساۋدا-ەكونوميكالىق قارىم-قاتىناسىندا باستى ارىپتەس بولىپ قالا بەرەدى. كورشى ەلدىڭ قىزىلجار وڭىرىندەگى سىرتقى ساۋدا بايلانىسى 70 پايىزدى قۇراسا, ونىڭ 50 پايىزى ومبى وبلىسىنا تيەسىلى. بارلىق سالالار بويىنشا بايلانىس نىعايىپ كەلەدى. ءسىبىر اۋىل شارۋاشىلىعى عىلىمي-زەرتتەۋ ينستيتۋتى مەن سولتۇستىك قازاقستان اۋىل شارۋاشىلىعى تاجىريبە ستانساسى جەر وڭدەۋ, استىق ءوندىرىسى, جاڭا سورتتاردى اۋدانداستىرۋ باعىتتارى بويىنشا ءوزارا كەلىسىم جاسادى. «اۆاگرو» جشس اۋىل شارۋاشىلىق تەحنيكالارىن ەسىلكول تاجىريبە ستانساسىنا جەتكىزۋگە ۋاعدالاستى. «دوڭگەلەك ۇستەل» باسىندا «قىزىل تۋدان» «رۋسسكايا پولياناعا» دەيىن تەمىرجول ۋچاسكەسىن قالپىنا كەلتىرۋ جايى تالقىلاندى. جەكەمەنشىك-مەملەكەت ارىپتەستىك اياسىندا قاراجات تارتۋ ۇسىنىسى قولداۋ تاپتى. وبلىس باسشىلارى ەكونوميكا, ونەركاسىپ, ءبىلىم, دەنە شىنىقتىرۋ جانە سپورت, دەنساۋلىق ساقتاۋ, مادەنيەت, اۋىل شارۋاشىلىعى سالالارى بويىنشا مەموراندۋمدارعا قول قويدى. دەلەگاتسيا مۇشەلەرى ءىرى كاسىپورىنداردى ارالاپ, وسىندا وقىپ جاتقان سولتۇستىكقازاقستاندىق ستۋدەنت-جاستارمەن كەزدەستى. ءومىر ەسقالي. دەرەك: سولتۇستىك قازاقستان وبلىستىق اكىمدىكتىڭ ءباسپاسوز قىزمەتى. سۋرەت: omskan.ru.