سولتۇستىك قازاقستاندا كۇزەتشى مەن ءبىر تابىن بۇزاۋ ورتەنىپ كەتتى

پەتروپاۆل. 16 اقپان. Cولتۇستىك قازاقستان وبلىسى اققايىڭ اۋدانى چەركاسسك ەلدى مەكەنىندە مال قورا ورتەنىپ, شارۋاشىلىققا ۇلكەن شىعىن كەلدى. بۇل تۋرالى egemen.kz ءتىلشىسى حابارلادى. اققايىڭ اۋدانى اۋماعىندا ورنالاسقان اۋىلداعى وسى اتتاس سەرىكتەستىك كوپ جىلدان بەرى مال شارۋاشىلىعىمەن شۇعىلدانىپ كەلەدى. كۇتپەگەن وقيعا تۇندە ورىن العان. قامىس قورا از ۋاقىتتىڭ ىشىندە قىزىل جالىنعا ورانىپ, تىپ-تيپىل بولعان. ايتىپ كەلمەگەن زوبالاڭنىڭ سالدارىنان 38 جاستاعى قايرات بەكتۇروۆ ەسىمدى كۇزەتشى مەن 80 بۇزاۋ ورتەنىپ كەتكەن. بۇل اقپاراتتى بىزبەن حابارلاسقان قايراتتىڭ تۋىسقانى ساۋلە جاكەنوۆا دا, باسقالار دا راستادى. مارقۇمنىڭ دەنەسى 14 اقپان كۇنى جەر قوينىنا بەرىلدى. بۇگىندە ءورتتىڭ شىعۋ سەبەپتەرى انىقتالۋدا. ول تۋرالى ءتۇرلى جورامالدار ايتىلۋدا. ءبىر تاڭقالارلىعى, شالعايداعى اۋىلدا ورىن العان قايعىلى وقيعا جونىندە ءباسپاسوز بەتتەرىندە ەشقانداي اقپارات جاريالانبادى. وبلىستىق توتەنشە جاعدايلار جونىندەگى دەپارتامەنتى ءباسپاسوز قىزمەتىنىڭ باس مامانى ەۆگەني جۋراۆلەۆكە تەلەفون سوققانىمىزدا باسشىلىقپەن سويلەسەيىن دەگەن كەيىپ تانىتىپ, قاشقالاقتادى. اققايىڭ اۋدانىندا مۇنداي وقىس جايتتار جيىلەپ كەتتى. بۇرناعى جىلى «جۇقپالى مال اۋرۋى شىقتى» دەگەن جەلەۋمەن شەتەلدەن اكەلىنگەن ءبىر مىڭعا تارتا اسىل تۇقىمدى سيىرلار مەن ويناق سالىپ جۇرگەن بۇزاۋلارعا ۋكول سالىپ, ولتىرىلگەن بولاتىن. ودان كەيىن سۋ مۇناراسى مەن ەلەۆاتور قۇلاپ, ادام ولىمىنە سوقتىرعان ەدى. ءومىر ەسقالي. دەرەك: egemen.kz. سۋرەت: news.nur.kz.