اقتوبەدە مەكتەپ بىتىرۋشىلەر كەشى ءوتتى

اقتوبە. 22 ماۋسىم. اقتوبە قالاسىنداعى قازاقستاننىڭ تۇڭعىش پرەزيدەنتى نۇرسۇلتان نازارباەۆ اتىنداعى ورتالىق مادەنيەت جانە دەمالىس ساياباعىندا «جاس تۇلەك-2015» اتتى مەكتەپ بىتىرۋشىلەردىڭ سالتاناتتى كەشى ءوتتى. بۇل تۋرالى egemen.kz ءتىلشىسى حابارلادى. سالتاناتتى شاراعا ارنايى قاتىسقان وبلىس اكىمى ارحيمەد مۇحامبەتوۆ تۇلەكتەرگە قۇتتىقتاۋ ءسوز ارنادى. «ەلىمىزدىڭ ەرتەڭى – جاستار. تاۋەلسىز ەلىمىزدىڭ بولاشاعى جارقىن, كوك بايراعىنىڭ بيىك بولۋى سىزدەرگە بايلانىستى. مەملەكەت باسشىسى نۇرسۇلتان نازارباەۆ اركەز جاستارعا قولداۋ كورسەتىپ, ۇلكەن سەنىم ارتىپ كەلەدى. ەلباسى «نۇرلى جول – بولاشاققا باستار جول» اتتى جولداۋىندا دا «نۇرلى جول – ءبىزدىڭ كرەاتيۆتى ىرعاقتى جاستارىمىزدىڭ كۇش-جىگەر جۇمساپ, قۇلاش سەرمەيتىن تۇسى» دەپ جاستارعا زور سەنىم ارتتى. بيىل قازاق حاندىعىنا 550, ۇلى جەڭىسكە 70, اتا زاڭىمىز بەن قازاقستان حالقى اسسابلەياسىنا 20 جىل تولعان ەرەكشە داتا. سوندىقتان سىزدەر تاۋەلسىز قازاقستاننىڭ, ماڭگىلىك ەلدىڭ ازاماتى رەتىندە الداعى ۋاقىتتا وتانىمىز ءۇشىن ادال قىزمەت ەتەدى دەپ سەنەمىن», – دەدى ارحيمەد بەگەجان ۇلى. ءوڭىر باسشىسى وبلىستا ءبىلىم سالاسىندا جاسالىپ جاتقان يگى ىستەر مەن قول جەتكەن جەتىستىكتەر جايىندا اڭگىمەلەدى. وقۋشىلارعا ساپالى ءبىلىم بەرۋ ءۇشىن از عانا ۋاقىت ىشىندە زامان تالابىنا ساي 37 جاڭا مەكتەپ سالىنعانىن, وقۋ جىلى باسىندا 5 جاڭا مەكتەپ پايدالانۋعا بەرىلسە, قازىر تاعى 13 ءبىلىم بەرۋ نىسانىنىڭ قۇرىلىسى ءجۇرىپ جاتقانىن تىلگە تيەك ەتتى. مەكتەپتەردىڭ ماتەريالدىق-تەحنيكالىق بازاسى دا نىعايىپ كەلە جاتقانىن, جاڭا موديفيكاتسيالى فيزيكا, حيميا, بيولوگيا بولمەلەرىمەن جابدىقتالىپ, بىرقاتار ءبىلىم بەرۋ ۇيىمى «e-learning» ەلەكتروندى وقىتۋ جۇيەسىنە قوسىلعانىن دا نازارعا الدى. ءبىلىم ساپاسىنىڭ باستى باعامى – ۇلتتىق بىرىڭعاي تەستىلەۋ قورىتىندىسىندا وبلىستىڭ ورتاشا كورسەتكىشى 82,68 باللدى قۇرادى. وبلىس رەسپۋبليكا بويىنشا ءتورتىنشى ورىنعا تابان تىرەدى. ءبىلىم ساپاسى جوعارى ءۇش اۋداندى ەرەكشە اتاۋ ورىندى. ولار: حرومتاۋ (95 بالل), العا (89 بالل), ويىل (86,8 بالل) اۋداندارى. اۋىل مەكتەپتەرىنىڭ اراسىندا حرومتاۋ اۋدانىنداعى بوگەتساي گيمنازياسى الدىڭعى قاتاردا تۇر: ورتاشا كورسەتكىش – 112,3 بالل. سونىمەن قاتار, مۇعالجار, شالقار, ىرعىز, ايتەكە بي اۋداندارىنىڭ دا ديناميكاسى جوعارى. وبلىس بويىنشا 156 تۇلەك – «التىن بەلگى» يەگەرى اتانىپ, 66 تۇلەك ۇزدىك اتتەستات الدى. سونداي-اق, 70 تۇلەك حالىقارالىق وليمپيادالاردىڭ جەڭىمپازى اتاندى. بۇدان سوڭ وبلىس اكىمى ۇبت-دا ەڭ جوعارى – 124 بالل جيناعان ءۇش تۇلەككە – راحيلا تۋلينا, نازكەن ۇمبەتوۆا, ايدانا تاڭىربەرگەندەرگە باعالى سىيلىقتار تابىس ەتتى. راحيلا تۋلينا مەن نازكەن ۇمبەتوۆا «التىن بەلگى» يەگەرلەرى اتاندى. ودان بولەك, ارحيمەد مۇحامبەتوۆ «التىن بەلگى» يەگەرى اتانعان تۇلەكتىڭ ارقايسىسىنا اتتەستات پەن پلانشەت بەردى. جيىن بارىسىندا وبلىستىق قازاق-تۇرىك ليتسەيىنىڭ تۇلەگى, «التىن بەلگى» يەگەرى يسلام مۇحاممەدراحىم تۇلەكتەر اتىنان وبلىس اكىمىنە, اتا-انالار مەن ۇستازدارعا العىسىن ءبىلدىردى. بۇدان كەيىن «التىن بەلگى» يەگەرلەرى وبلىس اكىمىمەن ەستەلىك سۋرەتكە ءتۇستى. ساتىبالدى ءساۋىرباي. دەرەك, سۋرەت: egemen.kz.