جاس وفيتسەرلەردى «وڭتۇستىك» وڭىرلىك قولباسشىلىعىنىڭ قولباسشىسى گەنەرال-مايور تالاپكەر امىرەەۆ العاشقى شەندەرىمەن قۇتتىقتاپ, الداعى اتقاراتىن قىزمەتتەرىنە توقتالدى. سونداي-اق قولباسشىلىقتىڭ باسشىلىق قۇرامىن تانىستىرىپ, ەل تىنىشتىعىن قورعاۋ جولىندا وزدەرىنە جۇكتەلگەن مىندەتتى ابىرويمەن اتقارۋىنا سەنىم ءبىلدىردى.
- ۇلتتىق ۇلان وفيتسەرى قاتارىنا قوسىلعان قۇقىقتىق ءتارتىپ اسكەرىنىڭ كەلبەتىن قالىپتاستىرۋشى جاس وفيتسەرلەر, ۇلكەن ومىرگە قادام باسۋلارىڭىز قۇتتى بولسىن! بۇگىنگى تاڭدا وفيتسەرلىك قۇرام زامانعا ساي بىلىكتى, ءبىلىمدى ءارى ءوز ءىسىنىڭ شەبەرى بولۋى ءتيىس. ۇلتتىق ۇلان وفيتسەرلەرىنىڭ بويىندا وسىنداي قاسيەتتەر بار. دەسە دە, جەكە قۇرامدى باسقارۋ ەكىنىڭ ءبىرىنىڭ قولىنان كەلە بەرمەيتىن ءىس. ول ءۇشىن وزدەرىڭدەي جاس تۇلەكتەر تاباندى ەڭبەك ەتىپ, كاسىبي بىلىكتىلىگىن ۇدايى ارتتىرىپ وتىرۋى كەرەك, - دەدى گەنەرال-مايور تالاپكەر امىرەەۆ.
جاس لەيتەنانتتار الماتى, شىمكەنت, تۇركىستان, تاراز, قىزىلوردا, تالدىقورعان قالاسىندا جانە الماتى وبلىسى الاتاۋ قالاسىنداعى زارەچنىي ىقشام اۋدانىندا ورنالاسقان اسكەري بولىمدەردە اۆتوموبيل جانە تىل قىزمەتىنىڭ باستىعى, روتا كومانديرىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى, ۆزۆود كومانديرى لاۋازىمدارىندا قىزمەت اتقاراتىن بولادى.
- بۇل مەن ءۇشىن ۇلكەن جاۋاپكەرشىلىك. ۇلتتىق ۇلان وفيتسەرى اتانۋ – تەك اسكەري شەن ەمەس, بۇل – حالىقتىڭ سەنىمىن اقتاۋ, مەملەكەتتىڭ تىنىشتىعى ءۇشىن قىزمەت ەتۋ دەگەن ءسوز. العاشقى وفيتسەرلىك قىزمەتىمدى شىمكەنتتەگى 6698 اسكەري بولىمىنەن باستاعالى وتىرمىن. مەملەكەتتىڭ كورسەتىپ جاتقان قامقورلىعىنا ريزاشىلىعىمدى بىلدىرگىم كەلەدى. قوعامدىق ءتارتىپتى ساقتاپ, وتان يگىلىگى ءۇشىن لايىقتى قىزمەت ەتۋگە ءاردايىم دايىنمىن, - دەيدى جاس وفيتسەردىڭ ءبىرى لەيتەنانت زۋحريدين ساۋتوۆ.
قىزمەت ورىندارىنا اتتانباس بۇرىن ۇلتتىق ۇلان اكادەمياسىنىڭ تۇلەكتەرى ءۇشىن وقۋ-ادىستەمەلىك جيىن ۇيىمداستىرىلعان. جيىن بارىسىندا تۇلەكتەردىڭ قىزمەتتىك-جاۋىنگەرلىك قولدانۋ تاكتيكاسى, جالپى اسكەري جارعىلار, اسكەري پەداگوگيكا مەن پسيحولوگيا, تەحنيكالىق جانە دەنە دايىندىعى بويىنشا بىلىمدەرى مەن ماشىقتارى تەكسەرىلدى. بۇل كەزەڭ ولاردىڭ كاسىبي قىزمەتكە تولىق دايىن ەكەندىكتەرىن باعالاۋعا مۇمكىندىك بەردى.
ايتا كەتەيىك, بيىل قازاقستان رەسپۋبليكاسىنىڭ ۇلتتىق ۇلان اكادەمياسىن 200-گە جۋىق تۇلەك ءبىتىردى. قازاقستاندىق تۇلەكتەرمەن بىرگە تاجىكستان رەسپۋبليكاسىنىڭ ءتورت وكىلى ديپلوم العان.
