قاتىسۋشىلار ەكى تاقىرىپتىق سەسسيا بارىسىندا جەرگىلىكتى باستامالاردى قولداۋ جانە جەرگىلىكتى ءوزىن-ءوزى باسقارۋدى دامىتۋ ماسەلەلەرىن, سونداي-اق مەملەكەتتىك الەۋمەتتىك تاپسىرىس جانە ۇكىمەتتىك ەمەس ۇيىمدارمەن ءىس-قيمىل سالاسىنداعى زاڭنامانى جەتىلدىرۋ تاسىلدەرىن تالقىلادى. ءىس-شاراعا مەملەكەتتىك ورگان مەن ازاماتتىق قوعام وكىلدەرى, ساراپشىلار مەن ۇەۇ مۇشەلەرى قاتىستى.
«ۇلتتىق قۇرىلتاي وتىرىستارىندا پرەزيدەنت ازاماتتىق بەلسەندىلىكتى تۇراقتىلىقتىڭ نەگىزى دەپ بىرنەشە مارتە اتاپ ءوتىپ, مەملەكەت پەن قوعام اراسىنداعى بايلانىستى جاڭا ساپاعا كوتەرۋ قاجەتىن العا تارتتى. سونداي-اق مەملەكەت باسشىسىنىڭ باستاماسىمەن 2026 جىل «حالىقارالىق ەرىكتىلەر جىلى» دەپ جاريالاندى. بۇل – ۆولونتەرلەر قوزعالىسىن حالىقارالىق دەڭگەيگە شىعارۋدىڭ بىرەگەي مۇمكىندىگى», دەدى مادەنيەت جانە اقپارات ۆيتسە-ءمينيسترى ايزادا قۇرمانوۆا.
جيىندا قازاقستاندىق قوعامدىق دامۋ ينستيتۋتىنىڭ باسقارما توراعاسى نۇربەك ماتجاني مەملەكەت باسشىسىنىڭ ساياسي رەفورمالارى تۋرالى پىكىرىن ورتاعا سالدى.
«كەيىنگى جىلدارى ەلدە تەرەڭ ءارى تۇراقتى وزگەرىستەر بولىپ, بيلىك قۇرىلىمىمەن قاتار قوعام دامۋىنىڭ نەگىزى دە جاڭاردى. 2022 جىلى مەملەكەت باسشىسى ءوز جولداۋىندا اۋقىمدى ساياسي جاڭعىرۋ باعدارلاماسىن جاريالاپ, ىرگەلى وزگەرىستەرگە جول اشتى. پرەزيدەنت قولىنداعى شەكتەن تىس بيلىكتەن باس تارتقانى, سۋپەرپرەزيدەنتتىك باسقارۋ ۇلگىسىنەن ىقپالدى پارلامەنتى, ەسەپ بەرەتىن ۇكىمەتى بار پرەزيدەنتتىك رەسپۋبليكاعا كوشكەنى – رەفورمالاردىڭ ىرگەتاسى بولدى. وسىدان ءۇش جىل بۇرىنعى رەفەرەندۋم ناتيجەسىندە كونستيتۋتسيانىڭ ۇشتەن ءبىر بولىگى وزگەرتىلدى. كەيىننەن ونداعان زاڭ مەن كودەكسكە تۇزەتۋلەر ەنگىزىلدى. وسى وزگەرىستەر ارقىلى بيلىك تارماقتارىنىڭ اراسىندا تەپە-تەڭدىك ورناتىلعان, زامان تالاپتارىنا ساي جانە سىن-قاتەرلەرگە بەيىمدەلگەن جاڭا مەملەكەتتىك باسقارۋ ۇلگىسى قالىپتاستى», دەدى ققدي باسقارما توراعاسى نۇربەك ماتجاني.
قازىرگى زامانعى ساياسات ينستيتۋتىنىڭ ديرەكتورى سەرگەي كونوۆالوۆ ازاماتتىق سانانى جاڭعىرتۋ مەن مەملەكەتتىك باسقارۋدىڭ تيىمدىلىگىن ارتتىرۋداعى ۇكىمەتتىك ەمەس ۇيىمداردىڭ رولىنە توقتالدى.
«ساياسي رەفورمالار مەن جالپىۇلتتىق ماقساتتاردىڭ وڭىرلىك دەڭگەيدە جۇزەگە اسۋىن تالقىلاۋ – بۇگىنگى رەفورمالار اياسىندا وزەكتى ماسەلە. ازاماتتىق سانانىڭ وڭىرلەردە قانشالىقتى تەز وزگەرەتىنى باستى نازاردا بولۋى كەرەك. بۇل رەتتە ۇكىمەتتىك ەمەس ۇيىمداردى مەملەكەتتىك باسقارۋعا بەلسەندى تارتۋ ماڭىزدى. ولار جوعارى قۇزىرەتكە جانە بەلسەندىلىككە يە. سونداي-اق مەملەكەتتىك قىزمەتكەرلەردى سالالىق ۇەۇ-دا تاعىلىمدامادان وتكىزۋ كادر دايارلاۋدىڭ ءتيىمدى جولى بولۋى مۇمكىن», دەدى ساراپشى.
باسقوسۋدا باسقا دا قاتىسۋشىلار بايانداما جاساپ, تالقىلانعان ماسەلەلەرگە قاتىستى ءوز ويىن ايتىپ, سۇراق-جاۋاپ الماستى.
