«ورتالىق ازيا – قىتاي» II يندۋستريالىق-ينۆەستيتسيالىق ىنتىماقتاستىق فورۋمى اياسىندا اقمولا وبلىسىنىڭ اكىمى مارات احمەتجانوۆ قىتايدىڭ بىرقاتار مەملەكەتتىك كومپانيالارىنىڭ وكىلدەرىمەن كەزدەسۋلەر وتكىزدى. كەزدەسۋلەر بارىسىندا ءوزارا سەرىكتەستىك پەن ينۆەستيتسيالىق جوبالاردى جۇزەگە اسىرۋ ماسەلەلەرى تالقىلاندى.
اتاپ ايتقاندا, ءوڭىر باسشىسى جەل گەنەراتورلارىن ءوندىرۋ جانە جەل ەلەكتر ستانتسيالارىن سالۋ سالاسىنا ماماندانعان Windey Energy Technology Ltd. Co كومپانياسىنىڭ باسشىلىعىمەن كەلىسسوز جۇرگىزدى. تاراپتار ءوڭىر اۋماعىندا جەل ەلەكتر ستانتسياسىن سالۋ جوباسىن جۇزەگە اسىرۋ مۇمكىندىگىن قاراستىردى. قىتايلىق تاراپ ارشالى اۋدانىندا تۋربينالار ورناتىلعانىن جانە جوبانى كەڭەيتۋگە مۇددەلى ەكەنىن جەتكىزدى. قازىرگى ۋاقىتتا ءوندىرىستى جەرگىلىكتەندىرۋ, جەلىگە قوسىلۋ جانە تەحنيكالىق توراپتاردى انىقتاۋ ماسەلەلەرى پىسىقتالۋدا. جاقىن ارادا تاراپتار ارشالى جانە ەرەيمەنتاۋ اۋداندارىنداعى الەۋەتتى الاڭداردى ەگجەي-تەگجەيلى زەردەلەمەك.
وبلىس اكىمى قىتايدىڭ ءداستۇرلى جانە بالامالى ەنەرگەتيكا سالاسىنداعى ءىرى وندىرۋشىلەرىنىڭ ءبىرى – State Power Investment Corporation كومپانياسىنىڭ باسشىلىعىمەن كەزدەستى. دەلەگاتسيانى Shanghai Electric Power Co., Ltd. كومپانياسىنىڭ باس ديرەكتورى جانە SPIC-ءتىڭ حالىقارالىق جوبالار جونىندەگى ديرەكتورلار كەڭەسىنىڭ توراعاسى حۋان چەن باستاپ كەلدى.
كەلىسسوز بارىسىندا تاراپتار رەسپۋبليكالىق ماڭىزى بار «Aqmola» يندۋستريالىق ايماعى اۋماعىندا وندىرىستىك قۋاتتار مەن قوسالقى بولشەكتەر ءوندىرىسىن جەرگىلىكتەندىرۋ بويىنشا ىنتىماقتاستىق مۇمكىندىكتەرىن تالقىلادى. اتالعان ايماق ەلورداعا ىرگەلەس ورنالاسقان جانە قاجەتتى ينجەنەرلىك ينفراقۇرىلىممەن تولىق قامتاماسىز ەتىلگەن.
ءوڭىر باسشىسى اقمولا وبلىسىندا تۇراقتى ەنەرگەتيكا باعىتىنداعى جۇمىستار جۇيەلى تۇردە جۇرگىزىلىپ جاتقانىن ايتتى. بۇگىنگى كۇنى وبلىستا جالپى قۇنى 284 ملرد تەڭگەنى قۇرايتىن جاڭارتىلاتىن ەنەرگيا كوزدەرى بويىنشا 17 جوبا جۇزەگە اسىرىلعان. 2024 جىلدىڭ قورىتىندىسى بويىنشا وبلىستاعى ەلەكتر ەنەرگياسى وندىرىسىندە جاڭارتىلاتىن كوزدەردىڭ ۇلەسى 78,5 پايىزدى قۇرادى. ال 2025 جىلدىڭ قاڭتار-اقپان ايلارىندا وبلىستىڭ رەسپۋبليكاداعى «جاسىل» ەكونوميكانى دامىتۋعا قوسقان ۇلەسى 30 پايىزعا جەتتى.
ايتا كەتەيىك, جۇرگىزىلگەن زەرتتەۋلەرگە سايكەس وڭىردەگى جەلدىڭ ورتاشا جىلدامدىعى سەكۋندىنا 7-12 مەتردى قۇرايدى, بۇل جەل ەلەكتر ستانتسيالارى ءۇشىن وڭتايلى كورسەتكىش بولىپ سانالادى.
قىتايلىق دەلەگاتسيا SPIC كومپانياسىنىڭ قاتىسۋىمەن اقمولا وبلىسىندا جوبالاردى ىسكە اسىرۋعا قىزىعۋشىلىق ءبىلدىرىپ, وڭىردەگى قولايلى ينۆەستيتسيالىق احۋالدى جانە ۇزاقمەرزىمدى سەرىكتەستىككە ازىرلىكتى اتاپ ءوتتى.
Shanghai Electric Power Co., Ltd. كومپانياسىنىڭ باس ديرەكتورى حۋان چەن قىتاي تاراپى ءۇشىن قازاقستان ەنەرگەتيكا سالاسىنداعى سىرتقى ىنتىماقتاستىقتىڭ باسىم باعىتى بولىپ سانالاتىنىن ەرەكشە اتاپ ءوتتى.
كەلىسسوزدەردىڭ قورىتىندىسى بويىنشا بىرلەسكەن جۇمىس توپتارىن قۇرۋ جانە ينۆەستيتسيالاردى قورعاۋ تۋرالى كەلىسىم جوباسىن دايىنداۋ جونىندە ۋاعدالاستىققا قول جەتكىزىلدى.
ءوڭىر اكىمى مۇنداي جوبالاردى جۇزەگە اسىرۋ مىڭداعان جاڭا جۇمىس ورنىن اشۋعا, ءوندىرىس كولەمىن ارتتىرۋعا جانە وبلىستىڭ ەكسپورتتىق الەۋەتىن نىعايتۋعا مۇمكىندىك بەرەتىنىن اتاپ ءوتتى.
اقمولا وبلىسى.
