مەملەكەت باسشىسى نۇرسۇلتان نازارباەۆ ماراپاتتاۋ راسىمىنە قاتىسۋشىلاردى ەڭ الدىمەن وتان قورعاۋشى كۇنىمەن جانە ۇلى وتان سوعىسىنداعى جەڭىستىڭ 70 جىلدىعىمەن قۇتتىقتادى.
قازاقستان پرەزيدەنتى ماراپاتقا ۇسىنىلعانداردىڭ ءبارى دە ەرەن ەڭبەگىمەن, قالتقىسىز قىزمەتىمەن ەرەكشەلەنگەن جاندار ەكەنىن اتاپ ءوتتى. «بيىل ۇلى وتان سوعىسى مەن تىل ارداگەرلەرىنە تاۋەلسىز ەلدىڭ ءتول ناگرادالارى تاپسىرىلادى. بۇگىنگى ۇرپاق ۇلى جەڭىستى الىپ بەرگەن اعا بۋىن الدىندا ارقاشان قارىزدار. مەملەكەت باسشىسى رەتىندە مەن بۇكىل ەل اتىنان سىزدەرگە مىڭ العىس ايتامىن, ارداقتى ارداگەرلەر», – دەدى ەلباسى.
مەملەكەتتىك ناگرادالاردى تاپسىرۋ كەزىندە نۇرسۇلتان نازارباەۆ ەر-ازاماتقا تۋعان وتاندى, قاستەرلى تاۋەلسىزدىكتى قورعاپ, ەل تىنىشتىعىن كۇزەتۋدەن اسقان مارتەبە جوق ەكەنىن ايتتى. «سىزدەر سول ابىرويلى بورىشتى ادال اتقاردىڭىزدار جانە اتقارىپ كەلەسىزدەر. سىزدەر سوعىستان كەيىن دە ەلگە قىزمەت ەتۋدى جالعاستىرىپ, بەيبىت كۇندە دە باتىرلىققا ورىن بار ەكەنىن قاپىسىز دالەلدەي بىلدىڭىزدەر. قوعامدا تۇراقتىلىق پەن ءتارتىپتىڭ ساقتالۋى دا مىنا سىزدەردىڭ ەڭبەكتەرىڭىزگە تىكەلەي بايلانىستى», – دەدى قازاقستان پرەزيدەنتى ءوز سوزىندە.
ەلدىڭ ومىرىندە وتان قورعاۋشى ەردىڭ ورنى قاشاندا ەرەكشە. «ۇلتتىق اسكەر – ەگەمەن ەلدىڭ قۇرىش قالقانى. ونىڭ باستى مىندەتى – ۇلت پەن ۇلىستىڭ قاۋىپسىزدىگىن قامتاماسىز ەتۋ. بۇگىندە شەكارامىزدىڭ قاۋىپسىزدىگى مەن حالقىمىزدىڭ اماندىعىن سەنىمدى ساربازدار كۇزەتىپ تۇر. ولار اتا-بابالاردىڭ ەرلىك ءداستۇرىن لايىقتى جالعاستىرىپ, اعا بۋىن اماناتىنا ادال بولادى دەپ سەنەمىن. ەلگە قورعان بولۋ ءۇشىن ەر-ازاماتقا قاجىماس قايرات, اسقاق رۋح قاجەت ەكەنى انىق. سىزدەردىڭ بويلارىڭىزدان سونىڭ ءبارى تابىلادى», دەدى نۇرسۇلتان نازارباەۆ.
بۇدان كەيىن قازاقستان پرەزيدەنتى مەملەكەتتىك ناگرادالار تاپسىرۋ ءراسىمى ەكى بىردەي ماڭىزدى مەرەكەنىڭ قارساڭىندا ءوتىپ وتىرعانىنا نازار اۋداردى. «بۇگىن وعان ەلدىڭ بوستاندىعى مەن بەيبىت ءومىرىن قورعاپ قالعان ارداگەرلەر قاتىسىپ وتىر. ءبىز سىزدەرگە «بارىس» جانە «قۇرمەت» وردەندەرىن تاپسىرامىز. بۇل – بۇگىنگى ۇرپاق سىزدەرگە ۇسىنا الاتىن سىي-قۇرمەتتىڭ ءبىر بولشەگى عانا. بۇكىل ەل, بۇكىل الەم فاشيزمنەن قورعاپ قالعاندارىڭىز ءۇشىن سىزدەرگە بورىشتار. ارداگەرلەردى ماراپاتتاۋ ۇزىلمەس ۇرپاق ساباقتاستىعىن ايعاقتايدى. سىزدەردىڭ مايدان دالاسى مەن بەيبىت ءومىردەگى ەرلىكتەرىڭىز ءاردايىم باتىرلىق پەن وتانشىلدىقتىڭ ۇلگىسى بولىپ قالا بەرمەك. ۇلى جەڭىسكە قول جەتكىزگەندەردىڭ بارلىعى ءۇشىن ەڭ ۇزدىك ماراپات – تاۋەلسىز قازاقستان, وركەندەۋ جولىنداعى ەلىمىز, ازاماتتارىمىزدىڭ باقۋاتتى ءومىرى. بۇل سىزدەردىڭ ەرلىكتەرىڭىزدىڭ بەكەر كەتپەگەنىن دالەلدەيدى. بۇگىندە سىزدەردىڭ ىستەرىڭىزدى قازاقستاندىقتاردىڭ جاڭا ۇرپاعى تابىستى جالعاستىرۋدا. ەل ولاردىڭ دا ەڭبەگىن باعالايدى», – دەدى نۇرسۇلتان نازارباەۆ.
قازاقستان پرەزيدەنتى, سونىمەن قاتار, بۇل جولى وردەندەر مەن مەدالدار تاپسىرىلاتىن جانداردىڭ قاتارىندا ءتۇرلى سالا مەن ۇيىمنىڭ وكىلدەرى بار ەكەنىن اتاپ ءوتتى. «بارشاڭىزدى بەيبىت ءارى باقۋاتتى قازاقستاندى دامىتۋعا قوسقان زور ۇلەس بىرىكتىرەدى. قازىر, بەيبىت ۋاقىتتا سىزدەر تاۋەلسىزدىكتى كۇزەتەسىزدەر, ەل شەكاراسىن, تۇراقتىلىقتى, تىنىشتىق پەن رەسپۋبليكامىزداعى زاڭدىلىقتىڭ ساقتالۋىن قورعايسىزدار. سىزدەردىڭ ومىرلەرىڭىز تۇتاستاي وتانعا قىزمەت ەتۋگە ارنالعان. مەن سىزدەرگە بۇل ناگرادالاردى ريزاشىلىقپەن تاپسىرامىن», – دەدى مەملەكەت باسشىسى.
وسىدان كەيىن نۇرسۇلتان نازارباەۆ راسىمگە قاتىسۋشىلاردى تاعى دا قۇتتىقتاپ, ولارعا زور دەنساۋلىق پەن تابىس تىلەدى.
ماراپاتتالعان ارداگەرلەر مەملەكەت باسشىسىنا وزدەرىنە كورسەتىلگەن زور قۇرمەت پەن قامقورلىعى, سونداي-اق, ەلدە تاتۋلىق پەن تىنىشتىقتى قامتاماسىز ەتىپ وتىرعانى ءۇشىن ريزاشىلىقتارىن ءبىلدىردى.
سونىمەن, ءىىى دارەجەلى «بارىس» وردەنى الماتى قالاسىنان كەلگەن سوعىس ارداگەرى س.جيەنباەۆقا جانە الماتى وبلىسىنان كەلگەن سوعىس جانە ەڭبەك ارداگەرى س.يساەۆقا تابىستالدى.
ال «قۇرمەت» وردەنىمەن سوعىس ارداگەرى م.ابدراحمانوۆ (ورال قالاسى), سوعىس ارداگەرى ز.ادىلبەكوۆ (الماتى قالاسى), سوعىس ارداگەرى ق.امىرەنوۆ (پاۆلودار قالاسى), سوعىس ارداگەرى ق.بەكەنوۆ (استانا قالاسى), سوعىس ارداگەرى ب.بوقاەۆ (ماڭعىستاۋ وبلىسى), سوعىس ارداگەرى ۆ.بولوتين (قاراعاندى وبلىسى), سوعىس ارداگەرى ك.برەزگوۆين (قوستاناي وبلىسى), ەڭبەك ارداگەرى ا.داۋىلباەۆ (سولتۇستىك قازاقستان وبلىسى), سوعىس ارداگەرى م.دوموۆەتس (شىعىس قازاقستان وبلىسى), سوعىس ارداگەرى ا.ەلۋباەۆ (اتىراۋ وبلىسى), سوعىس ارداگەرى و.جالماعامبەت (اقتوبە قالاسى), سوعىس ارداگەرى ش.جانىبەكوۆ (الماتى قالاسى), سوعىس ارداگەرى س.جارىقباسوۆ (الماتى وبلىسى), سوعىس ارداگەرى ر.جيتكوۆسكايا (الماتى قالاسى), سوعىس ارداگەرى ي.قاليەۆ (قىزىلوردا قالاسى), سوعىس ارداگەرى ي.قۇربانوۆ (جامبىل وبلىسى), سوعىس ارداگەرى م.پولتاراتسكايا (استانا قالاسى), سوعىس ارداگەرى ج.رامازانوۆ (كوكشەتاۋ قالاسى), سوعىس ارداگەرى س.شامەنوۆ (وڭتۇستىك قازاقستان وبلىسى) ماراپاتتالدى.
II دارەجەلى «داڭق» وردەنىنە قازاقستان رەسپۋبليكاسى قارۋلى كۇشتەرى باس شتابى باستىعىنىڭ ءبىرىنشى ورىنباسارى ر.ءالىموۆ, استانا قالاسىنىڭ پروكۋرورى س.بەكبوسىنوۆ, قوستاناي وبلىسى ىشكى ىستەر دەپارتامەنتىنىڭ باستىعى ت.ماتكەنوۆ, قازاقستان رەسپۋبليكاسى مەملەكەتتىك كۇزەت قىزمەتى باستىعىنىڭ ورىنباسارى ق.ورازقۇلوۆ, قازاقستان رەسپۋبليكاسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى اپپاراتىنىڭ باسشىسى ا.شايىموۆا لايىق دەپ تانىلدى.
ال ءىى دارەجەلى «ايبىن» وردەنىمەن قازاقستان رەسپۋبليكاسى باس پروكۋراتۋراسىنىڭ دەپارتامەنت باستىعى ر.دوسىمبەكوۆا, قازاقستان رەسپۋبليكاسى ۇلتتىق قاۋىپسىزدىك كوميتەتى شەكارا قىزمەتىنىڭ 1-اۆياتسيالىق بازاسىنىڭ ۇشۋ دايىندىعى كومانديرىنىڭ ورىنباسارى م.كاۋشەنوۆ, قازاقستان رەسپۋبليكاسى قورعانىس مينيسترلىگى №44803 اسكەري ءبولىمىنىڭ كومانديرى ن.قاباقوۆ, قازاقستان رەسپۋبليكاسى قارۋلى كۇشتەرى قۇرلىق اسكەرلەرى باس قولباسشىسى باسقارماسى باس شتابى باستىعىنىڭ ورىنباسارى – جەدەل باس باسقارمانىڭ باستىعى ا.ستەپانەنكو ماراپاتتالدى.
ىىى دارەجەلى «ايبىن» وردەنى قازاقستان رەسپۋبليكاسى قارۋلى كۇشتەرى اۋە قورعانىسى كۇشتەرىنىڭ سەرجانتى – اۋە قورعانىسى كۇشتەرى باس قولباسشىسى باسقارماسىنىڭ ءبولىم باستىعى س.شوراحانوۆقا تابىستالدى.
«ەرلىگى ءۇشىن» مەدالىمەن قازاقستان رەسپۋبليكاسى ۇلتتىق قاۋىپسىزدىك كوميتەتى شەكارا قىزمەتى جاعالاۋ كۇزەتى وڭىرلىك باسقارماسى «ساقشى» شەكارا كەمەسىنىڭ كومانديرى ە.كاليشەۆ, قازاقستان رەسپۋبليكاسى ىشكى ىستەر مينيسترلىگىنىڭ قاراعاندى وبلىسى ىشكى ىستەر دەپارتامەنتىنىڭ ينسپەكتورى ە.سادىقبەكوۆ, قازاقستان رەسپۋبليكاسى قورعانىس مينيسترلىگى №28079 اسكەري ءبولىمى ارنايى ماقساتتاعى دەسانتتىق-شابۋىلداۋشى روتاسىنىڭ اعا راديوتەلەفونشىسى س.سارمىرزاەۆ, قازاقستان رەسپۋبليكاسى ىشكى ىستەر مينيسترلىگى توتەنشە جاعدايلار كوميتەتىنىڭ سولتۇستىك قازاقستان وبلىسى توتەنشە جاعدايلار دەپارتامەنتىنىڭ اعا ينجەنەرى س.سەيفۋللين ماراپاتتالدى.
«جاۋىنگەرلىك ەرلىگى ءۇشىن» مەدالى قازاقستان رەسپۋبليكاسى مەملەكەتتىك كۇزەت قىزمەتى وبەكتىلەردى قورعاۋ قىزمەتى №0112 اسكەري ءبولىمى قۇرمەت قاراۋىلى روتاسىنىڭ كومانديرى ا.ەلامانوۆقا, قازاقستان رەسپۋبليكاسى قورعانىس مينيسترلىگى №62064 اسكەري ءبولىمىنىڭ كومانديرى ش.جارىلقاسىنوۆقا, قازاقستان رەسپۋبليكاسى ۇلتتىق قاۋىپسىزدىك كوميتەتى «ارىستان» قىزمەتى باستىعىنىڭ ورىنباسارى د.جۇمابەكوۆكە, قازاقستان رەسپۋبليكاسى ۇلتتىق ۇلانى «باتىس» وڭىرلىك قولباسشىلىعىنىڭ وفيتسەرى س.قابدىقۇلوۆقا, قازاقستان رەسپۋبليكاسى قورعانىس مينيسترلىگى №29011 اسكەري ءبولىمى شتاب باستىعىنىڭ ورىنباسارى – شتاب جەدەل بولىمشەسىنىڭ باستىعى د.قايروشەۆكە بەرىلدى.
ءلايلا ەدىلقىزى, «ەگەمەن قازاقستان».
