فوتولار: اقوردا
«پرەزيدەنت رادەۆتىڭ قازاقستانعا جاساعان رەسمي ساپارى ستراتەگيالىق سەرىكتەستىگىمىزدىڭ جاڭا كەزەڭى باستالعانىن كورسەتەدى. بۇل – ءبىزدىڭ ورتاق وركەندەۋ جولىنداعى ىقپالداستىعىمىزعا قوزعاۋ سالادى. وتىز جىلدان استام ۋاقىت ىشىندە قازاقستان مەن بولگاريا اراسىندا بەرىك ءارى ءوزارا قۇرمەتكە نەگىزدەلگەن ساياسي جانە ديپلوماتيالىق قارىم-قاتىناس ورنادى. قازاقستان بولگاريانى دوستاس ەل ءارى وتە ماڭىزدى ستراتەگيالىق سەرىكتەس سانايدى. دەگەنمەن ساۋدا-ينۆەستيتسيالىق ىنتىماقتاستىقتا پايدالانىلماعان الەۋەت جەتكىلىكتى. ەكى ەل اراسىنداعى بايلانىستى جانداندىرۋدا قازاقستان-بولگاريا ەكونوميكالىق ىنتىماقتاستىق جونىندەگى ۇكىمەتارالىق كوميسسياسى ماڭىزدى الاڭعا اينالادى دەپ سانايمىز», دەدى قازاقستان پرەزيدەنتى.
مەملەكەت باسشىسى ەلىمىز ەكونوميكالىق ىقپالداستىقتىڭ جاڭا مۇمكىندىكتەرىن اشۋعا دايىن ەكەنىن جەتكىزىپ, باسىم باعىتتاردى اتاپ ءوتتى.
ء«بىرىنشى – كولىك قاتىناسى. قازاقستان مەن بولگاريا گەوگرافيالىق تۇرعىدان وڭتايلى ورنالاسقان. ەۋرازيانىڭ قاق ورتاسىندا تۇرعان ءبىزدىڭ ەلىمىز قۇرلىقارالىق بايلانىستى قامتاماسىز ەتۋدە ماڭىزدى ءرول اتقارادى. ەۋروپا مەن قىتاي اراسىنداعى قۇرلىق ارقىلى تاسىمالداناتىن جۇكتىڭ 85 پايىزى قازاقستان اۋماعىمەن وتەدى. ورتا ءدالىز ينفراقۇرىلىمىن دامىتۋدىڭ ارقاسىندا, ياعني, زاماناۋي تەمىرجولدار, قۇرعاق پورتتار مەن لوگيستيكالىق ورتالىقتار سالا وتىرىپ, شىعىس پەن باتىس اراسىن بۇرىنعىدان الدەقايدا ءتيىمدى جالعايمىز. بىلتىر اتالعان ءدالىزدىڭ بويىمەن تاسىمالدانعان جۇكتىڭ كولەمى 62 پايىزعا ءوسىپ, 4,5 ميلليون تونناعا جەتتى. بۇدان وسى باعىتتىڭ ماڭىزى ارتا تۇسكەنىن اڭعارۋعا بولادى. 2028 جىلعا قاراي جولدىڭ جۇك وتكىزۋ مۇمكىندىگى 10 ميلليون تونناعا دەيىن ۇلعايادى. بۇل باعىت ارقىلى تاسىمالداناتىن جۇك كولەمىن ارتتىرۋعا نيەتتىمىز جانە قارا تەڭىزدەگى نەگىزگى لوگيستيكالىق ورتالىق – بۋرگاس پورتىنىڭ ورتا دالىزگە قوسىلۋىن قۇپتايمىز», دەدى قاسىم-جومارت توقاەۆ.
پرەزيدەنت ورنىقتى ەنەرگەتيكانى پەرسپەكتيۆتى باعىتتىڭ ءبىرى رەتىندە اتادى.
مەملەكەت باسشىسىنىڭ ايتۋىنشا, قازاقستاننىڭ جاڭارتىلاتىن ەنەرگيا سالاسى ايتارلىقتاي ىلگەرىلەدى.
«جاسىل ەنەرگەتيكانى دامىتۋ ىسىندە ءىرى حالىقارالىق ينۆەستورلار ءۇشىن تارتىمدى ەلگە اينالدىق. بۇگىندە قازاقستاندا 150-دەن استام قايتا جاڭارتىلاتىن ەنەرگيا نىسانى بار. ولاردىڭ قۋاتتىلىعى 3 گۆت-تان اسادى. Black Sea Energy باستاماسى اياسىنداعى بىرلەسكەن كۇش-جىگەرىمىز دەكاربونيزاتسيا بويىنشا ورتاق ماقساتتارىمىزعا قول جەتكىزۋگە ىقپال ەتەدى دەپ سانايمىز. سونداي-اق قازاقستان گەولوگيالىق بارلاۋ جۇمىستارىن جۇرگىزۋ جانە حالىقارالىق جوبالارعا قاتىسۋ ارقىلى گاز ءوندىرۋ كولەمىن ۇلعايتۋعا كۇش سالادى. ۋران وندىرۋدە الەمدەگى كوشباسشى ەلمىز. وسى ورايدا ەنەرگەتيكالىق قۋاتىمىزدى ارتتىرا تۇسەتىن اتوم ستانتسياسىنىڭ قۇرىلىسى باستالادى. بۇل ەكونوميكالىق ىنتىماقتاستىعىمىزعا وڭ اسەر ەتەدى», دەدى مەملەكەت باسشىسى.
بۇدان بولەك, وتاندىق اگروبيزنەستىڭ الەۋەتىن ارتتىرۋعا باسا نازار اۋدارىلدى.
ء«بىزدىڭ اۋىلشارۋاشىلىق ونىمدەرىمىز الەمنىڭ 70-تەن استام ەلىنە ەكسپورتتالادى. جىل سايىن نارىققا 8 ميلليون توننادان استام بيداي مەن ەكى ميلليون توننا ۇن شىعاراتىن قازاقستان الەمدەگى ءىرى استىق ەكسپورتتاۋشىلاردىڭ وندىعىنا كىرەدى. بولگاريالىق سەرىكتەستەرىمىزبەن ەت پەن ءسۇت ونىمدەرىن, بال, وسىمدىك مايىن وندىرۋدە ىنتىماقتاستىقتى دامىتۋعا مۇددەلىمىز. شىمكەنت قالاسىندا ەت وڭدەۋ ىسىنە ينۆەستيتسيا قۇيۋدى كوزدەپ وتىرعان Lekkerbek كومپانياسىنىڭ نيەتىن قولدايمىز. بۇل جوبا زاماناۋي تەحنولوگيالار ەنگىزىپ, ايماقتىڭ ەكسپورتتىق الەۋەتىن كوتەرۋگە مۇمكىندىك بەرەدى», دەدى پرەزيدەنت.
قاسىم-جومارت توقاەۆ بولگاريالىق سەرىكتەستەرمەن فارماتسەۆتيكا سەكتورىندا ىقپالداستىق ورناتۋدىڭ الەۋەتى زور دەپ سانايدى. پرەزيدەنت ءوز سوزىندە تسيفرلىق ترانسفورماتسياعا باسا نازار اۋداردى. سونىمەن قاتار قازاقستاندا مەملەكەت تە, جەكە سەكتور دا ءوز ىستەرىنە وزىق تسيفرلىق شەشىمدەردى كەڭىنەن ەنگىزىپ جاتقانىن ايتتى.
«باسەكەگە قابىلەتتىلىكتى ارتتىرۋ ءۇشىن جاساندى ينتەللەكت تەحنولوگيالارىن ازىرلەۋدى قولعا الدىق. وسىلايشا, بۇل باعىتتا جۇيەلى جۇمىس جۇرگىزىپ جاتقان العاشقى ەلگە اينالدىق. وزىق ءىت ينفراقۇرىلىم جاساقتاۋ, سونىڭ ىشىندە سۋپەركومپيۋتەرلەر مەن مالىمەتتەردى وڭدەۋ ورتالىعىن قۇرۋ قازاقستاننىڭ كەلەشەكتەگى دامۋىنىڭ وزەگى بولماق. سونىمەن قاتار جاساندى ينتەللەكتىگە نەگىزدەلگەن ەكونوميكانى دامىتۋعا ىقپال ەتەتىن حالىقارالىق جاساندى ينتەللەكت ورتالىعىن ىسكە قوسامىز. پرەزيدەنت مىرزا, ءسىز ەلىڭىزدىڭ جاساندى ينتەللەكتىنى يگەرۋ جانە ءوزىنىڭ سۋپەركومپيۋتەرىن جاساۋ ىسىندەگى كەرەمەت جەتىستىكتەرى جونىندە ايتتىڭىز. اتالعان تابىستارىڭىز وسى ەرەكشە ماڭىزدى سالادا تاجىريبە الماسۋعا نەگىز بولادى. قازاقستاندا CryptoCity پيلوتتىق ايماعى دايىندالۋ ۇستىندە. مۇندا كريپتوۆاليۋتانى كۇندەلىكتى ساۋدا جاساۋعا, قىزمەتتەردىڭ اقىسىن تولەۋگە جانە ەكونوميكادا كەڭىنەن پايدالانۋعا بولادى», دەدى قاسىم-جومارت توقاەۆ.
مەملەكەت باسشىسى بولگاريا كومپانيالارىن استانا حالىقارالىق قارجى ورتالىعى ۇسىناتىن مۇمكىندىكتەردى زەردەلەپ, قارقىندى دامىپ كەلە جاتقان احقو ەكوجۇيەسىنە قوسىلۋعا شاقىردى. ءسوز سوڭىندا پرەزيدەنت قازاقستاننىڭ بولگاريامەن بارلىق باعىت بويىنشا سەرىكتەستىكتى تەرەڭدەتۋگە دايىن ەكەنىن راستادى.
