فوتو: اقوردا
قاسىم-جومارت توقاەۆ بولگاريا – قازاقستاننىڭ ەۋروپاداعى ەڭ ماڭىزدى سەرىكتەستەرىنىڭ ءبىرى ەكەنىن اتاپ ءوتتى.
«ەكى ەلدى تامىرى تەرەڭ ساياسي جانە ەكونوميكالىق ىنتىماقتاستىق بايلانىستىرادى. ءارتۇرلى سالاداعى ەكىجاقتى قارىم-قاتىناستارىمىز تۇراقتى دامىپ كەلەدى. مۇنى سەنىمدى ساياسي ديالوگتان, پارلامەنتتەر اراسىنداعى ناتيجەلى ىقپالداستىقتان, ساۋدا مەن ينۆەستيتسيانىڭ قارقىندى وسۋىنەن, حالىقتارىمىزدىڭ بايلانىسى مەن الەمدىك قوعامداستىقتاعى ءوزارا قولداۋدان انىق اڭعارۋعا بولادى. ەكىجاقتى ساۋدا اينالىمىنىڭ ارتىپ كەلە جاتقانى قۋانتادى. بۇل جاقسى ءۇردىس. ءبىزدىڭ نارىقتا 60-قا جۋىق بولگار كومپانياسى تابىستى جۇمىس ىستەپ جاتىر. قازىرگى ۋاقىتتا ءبىز تاۋ-كەن ونەركاسىبى, ءوندىرىس, كولىك جانە قۇرىلىس سالالارىندا جەمىستى ىنتىماقتاستىق ورناتتىق. ەنەرگەتيكا, ترانسپورت جانە لوگيستيكا, جاسىل ەنەرگيا, اتوم ونەركاسىبى, عارىش, اۋىل شارۋاشىلىعى, تسيفرلاندىرۋ, دەنساۋلىق ساقتاۋ, تۋريزم سەكىلدى پەرسپەكتيۆتى سالالار بويىنشا ىقپالداستىقتىڭ الەۋەتى زور», دەدى قازاقستان پرەزيدەنتى.
ءوز كەزەگىندە رۋمەن رادەۆ بولگاريا ەكى ەل اراسىنداعى ءداستۇرلى ءارى تابىستى بايلانىستى جوعارى باعالايتىنىن ايتتى.
«مەملەكەتىڭىزدى وركەندەتۋگە باعىتتالعان اۋقىمدى رەفورمالارىڭىز بەن كورەگەن ساياساتىڭىزدى قولدايمىن. ءبىز قازاقستاندى ورتالىق ازياداعى باستى سەرىكتەسىمىز سانايمىز. سىزدەردىڭ وسىعان دەيىنگى تابىستارىڭىز تاڭعالارلىق: ەكونوميكالارىڭىز قارقىندى ءوسىپ كەلەدى, يننوۆاتسيا, عىلىم, ءبىلىم, جوعارى تەحنولوگيا سالالارىندا زور تابىسقا جەتتىڭىزدەر. كەشە مەن عارىش ورتالىعىن ارالاپ كوردىم. سىزدەردىڭ جەتىستىكتەرىڭىزدەن جاقسى اسەر الدىم», دەدى بولگاريا پرەزيدەنتى.
