استانا. 22 ماۋسىم. «الەۋمەتتىك جوبالار» كورپوراتيۆتىك قورى قامقورلار كەڭەسىنىڭ شەشىمىمەن «بارىس» حوككەي كومانداسىنىڭ باس جاتتىقتىرۋشىسى بولىپ ەرلان ساعىمباەۆ تاعايىندالدى. اتالعان كەڭەستىڭ توراعاسى اسقار مامين جاڭا جاتتىقتىرۋشىنىڭ الداعى جۇمىسىنا ساتتىلىك تىلەدى. بۇل تۋرالى «بارىس» كومانداسىنىڭ ءباسپاسوز قىزمەتىنە سىلتەمە جاساعان egemen.kz حابارلادى.
ەرلان ەرلەس ۇلى 1970 جىلى 5 ساۋىردە قازاق حوككەيىنىڭ ۇستاحاناسى – وسكەمەن قالاسىندا تۋعان. جەرگىلىكتى «تورپەدو» كومانداسىنىڭ تۇلەگى. ودان بولەك, «اۆتوموبيليست» (قاراعاندى), «اۆانگارد» (ومبى), «مەتاللۋرگ» (نوۆوكۋزنەتسك) جانە «سيبير» (نوۆوسيبيرسك) حوككەي كوماندالارىندا تەر توكتى. سونداي-اق, 1998 جىلى ناگانودا (جاپونيا) وتكەن قىسقى وليمپيادادا قازاقستان قۇراماسىنىڭ كاپيتانى بولدى. ۇلتتىق قۇراما ساپىندا ەكى دۇركىن قىسقى ازيا ويىندارىنىڭ جەڭىمپازى اتاندى (1996 جانە 1999 جج.).
ويىنشى رەتىندە سپورتتىق مانسابىن 2001 جىلى اياقتاعان ە.ساعىمباەۆ سودان بەرى شاكىرت تاربيەلەۋمەن اينالىسىپ كەلەدى. وسى ارالىقتا «كازتسينك-تورپەدو» (وسكەمەن), «سارىارقا» (قاراعاندى), «ەرتىس» (پاۆلودار) كوماندالارىن جانە ۇلتتىق قۇرامانى جاتتىقتىردى. ودان بولەك, «سنەجنىە بارسى» جانە «بارىس» كوماندالارى جاتتىقتىرۋشىلار قۇرامىنىڭ مۇشەسى بولدى. شايبالى حوككەيدەن حالىقارالىق دارەجەدەگى سپورت شەبەرى. قازاقستاننىڭ ەڭبەك سىڭىرگەن جاتتىقتىرۋشىسى.
ايتا كەتەيىك, «بارىستىڭ» بۇرىنعى باس جاتتىقتىرۋشىسى اندرەي نازاروۆ سانكت-پەتەربۋرگتىڭ سكا كومانداسىنا كەتىپ قالعان بولاتىن.
ەلامان قوڭىر.
دەرەك, سۋرەت: «بارىس» حوككەي كومانداسىنىڭ ءباسپاسوز قىزمەتى.
