فوتو:تولعاناي باتىرحان
2016 جىلدان ءداستۇرلى تۇردە وتكىزىلەتىن شارادا زاڭگەرلەر, بەلگىلى ادۆوكاتتار, نوتاريۋستار, سوت ورىنداۋشىلارى, سونداي-اق پروكۋراتۋرا, قۇقىق قورعاۋ ورگاندارى, جەرگىلىكتى اتقارۋشى ورگاندار, مەملەكەتتىك قۇرىلىمداردىڭ وكىلدەرى سىندى 100-دەن اسا مامان قاتىسىپ, تۇرعىندارعا تەگىن كەڭەس بەردى.
ەل بويىنشا وتكەن اكتسيانى ۇيىمداستىرۋعا سىبايلاس جەمقورلىققا قارسى ءىس-قيمىل اگەنتتىگى ۇيىتقى بولعان. اۋقىمدى شاراعا كەلگەن 700-گە جۋىق استانالىققا اگەنتتىكتىڭ ۆولونتەرلىك ۇيىمى دا قىزمەت كورسەتتى. كەلۋشىلەر جەتەكشى مامانداردان قۇقىقتىق كەڭەس الىپ, كوكەيىندەگى ساۋالداردىڭ شەشىمىن تاۋىپ جاتتى.
«حالىق زاڭگەرى» حالىقتى قۇقىقتىق قولداۋدىڭ سۇرانىسقا يە تۇعىرناماسىنا اينالدى. 2016 جىلدان بەرى 150 مىڭنان استام ازامات تەگىن كومەك الدى, ال كونسۋلتاتسيالار وتكىزۋگە 7 مىڭنان استام بىلىكتى زاڭگەرلەر مەن مەملەكەتتىك ورگانداردىڭ باسشىلارى تارتىلدى. وسى اكتسياعا تۇرعىندار تاراپىنان سۇرانىس جىل ساناپ ارتىپ كەلەدى. بارشامىزعا بەلگىلى زاڭگەرلەردىڭ كەڭەسىنە كەي تۇرعىندار قارجى تابا الماي جاتادى. بۇل اكتسيا سونداي ازاماتتارعا تاپتىرماس مۇمكىندىك. ولار سۇراعىنا بايلانىستى قايدا جۇگىنۋ كەرەك, ماسەلەنى شەشۋدىڭ باعىت-باعدارىن الىپ كەتەدى», دەدى قر سجقىا استانا قالاسى دەپارتامەنتىنىڭ پرەۆەنتسيا باسقارماسى باسشىسىنىڭ ورىنباسارى دياس قوزىباەۆ.
اكتسيا اياسى ازاماتتىق قۇقىق جانە پروتسەسس, بانكتىك قۇقىق, اتقارۋشىلىق ءىس جۇرگىزۋ, نەكە-وتباسى قۇقىعى, مۇراگەرلىك, تۇرعىن ءۇي, جەر, ەڭبەك, سالىق, الەۋمەتتىك قامسىزداندىرۋ جانە نوتارياتتىق قىزمەت, زياتكەرلىك مەنشىك, كورپوراتيۆتىك اكىمشىلىك قۇقىق, قىلمىستىق قۇقىق جانە پروتسەسس باعىتتارىن قامتىدى. 9-دان اسا زاڭ سالاسىندا تولىسقان تاجىريبەگە يە جەكە زاڭگەر بۇل اكتسيادا تۇرعىن ءۇي ماسەلەسىنە قاتىستى تۇيىندەردى تارقاتۋعا اتسالىستى.
«وسي قۇرۋ, تۇرعىن ءۇي كومپانيالارى مەن پاتەرلەرگە كوممۋنالدىق قىزمەت كورسەتۋشىلەرگە قاتىستى ساۋالدار كەلىپ ءتۇستى. كەلۋشىلەرگە زاڭعا ساي كەڭەس بەرىپ جاتىرمىز. مۇنداي شارالاردى وتكىزۋدىڭ ءتيىمدى تۇسى كوپ. سەبەبى تۇرعىندار ءبىر جەردەن ماسەلەسىنە قاتىسى بار بىرنەشە ماماننان كەڭەس الىپ ۇلگەرەدى», دەدى زاڭگەر باۋىرجان ايىمبەتوۆ.
ايتا كەتەيىك, «حالىق زاڭگەرى» رەسپۋبليكالىق الەۋمەتتىك اكتسياسى ەل اۋماعىن تۇگەل قامتىدى.
